გასულ ხუთშაბათს ლანჩხუთის საკრებულოს მორიგი სხდომა გაიმართა, რომელსაც საკრებულოს თავმჯდომარის მოადგილე გელა კილაძე უძღვებოდა. სხდომას კი მოქმედი 31 დეპუტატიდან 26 ესწრებოდა.
საკრებულოს "სამანდატო, საპროცედურო, იურიდიულ საკითხთა და ეთიკის" კომისიის თავმჯდომარემ, რომან ბიწაძემ პირველ საკითხად ჟორდანიას #136გ-ს მიმდებარედ არსებული ობიექტისთვის ნომრის მინიჭების შესახებ განკარგულება წარმოადგინა, რასაც თავშივე მოჰყვა საკრებულოს წევრის, გია გოგუაძის კომენტარი – ეს საკითხი ინფრასტრუქტურის სამსახურის უფროსმა ლევან ჩხაიძემ უნდა გამოიტანოს წესით, რა შუაშია აქ ეთიკის კომისიაო. თავის მხრივ ბიწაძემაც მოიბოდიშა და პირობა დადო, რომ ეს ბოლო შემთხვევაა, ამის შემდეგ მსგავს საკითხს შესაბამისი კომისია წარმოადგენსო.
რახან საკითხი ქალაქის ცენტრში მიწის გასხვისებას ეხებოდა, დეპუტატები დაინტერესდნენ, თუ როგორ მოხდა ტერიტორიის გაყიდვა. როგორც მუნიციპალიტეტის გამგებლის ზაზა ურუშაძის პასუხიდან გაირკვა, აღნიშნულ მონაკვეთზე მუნიციპალიტეტის ბალანსზე 300 კვ.მ მიწის ფართია და აღნიშნული მონაკვეთის გაყიდვაზე მუნიციპალიტეტს ნებართვა არ გაუცია.
დეპუტატი გოგუაძე მუნიციპალიტეტში მიწის ბანკის შექმნის იდეით გამოვიდა: -"უმჯობესია შეიქმნას მიწის ბანკი, რომ სრული წარმოდგენა გვქონდეს, თუ რა ქონება გაგვაჩნია მუნიციპალიტეტს. ასეთი ტიპის ტერიტორიების ჩვენს ბალანსზე გადმოცემა შესაძლებელია. ბიუჯეტში 1,5 მილიონია გარღვევა, ამიტომაც ასეთი ტერიტორიების აზომვითი ნახაზები უნდა შევქმნათ, რომ მომავალში შემოსავლის რეალური წყარო გვქონდეს. დღეს მიწა ეკონომიკის სამინისტრომ გაყიდა და შესაბამისად თანხაც ცენტრალურ ბიუჯეტში წავიდა. ჩვენს ბალანსზე რომ ყოფილიყო, ასე არ მოხდებოდა. არასასოფლო დანიშნულების მიწები მუნიციპალიტეტმა უნდა განკარგოს".
გამგებლის, ზაზა ურუშაძის თქმით კი, არანაირი მიწა არ გაყიდულა, რაზეც გაოცება ვერ დამალა რომან ბიწაძემ – "აგერ ბატონო, დოკუმენტი! ვინმე კვიტაიშვილია მისი მფლობელი და ნომრის მინიჭებას ითხოვს" და ბიწაძემ მის ხელთ არსებული დოკუმენტები ააფრიალა.
საკითხმა სიტყვიერი დაპირისპირება გამოიწვია ურუშაძესა და ბიწაძეს შორის.
ამის შედგეგ რომან ბიწაძემ საკრებულოს რეგლამენტში შესატან ცვლილებებზე ისაუბრა. დეპუტატებში უკმაყოფილება და კამათი გამოიწვია შესყიდვების გეგმის დამტკიცებამ, რომლის მიხედვითაც მთავრობის გადაწყვეტილებით, შესყიდვების გეგმის დამტკიცების უფლება უშუალოდ გამგებლის მოვალეობაა და საკრებულო მხოლოდ გამგებლის წარდგინებით ისმენს შესყიდვების გეგმის შესაბამისად წინა წელს შესრულებული შესყიდვების შესახებ ანგარიშს.
კანონში ამ ცვლილების გატარება საკრებულოს წევრის, კახა ასკურავას მოსაზრებით, საკრებულოს როლის დაკნინების ტოლფასია.
"თუ ადრე გამგებელი საკრებულოს თავმჯდომარის ნებართვის გარეშე სამსახურიდან ვერ ათავისუფლებდა თანამშრომელს, ასევე იყო ა(ა)იპ-ების შემთხვევაშიც, ახლა თანდათან საკრებულოს უფლებამოსილება იზღუდება. შესყიდვებთან დაკავშირებით მოხდა ის, რომ გამგებლემბა პრემიერს შესჩივლეს, იმიტომ ვერ ვითვისებთ თანხებს ბოლომდე, რომ საკრებულო დროულად არ გვიმტკიცებსო და პრემიერმაც მიიიღო ეს გადაწყვეტილება" – განაცხადა ასკურავამ.
უმრავლესობის წევრმა ია ჩხაიძემ ასკურავას მისამართით რეპლიკა ისროლა- გამგებელი პირდაპირი წესითაა არჩეული, მისი ლეგიტიმაცია მაღალია და მეტი უფლებები თუ ექნება, ოპოზიციას ეს უნდა უხაროდეს, რადგან ჩასაფრებულის პოზიციაში ხართო.
