არასამთვრობო ორგანიზაციის "ქალები რეგიონის განვითარებისთვის" თავმჯდომარემ ქეთევან ხიდაშელმა, ოზურგეთის დემოკრატიული ჩართულობის ცენტრში მედიის წარმომადგენლებისთვის პრესკონფერენცია გამართა.
მისი განცხადებით, მას სასულიერო პირი დაემუქრა.
"საუბარს შორიდან დავიწყებ. ერთი ქალბატონი ცხოვრობს სოფელ ბოხვაურში ("გურია ნიუსი" მისი სახელისა და გვარის გამოქვეყნებისგან თავს იკავებს, რადგან მას ფსიქიური პრობლემები აქვს). სამი წლის განმავლობაში ვეხმარებით მას, როგორც შეგვიძლია. მასზე ორი ფილმიც არის გადაღებული ახალგაზრდა მოხალისეების მიერ. რადგან მასთან გვაქვს დიდი ხნის ურთიერთობა, ეს ქალბატონო გვენდობა. 2015 წლის მაისში მოვიდა ეს ადამიანი ჩემთან სახლში და მთხოვა თანხა შემენახა მისთვის. როდესაც დავთვალეთ, იყო 1040 ლარი. ჯერ მჩუქნიდა, რაზეც ჩემგან უარი მიიღო. შემდეგ კი მითხრა, ეს თანხა შემენახა, ჩემი დასამარხი ფულიაო. ასევე მითხრა, ისიც, რომ არავის ენდობოდა და ამიტომ მოვიდა ჩემთან.
სახლში ფულის გადმოცემის დროს იყო ჩემი ოჯახის წევრები. მას შიში ჰქონდა, რომ ამ ფულს მოპარავდნენ და მ გადაწყვეტილება მივიღე, თანხა შემენახა. მეორე დღეს მივედი მამა შალვასთან, რადგან ყველაზე მეტად ვენდობოდი მას და ვუთხარი ამის შესახებ, ასევე ეს ამბავი მოვუყევი იურისტს, ქეთი ხუხიას და ჩემს მეზობელს, ირაკლი საბაშვილს, მხოლოდ ამ ადამიანებმა იცოდნენ. ეს ქალბატონი ამ ამბავის შემდეგაც მოდიოდა ჩემთან სახლში, რამდენჯერ სახლში მიგვიყვანია ღამითაც.
ეს ფული ახლაც ჩემთან ინახება. 28 აგვისტოს მირეკავს ჩემთვის უცნობი ქალბატონი, არც მახსოვს სახელი და გვარი და ჩემთან შეხვედრას ითხოვდა. თქვენთან სალაპარაკო მაქვსო, მისი ხმის ტონი არ მომეწონა და ვუთხარი, რასთან დაკავშირებით უნდოდა ჩემი ნახვა, რაზეც მიპასუხა , რომ ეს ზემოთ მოხსენებულ ამბავს უკავშირდებოდა. დილით დავუკავშირდი მოძღვარს, რომელმაც მითხრა, ჩამოსული იყო ამ ქალბატონის რძალი, მას გავანდე ეს ინფორმაცია და მითხრა, ეს ფული მიმეცა მისთვის. მამა შალვას ვუთხარი, რომ მესამე პირს ვერ მივცემდი ამ თანხას, მომაბარა ქალბატონმა და საჭიროების შემთხვევაში უნდა დამებრუნებინა მისთვის.
შევთავაზე, თუ ასეთი ახლობელია, პოლიცია გამოვიძახოთ და მათი თანდასწრებით გადავცმ ფულს მეთქი, თუ ეს ქალბატონიც თანახმა იქნებოდა. ამას იმის გამო ვაკეთებ, რომ ხვალ ან ზეგ ვინმე არ მომივარდეს სახლში და ეს თანხა არ მომთხოვოს. მამა შალვას ასევე ვუთხარი, რატომ გაცა ეს ინფორმაცია და სწორედ მაგ დროს წამოვიდა მისგან აგრესია, მთელს სოფელს აგიმხედრებ და ვიტყვი, რომ შენ ამ თანხის მითვისება გინდაო. პროკურატურას გადაგცემ და ამ სოფელში ვეღარ იმუშავებო, სულ ფეხებზე მკიდია თქვენი არასამთავრობოო…
ძალიან გამიკვირდა მისგან ასეთი რეაქცია, რადგან კიდევ ერთხელ ვამბობ, მას სოფელში ყველაზე მეტად ვენდობოდი. შევყევი პოლემიკაში. მე რომ ფულის მითვისება მდომებოდა, მაშინ არავის ჩავაყენებდი საქმის კურსში, ჩემი პრესტიჟი და ჩემი დღევანდელი სტატუსი ყველაფერს მირჩევნია, იმიტომ, რომ შრომით მაქვს მიღწეული. არავის მივცემ უფლებას, ჩემი რეპუტაცია ფეხ-ქვეშ გათელოს. მე განცხადებით მივმართე სამართალდამცავებს. მტყუან-მართალი მათ გაარკვიონ. არანაირი კანონდარღევა არ ჩამიდენია". – თქვა პრესკონფერენციის დროს ქეთევან ხიდაშელმა.
