თანამედროვე მსოფლიო ისტორიაში დაფარული თემები ნაკლებად მოიძებნება, მაგრამ ზოგჯერ ისეთ ინფორმაციებსაც ვაწყდებით რომელიც დიდ გაკვირვებას იწვევს. ნება მომეცით ერთი მათგანი გავიხსენო, რომელიც მკითხველისთვის ალბათ საინტერესო იქნება.
ბევრმა არ იცის, რომ სულ რაღაც ოცდაათი წლის წინ, ამერიკელი მწერალი მარგარეტ მიჩელის ცნობილი წიგნი "ქარწაღებულნის" ახალი ვერსია უნდა გადაეღოთ და ეს ყველაფერი იმდროინდელ საქართველოში უნდა განხორციელებულიყო. ადამიანი კი ვისაც მარგარეტ მიჩელის რომანის ხელახალი ეკრანიზაცია სურდა, გამოჩენილი იტალიელი კინორეჟისორი სერჯო ლეონე იყო.
სერჯო ლეონემ წინა საუკუნის სამოციან წლებში გაითქვა სახელი, როგორც საუკეთესო ვესტერნების შემქმნელმა. თავის დროზე მისმა "ვესტერნ-სპაგეტებმა" თვით ჰოლივუდში ველური დასავლეთის შესახებ შექმნილ კინოპროდუქციას აჯობა. ფილმებმა "კარგი, ცუდი, ავი", "სადღაც დასავლეთში", "რამდენიმე დოლარით მეტი" რეჟისორს საქვეყნო აღიარება მოუტანა, ხოლო მის მიერ აღმოჩენილი მსახიობი კლინტ ისტვუდი აშშ-ის ერთ-ერთ უპირველეს კინოვარსკვლავად აღიარეს. აღსანიშნავია სერჯო ლეონეს მიერ შექმნილი სურათი "ერთხელ ამერიკაში", სადაც ებრაელთა განგსტერული სინდიკატის ისტორიის ფონზე რთული მორალურ-ეთიკური პრობლემებია წამოჭრილი.
წინა საუკუნის 70-იან წლებში ცნობილი გახდა, რომ სერჯო ლეონე თურმე "ქარწაღებულნის" ხელმეორე ეკრანიზაციაზე ოცნებობდა. იმ პერიოდში მან იტალიურ გაზეთ "ჯენტეს" ინტერვიუ მისცა და მარგარეტ მიჩელის ნაწარმოების მომავალ ეკრანიზაციაზე ისაუბრა:
"მე არ მსურს გავიმეორო ორიგინალის ბანალობა. ახლა რამდენიმე ათწლეულის შემდეგ, მრავალ ნაკლს ვამჩნევ: მოძველდა დიალოგები, ზოგიერთი ეპიზოდი საერთოდ გაუგებარია. რაც შეეხება "გარეთა სცენებს", ისინი პავილიონებშია შესრულებული, თაბაშირისა და მუყაოს საშინელი დეკორაციების ფონზე. ჩემი ფილმი განსხვავებული იქნება. ვმუშაობ ახალ სცენარზე. გადავიღებთ საქართველოში და ალბათ რამდენიმე ეპიზოდს იუგოსლავიაში. საქართველოს ბუნება ძალიან წააგავს შეერთებული შტატების სამხრეთს. ამჟამად მიმდინარეობს მოლაპარაკებები და მათი წარმატებით დასრულების შემთხვევაში საქართველოში პირადად გავფრინდები."
სერჯო ლეონეს მომავალი ფილმისათვის მსახიობებიც შერჩეული ჰყოლია. " არ მინდა, რომ მთავარი როლები ვარსკვლავებმა შეასრულონ. შევარჩიე ნიჭიერი, მაგრამ შედარებით უცნობი მსახიობები. ისეთი მსახიობები კი, როგორებიც რობერტ დე ნირო და მარლონ ბრანდო არიან, მეორეხარისხოვან როლებს შეასრულებენ. ამერიკელები აღფრთოვანებულები არიან ჩემი გეგმებით, მაგრამ ჯერჯერობით ვერაფრით შევძელი გადაღებაზე საავტორო უფლების მოპოვება მწერლის მემკვიდრეებისაგან, რომლებსაც გამოცდილი იურისტების მთელი ჯგუფი ახვევიათ თავს. თითქმის ხმლით მიხდება ცალკეული სიუჟეტის, გმირის, მოქმედების, ადგილმდებარეობის დაცვა. სწორედ ამ იურიდიულ დაბრკოლებებს შეუძლიათ შეაფერხონ ფილმის გადაღება, ფილმისა, რომლის შექმნაზე მთელი ცხოვრება ვოცნებობ".
სამწუხაროდ სერჯო ლეონემ თავისი ოცნება ვერ განახორციელა და "ქარწაღებულნის" ახალი ვერსია ვერ გადაიღო. ამით უპირველეს ყოვლისა, ყველა დარჩა დაზარალებული, განსაკუთრებით კი მაინც ქართველები, ფილმის დიდი ნაწილი ხომ ჩვენში უნდა გადაეღოთ.
იმ დროს გაგანია კომუნისტური რეჟიმი ჰყვაოდა და საქართველოსაც საკუთარი თავის მსოფლიოსათვის გაცნობა ძალიან უჭირდა. ცნობილი კინორეჟისორისა და მრავალი ამერიკელი ვარსკვლავის ჩვენს ქვეყანაში ჩამოსვლა და მუშაობა კი ამ ვაკუუმს ალბათ ნაწილობრივ შეავსებდა.
