ქალაქ ოზურგეთის მუნიციპალიტეტის მერია რუსთაველის ქუჩის # 28 მდებარე ოლიმპიურ კომპლექსში დღეს, 5 საათზე შევიდა.
ოლიმპიური კომპლექსის შენობის გასაღები გურიის ოლიმპიური კომიტეტის პრეზიდენტს ლაშა ლომაძეს ჰქონდა, რის გამოც ქალაქ ოზურგეთის მერმა ბეგლარ სიორიძემ ლომაძის წინააღმდეგ შსს გურიის სამხარეო მთავარ სამმართველოს მიმართა.
ლომაძე პოზიციებს დღემდე არ თმობდა.
ბეგლარ სიორიძე "გურია ნიუსთან" ამბობს, რომ ოლიმპიურ კომპლექსში პოლიციის თანდასწრებით შევიდა:
"ჩვენ თავდაპირველად მივმართეთ პოლიციას განცხადებით, რადგან მოხდა უნებრათვოდ შეჭრა ჩვენს შენობაში, პოლიციას მივაწოდეთ ყველა დოკუმენტაცია, რომ ეს არის ქალაქის მერიის კუთვნილება. გარდა ამისა, დამატებით მივაწოდეთ ინფორმაცია, რომ სარემონტო სამუშაოებზე დახარჯული ყველა თეთრი გადახდილია ბიუჯეტიდან. არავის არაფერი არ მოუტანია. პოლიციამ ჩაატარა მოკვლევა ამ საკითხთან დაკავშირებით და დღეს პოლიციის თანდასწრებით გავხსენით კარები, დავათვალიერეთ რაიმე ზიანი ხომ არ აქვს მიყენებული შენობას, შევადგინეთ შესაბამისი ოქმი, ავიყვანეთ დაცვაზე და ხვალიდან გავაგრძელებთ იმ სამუშაოებს, რაც შესასრულებელია და დასამთავრებელი. გასაღებს კი ჩაიბარებს დაცვის პოლიცია.
რაც შეეხება იმას, თუ რას განათავსებს ქალაქ ოზურგეთის მერია ოლიმპიურ კომპლექსში, ბეგლარ სიორიძე გვპასუხობს, რომ განთავსდება ის, რასაც გადაწყვეტს ქალაქ ოზურგეთის მერია და საკრებულო."
გურიის ოლიმპიური კომიტეტის პრეზიდენტი ლაშა ლომაძე "გურია ნიუსთან" აღნიშნავს, რომ პოზიციების დათმობას ის კვლავ არ აპირებს:
"როცა ქალაქის პირველი პირი სპორტსმენებს პატივს არ სცემს, მათ აზრს არ ითვალისწინებს, ეს არის უკვე მისი პრობლემა. როცა ქალაქის მერი თავისი პირადი მიზნებისთვის რაღაცას აკეთებს, ის შეიძლება დღეს შიგნით შევიდეს, მაგრამ ხვალ და ზეგ აუცილებლად სპორტი და სპორტსმენები შევლენ მაგ შენობაში, მე ამის პასუხისმგებლობას ვიღებ, ამას ვპირდები მთელ გურიას და მოსახლეობას"_ ამბობს ლომაძე და სამომავლო გეგმებზეც აკეთებს კომენტარს:
"ჩვენ მივმართავთ ყველანაირ ზომებს კანონის ფარგლებში. სრული მხარდაჭერა გვაქვს ყველ მხრიდან, საქართველოს სპორტული საზოგადოება ჩვენს გვერდით დგას. რამდენიმე წუთში თბილისში ვიქნები, აქ მაქვს შეხვედრა, და რამდენიმე დღეში ჩვენი პოზიცია გახდება ცხადი"–განაცხადა ლომაძემ.