დვაბზუს წმ. გიორგის ეკლესიის წინამძღვარი "გურია ნიუსთან" საუბრის დროს ამბობს, რომ ის ამ საკითხთან დაკავშირებით კომენტარს არ გააკეთებს.
" მე არავის საიდუმლოება არ გამიცია. ეს საკითხი მედიაში განსახილველი არ არის." – გვითხრა წმ. გიორგის ეკლესიის წინამძღვარმა.
ჩვენ დავუკავშირდი ზემოთაღნიშნული ქალბატონის რძალს, რომელიც ქეთევან ხიდაშელთან იმყოფებოდა და ფულის გადაცემა თხოვა.
"ათ დღეზე მეტია, ვარ ჩემი მეუღლის ოჯახში, სადაც ცხოვრობს ჩემი დედამთილი. დედამთილის ძმისშვილისშვილი დიმა დამიკავშირდა და მითხრა, რომ უნდა მენახა ქალბატონი ქეთევან ხიდაშელი, დედამთილს ჰქონდა მასთან გარკვეული თანხა დატოვებული. ეს თანხა უნდა გადმოეცა ჩემთვის. 29 აგვისტოს, დილის 11 საათისთვის დავუკავშირდი ქალბატონ ქეთევანს და შევთანხმდით, ის უნდა მენახა მის ოფისში. მივაკითხე მას, წარვუდგინე თავი და ვუთხარი, რომ თანხის წასაღებად ვიყავი მისული. მან თანხის გადმოცემაზე უარი მითხრა და განაცხადა, რომ თანხას გადმოგვცემდა დედამთილის გარდაცვალების შემდეგ. მან ასევე მოგვაყენა შეურაცხყოფა, რომ ვითომ ჩემ დედამთილს არ ვუვლიდი. თვითონ ქალბატონმა ქეთევანმა კარგად იცის, რა პრობლემებიც აქვს ჩემს დედამთილს.
მან ასევე მითხრა, რომ თანხას ნოტარიუსის და პოლიციის თანდასწრებით გადმოცემდა. რატომ არ გაუჩნდა სურვილი ქალბატონ ქეთევანს, როდესაც თანხას იღებდა ჩემი დედამთილისგან, ნოტარიუსი მოეყვანა და ოფიციალურად გაეფორმებინა ამ თანხის მიღება? ჩვენ მოთმინებსაც აქვს საზღვარი, რას ვითხოვთ უკანონს? მედიაში არ ვაპირებ ჩემი დედამთილის ჯანმრთელობის შესახებ საუბარს.
მე მაქვს ინფორმაცია, როგორ მოხდა თანხა ქალბატონ ქეთევანთან. ჩემი დედამთილი ამ თანხით აპირებდა წმ.გიორგის ტაძრის წინამძღვრისთვის და სტიქაროსანისთვის, რომელიც არის ჩემი დედამთილის ძმის შვილიშვილი და მსახურობს ამ ტაძარში, სამოსელის ყიდვას. ტაძრის წინამძღვარმა ამ შეთავაზებაზე უარი განაცხადა.
რამდენიმე ხნის შემდეგ ქალბატონი ქეთევანი მივიდა ტაძრის წინამძღვართან და უთხრა, რომ თანხა მიიღო ამ ქალბატონისგან და რჩევა თხოვა, როგორ მოქცეულიყო. მღვდელმა უთხრა, რომ ხანდაზმული ქალბატონის ძმის შვილისშვილის საშუალებით, რომელიც ამავე ეკლესიაში არის სტიქაროსანი, შეატყობინებდა მის რძალს ანუ მე, რომ ქალბატონ ქეთევანთან არის გარკვეული თანხა და მამაოს რჩევით, უნდა გადაეცა ოჯახისთვის. სტიქაროსანმა ჩემთან დაკავშირება იმიტომ გადაწყვიტა, რომ ჩემი დედამთილის შვილები საზღვაგარეთ არიან და ის ვერ ახერხებდა მათთან დაკავშირებას. 25 წელია ამ ოჯახის რძალი ვარ და ეს ქალბატონი კი ჩემი დედამთილია.
მინდა გითხრათ, რომ ჩემს დედამთილს ნადვილად ჰყავს პატრონი და ის არ საჭიროებს არავის დახმარებას. მას აქვს ფსიქიკური პრობლემები და მასთან ხშირად ჩამოვდივარ. ქალბატონ ქეთევანის თქმით, თურმე ჩემი დედამთილი მიგდებული გვყავს და არავინ პატრონობს, რაც სიცრუეა.
ჩემს დედამთილზე ყოფილა ფილმი გადაღებული, რაც ახლახან შემთხვევით გავიგეთ სოციალური ქსელიდან. მაინტერესებს, ქონდა თუ არა მას უფლება, მისი ოჯახის წევრების თანხმობის გარეშე, ავადმყოფისთვის გადაეღო ფილმი? აქ არ ირღვევა ჩემი დედამთილის და მისი ოჯახის წევრების უფლებები? ამ საქმეს არ დავტოვებ უყურადღებოდ და მეც მივმართავ შესაბამის უწყებებს, რომ დადგინდეს სიმართლე."