ჩხაიძის ეს რეპლიკა არც ასკურავას დაუტოვებია კომენტარის გარეშე- გამგებელს აქვს უდიდესი პასუხისმგებლობა და კარგად დაიმახსოვრეთ ეს დღე, სექტემბრის ბოლოს გამოგადგებათო.
გარდა რეგლამენტისა, დეპუტატებმა აქტიურად იმსჯელეს სადეპუტატო უფლებამოსილების თანხებზეც. კოდექსში შესული ცვლილებების თანახმად, აღნიშნული თანხა არ უნდა აღემატებოდეს საკრებულოს თავმჯდომარის ანაზღაურების 15%-ს.
დეპუტატ ნონა მურვანიძის აზრით, ის, რაც დღეს საკრებულოზეა წარმოდგენილი, მთავრობას უკვე დამტკიცებული აქვს და ამიტომაც მას კი არ უნდა განვიხილავდეთ, არამედ ცნობად ვიღებდეთო.
"ორი კვირის წინ ვანის საკრებულოს დეპუტატმა დამირეკა და მკითხა, თუ მქონდა ინფორმაცია სადეპუტატო უფლებამოსილების თანხის ცვლილებასთან დაკავშირებით და რას ვაპირებდით. მე კი პირველად მისგან მესმოდა, რა უნდა მეთქვა?! სად იყო და რას აკეთებდა ჩვენი დეპუტატი?! თუკი თვეების მანძილზე ამაზე მიდიოდა მსჯელობა, ნუთუ ჩვენ ელემენტარულად საქმის კურსში არ უნდა ჩავეყენებინეთ?! უმრავლესობას ხელის აწევა ისედაც არ ეზარებოდა, ახლა კი მორჩილ უმრავლესობას ესეც აღარ დასჭირდება და ეს ახარებთ" – დასძინა მურვანიძემ.
"ხელისუფლება, რომელიც საკუთარ ამომრჩეველს პატივს არ სცემს, უნდა წავიდეს. ვისაც ჩემი მოსმენა არ სიამოვნებს, შეუძლია დარბაზი დატოვოს, მე ჩემს სათქმელს ყოველთვის ვიტყვი. წინა საკრებულოს წევრმა დავით წულაძემ თქვა, თვითმმართველობას "ვენოკის" როლი აკისრიაო. ახლა გამოდის მიცვალებულიც აღარ გვყავს, ეს "ვენოკი" რომ დასჭირდეს" -ამგვარად დააფიქსირა საკუთარი პოზიცია საკითხთან დაკავშირებით დეპუტატმა დარეჯან ბურჭულაძემ.
სადეპუტატო უფლებამოსილებისთვის თანხის შემცირების გადაწყვეტილება არც უმრავლესობის წევრს, შუხუთის თემის მაჟორიტარს აკაკი იმნაიშვილს მოეწონა: "მე ამ თანხას ჩემივე ამომრჩევლისთვის ვიყენებდი. სოფლის ცენტრისა და სასაფლაოს დასასუფთავებლად აქედან ვიხდიდი საფასურს, ახლა რა უნდა ვქნა?!"
თავის მხრივ აღნიშნულ ცვლილებებას წინგადადგმული ნაბიჯი უწოდა ასკურავამ, თუმცა შენიშვნების გაკეთება მაინც არ გამორჩენია.
"ძალიან კარგად მქონდა გაცნობიერებული, როცა საკრებულოში მოვდიოდი, რომ არც უმრავლესობაში ვიქნებოდი და არც ხელფასი მექნებოდა. მაგრამ, თუ პარლამენტმა მოიფიქრა და კანონის სახე მისცა სადეპუტატო უფლებამოსილებისთვის თანხის დაწესებას, ხომ შეიძლებოდა წინდაწინ ჩვენთვისაც ეცნობებინა, რაც უპირველესად მაჟორიტარის თემურ ჩხაიძის მოვალეობაა.
ბევრი ჩემი კოლეგა უფრო მეტ საქმეს აკეთებს, ვიდრე ის პარლამენტარები, ხელფასს მარტო ხელის აწევა-დაწევაში რომ იღებენ. დღეს საკრებულო უხერხულ მდგომარეობაში აღმოჩნდა. ფაქტია, პატრლამენტარის ხელფასი უფრო ნაკლებია, ვიდრე მისი ხარჯებისთვის გამოყოფილი თანხა. რაღა საკრებულოს თავმჯდომარის ხელფასიდან ამოვიდნენ, საკუთარი ხარჯების 15% გამოეყოთ საკრებულოს წევრებისთვის. დღეს ჩემი პარტიის წარმომადგენელი რომ იყოს მაჟორიტარი, მსგავსი პასიურობისთვის მეტად გავაკრიტიკებდი. ჩემს მარჯვნივ მსხდომ ადამიანებს საკმაოდ დიდი წვლილი აქვთ შეტანილი ჩხაძის გამარჯვებაში და იქნებ მათვისაც ეკითხა რამე. მოკლედ, ყველა უფლება ჩამოგვართვეს, ერთ დღესაც მოვალთ და ერთმანეთს ხელს ჩამოვართმევთ, კარგ გამარჯობას ვეტყვით და და მერე რესტორანში წავალთ საქეიფოდ, სულ ეს იქნება ჩვენი საკრებულო"– განაცხადა ასკურავამ.
მიუხედავად მწვავე მსჯელობისა, უმრავლესობის გადაწყვეტილებით საკითხი გავიდა.
