ბოდიში ჟორდანიას, სიურპრიზი გამგებელს _ ლანჩხუთი “სირცხვილს ვერ ასცდა”

19 აგვისტოს, გურიის რეგიონულმა ფედერაციამ სფფ-ს პრეზიდენტობის კანდიდატად რევაზ არველაძე წარადგინა, რომელიც დღეს ოფიციალურად დარეგისტრირდა.
არველაძის წარდგენის შესახებ ინფორმაცია მედიიდან გაიგეს გურიის ფედერაციის გამგეობის წევრებმა.

_ არაფერი  ვიცი. მოარული ხმების დონეზე გავიგე, გადავამოწმე გურიის ფედერაციის ხელმძღვანელთან და მითხრა, რომ მას ერთპიროვნულად ჰქონდა ამ გადაწყვეტილების მიღების უფლება. მხოლოდ ის ვიცი, რომ არაფერი მკითხეს,  _ აღნიშნა ჩვენთან საუბრისას გამგეობის წევრმა ბენო თავბერიძემ.

ანალოგიური კომენტარი გააკეთა გურიის ფედერაციის მდივანმა, საფეხბურთო კლუბ „მერცხალის“ მთავარმა მწვრთნელმა ხარიტონ ჩხატარაშვილმა.

_ კახა ებრალიძემ წარადგინა, როგორც ვიცი, ჩვენთან არაფერი შეუთანხმებია, მეც შემთხვევით გავიგე. მას ჰქონდა უფლება, მაგრამ მეც, ოზურგეთიც, ჩოხატაურიც და ლანჩხუთიც _ გამგეობის წევრები განაწყენებულები ვართ, რომ საქმის კურსში არ ჩაგვაყენა,  _ განმარტა ჩხატარაშვილმა.

ებრალიძის ეს გადაწყვეტილება სიურპრიზი აღმოჩნდა ლანჩხუთის გამგებლისთვის, ზაზა ურუშაძისთვის, რომელიც, ამავდროულად, საფეხბურთო კლუბ „გურიას“ პრეზიდენტია:

_ ეს დიდი სიურპრიზი იყო ჩემთვის. არავინ არაფერი იცოდა _ არც მე, არც ჩოხატაურში და არც ლანჩხუთში. არ ვიცი, რატომ მოიქცა ასე, _ გვითხრა ურუშაძემ, რომელიც გავრცელებული ინფორმაციით, მერაბ ჟორდანიას კანდიდატურას უჭერდა მხარს, რომელსაც, თავის მხრივ, ღია მხარდაჭერას ლანჩხუთის მაჟორიტარი დეპუტატიც უცხადებდა.

გურიის ფედერაციის პრეზიდენტი კახა ებრალიძე ამბობს, რომ მას ამის უფლება კანონით ჰქონდა და ამაში გასაკვირი არაფერია:

_ პირადად წარვადგინე რევაზ არველაძე და მქონდა ამის სრული, კანონიერი უფლება.

_ ბატონო კახა, ეს გადაწყვეტილება რატომ არ შეათანხმეთ გამგეობის წევრებთან?

_ ეს არ არის გამგეობის პრეროგატივა. 5-6 წლის განმავლობაში რაც არჩევნები გამართულა, დელეგატები გამგეობის წევრებთან შეთანხმების გარეშე წარმიდგენია, რადგან წესდებიდან გამომდინარე, მაქვს უფლება, არ ვკითხო გამგეობას. მათი გადასაწყვეტი რაც იყო, ვუთანხმებდი. ადრე არ გასჩენიათ პრეტენზია და  დღეს  რატომ აქვთ?!, _ აღნიშნა ებრალიძემ.

ებრალიძე ამბობს, რომ ჟორდანიას, ამ გადაწყვეტილების გამო, ბოდიში მოუხადა:

_ 17 აგვისტოს, ფედერაციაში მესტუმრა მერაბ ჟორდანია. ცოტა ხნით ვისაუბრეთ, მისი გეგმები გამაცნო. რამდენიმე დღეში ისევ შევხდი და ბოდიში მოვუხადე, რადგან მის წარდგენას ვერ ვახერხებდი.

_ ჟორდანიამ გთხოვათ, რომ მისი კანდიდატურა წარგედგინათ?

