ერთიანი ეროვნული გამოცდების საბოლოო შედეგების გამოცხადების შემდეგ გაირკვა, რომ წელს 28 053 აბიტურიენტი სტუდენტი გახდა, თუმცა 18 ათასი ადგილი უნივერსიტეტებში ისევ თავისუფალია. მაღალქულიანი აბიტურიენტების ნაწილი კი, უნივერსიტეტებში ვერ ჩაირიცხა, რის გამოც ისინი მეორადი ჩარიცხვების დაშვებას ითხოვენ.
"გურია ნიუსს" "ჩაჭრილი" აბიტურიენტების ნაწილი დაუკავშირდა, რომლებმაც აღნიშნეს, რომ მეორადი ჩარიცხვების დაუშვებლობის შემთხვევაში ისინი აქციების გამართვას აპირებენ.
"წელს ძალიან ბევრი მაღალქულიანი აბიტურიენტი დარჩა უნივერსიტეტს გარეთ, ხოლო თავისუფალი კი 18 000 ადგილია, არიან ბავშვები რომლებმაც 50% ზე მეტი ქულების რაოდენობა დააგროვეს და მაინც ვერსად ვერ მოხვდნენ. ძალიან გთხოვთ უბრალოდ ერთი პოსტო დაწერეთ, რომ დაუშვან მეორადი ჩარიცხვა. თორემ, ალბათ, ძალიან ცუდი შედეგით დამთავრდება ეს ყველაფერი. ბავშვები აქციების გამართვას გეგმავენ, რადგან განათლების სამინისტრომ სრულიად უსაფუძვლოდ დატოვა ისინი გარეთ", _ აცხადებს "გურია ნიუსთან" საუბრისას ერთ-ერთი აბიტურიენტის მშობელი.
თუმცა, გამოცდების ეროვნულ ცენტრში აცხადებენ, რომ მეორადი ჩარიცხვების დაშვება გამორიცხულია.
როგორც "გურია ნიუსთან" საუბრისას ერთიანი ეროვნული გამოცდების ცენტრის ხელმძღვანელი მაია მიმინოშვილი განმარტავს, აბიტურიენტებს მაქსიმალური შესაძლებლობები ჰქონდათ უნივერსიტეტებში მოხვედრილიყვნენ.
შეგახსენებთ, რომ აბიტურიენტებს საკუთარ რეიტინგულ სიაში ცვლილებების ელექტრონულად შეტანის შესაძლებლობაც მისცეს, რომლის ვადაც 10 აგვისტოს ამოიწურა.
შეფასებისა და გამოცდების ეროვნული ცენტრი აპლიკანტებს ურჩევდა საგანმანათლებლო პროგრამის არჩევის დროს, უპირველეს ყოვლისა, საკუთარი სურვილით ეხელმძღვანელათ. ასევე ყურადღება მიექციათ უმაღლესი სასწავლებლის მიერ საგანმანათლებლო პროგრამაზე ჩასაბარებელი გამოცდისათვის მინიჭებულ კოეფიციენტსა და საგანთა პრიორიტეტისთვის. ცენტრი აფრთხილებდა აპლიკანტებს, რომ მეორადი ჩარიცხვები არ განხორციელდებოდა.
"რეგისტრაციიდან დაწყებული თვეების განმავლობაში ჰქონდათ ვადა, რომ მათთვის სასურველი უნივერსიტეტები, ფაკულტეტები შეუზღუდავი რაოდენობით მიეთითებინათ. მათ ესდ არ გააკეთეს მანამ, სანამ ჩარიცხვების პროცესი არ განხორციელდა. ხომ არ შეიძლება მთელი წლის განმავლობაში ამ პროცესში ვიყოთ ჩართულები. სამი წლის განმავლობაში ერთიდაიგივე კითხვას ვსვამ – ეს რატომ არ გააკეთეს? შარშანაც და შარშანწინაც ჩვენი ორგანიზაცია მეორადი ჩარიცხვების კატეგორიული წინააღმდეგი იყო. არიან აბიტურიენტები, რომლებიც სრულიად შეზღუდულ რაოდენობას უთითებენ უმაღლესი სასწავლებლების, ზოგს ერთი უმაღლესი სასწავლებელი აქვს მითითებული და ზუსტად იცის, რომ იქ უნდა სწავლა და არა სხვაგან. რატომ არ უნდა ვცეთ პატივი ასეთ აბიტურიენტებს?
როდესაც მთელი წლის განმავლობაში აბიტურიენტებს ვთხოვდით კარგად დაფიქრებულიყვნენ, რამდენჯერაც უნდოდათ შეეცვალათ და გადაეკეთებინათ ფაკულტეტები და სასწავლებლები, ჩვენ კი მზად ვიყავით მაქსიმალურად გაგვეთვალისწინებინა მათი სურვილები, რატომ ხდება ეს საკითხი აქტუალური პროცესის დასრულების შემდეგ? თუმცა, მათ სულაც არ გაითვალისწინეს ჩვენი თხოვნა. ახლა მოვიდა ჩემთან აბიტურიენტის მამიდა, რომელმაც მითხრა, რომ ჩემი ბრალია, მე არ ჩავაწერინე უმაღლესი სასწავლებელიო. შეიძლება ორგანიზაცია მთელი წლის განმავლობაში, 24 საათის განმავლობაში ჩარიცხვებით იყოს დაკავებული? იმის გულისთვის, რომ მამიდან ჩვენი თხოვნა არ გაითვალისწინა?! საერთოდაც, მომხრე ვარ იმის, რომ აბიტურიენტმა მიიღოს გადაწყვეტილება სად უნდა სწავლის გაგრძელება და არა მშობელმა, ბებია-ბაბუამ და მამიდამ", _ აღნიშნა მიმინოშვილმა და დასძინა, რომ ის მეორადი ჩარიცხვების კატეგორიულად წინააღმდეგია.
"გურია ნიუსი" განათლების და მეცნიერების სამინისტროსაც დაუკავშირდა, სადაც აღნიშნავენ, რომ მეორადი ჩარიცხვების საკითხი არ განიხილება.
შეგახსენებთ, რომ წელს 28 053 აბიტურიენტიდან 6555-მა სხვადასხვა პროცენტიანი სახელმწიფო დაფინანსება მოიპოვა.
ყველაზე მეტი ადგილები ივანე ჯავახიშვილის სახელობის სახელმწიფო უნივერსიტეტში შეივსო.
აგრარულ უნივერსიტეტში 420 ადგილი იყო და ყველა შევსებულია; თავისუფალ უნივერსიტეტში 453 ადგილიდან 2 დარჩა ვაკანტური; თბილისის სახელმწიფო უნივერსიტეტში არსებული 3881 ადგილიდან 225 ვაკანტური დარჩა; ილიას სახელმწიფო უნივერსიტეტში 2667 ადგილიდან 208 ვაკანტური ადგილი დარჩა.