_ ასე კონკრეტული თხოვნა არ ყოფილა, თუმცა, საუბრიდან გამომდინარე, ჩავთვალე, რომ უნდა შევხვედროდი და სიტუაცია ამეხსნა. კიდევ ერთხელ დავაფიქსირებ, რომ მერაბ ჟორდანის დიდ პატივს ვცემ _ ღვაწლმოსილი პიროვნებაა, როგორც ქართული ფეხბურთის, ასევე, ლანჩხუთის გურიისთვის. რაც შეეხება რევაზ არველაძის წარდგენას _ მე ჩემი შეხედულებები მაქვს და მქონდა ამის უფლება .

_ ლანჩხუთის გამგებელი, საფეხბურთო კლუბ „გურიას“ პრეზიდენტი ზაზა ურუშაძე ამბობს, რომ დიდი სიურპრიზი მოუწყვეთ…

_ ზაზა ურუშაძე კლუბის პრეზიდენტი და გამგებელია. მე რეგიონული ფედერაციის ხელმძღვანელი ვარ. მისთვის უნდა მეკითხა? რატომ უნდა მეკითხა? _ ახლა, როგორც კლუბის პრეზიდენტს ისე მივმართავ ზაზა ურუშაძეს _ დააფიქსიროს თავისი აზრი, ვის უჭერს მხარს და გამოხატოს პოზიცია _ ეს მისი უფლებაა. მე უკვე დავაფიქსირე ჩემი პოზიცია. ისე კი ვერ გავიგე,  მე, კახა ებრალიძემ ვინ წარვადგინო კანდიდატად ლანჩხუთის „გურიას“ პრეზიდენტს უნდა ვკითხო? _ ეს ძალიან გასაკვირია და ვერ ვხდები, რას ეძახის სიურპრიზს.

ებრალიძე ამბობს, რომ მის გადაწყვეტილებაში ხელისუფლება, ჯერჯერობით, არ ჩარეულა:

_  ჯერჯერობით, არანაირი ჩარევა არ ყოფილა და თუ მოხდება, აუცილებლად გაგაგებინებთ. ვერ წარმომიდგენია რატომ უნდა იყოს?! ხომ ხედავთ, რა დაფიქსირდა _  დეპუტატმა თემურ ჩხაიძემ ღიად დააფიქსირა, რომ მხარს უჭერს ჟორდანიას, მე წარვადგინე რევაზ არველაძე, ზაზა ურუშაძე საერთოდ ვერ ხვდება, სიურპრიზი გონია და ალბათ, მისი პოზიცია აქვს. კარგია აზრთა სხვადასხვაობა და ამიტომ ვერ წარმომიდგენია, რატომ უნდა მოხდეს ჩარევა და ვინმემ ვინმეს პრობლემები რატომ უნდა შეუქმნას.

_ ბატონო კახა, რევაზ არველაძის კანდიდატურის წარდგენით ხომ არ აპირებთ, რომ მომავალშიც იბრძოლოთ გურიის ფედერაციის პრეზიდენტობისთვის?

_  ნამდვილად არ ვფიქრობ. 2017 წლამდე მაქვს ვადა. არ ვფიქრობ, ვინ გაიმარჯვებს ყველა ღირსეული კანდიდატურაა. ჩემი აზრით, არა აქვს დიდი მნიშვნელობა, მე ვინ წარვადგინე, მნიშვნელოვანი ისაა, რომ ღირსეული კანდიდატები არიან წარდგენილნი და საფეხბურთო საზოგადოება მიიღებს ღირსეულ გადაწყვეტილებას.

აღსანიშნავია, რომ გრფფ-ის თავკაცს, რამდენიმე დღის წინ ამ გადაწყვეტილების გამო ლანჩხუთელი ვეტერანები დაუპირისპირდნენ და სთხოვდნენ, რომ გამოენახა გზები, რომ ლანჩხუთი სირცხვილს აცდენილიყო:

_ უბრალოდ, ყველა შევრცხვებით, როცა მერაბ ჟორდანიას არ წარვადგენთ ლანჩხუთიდან. არავინ გთხოვთ მხარდაჭერას, ვისაც გინდათ, მიეცით ხმა, ოღონდ წარადგინეთ ჟორდანია, _ ეს განცხადება ვეტერანებმა ებრალიძესთან შეხვედრისას გააკეთეს, თუმცა, როგორც ფაქტებმა ცხადყო ლანჩხუთი "ამ სირცხვილს ვერ ასცდა".