“რეაქციისა” და “იმედის კვირის” პროდიუსერები და ჟურნალისტები განცხადებას ავრცელებენ

"რეაქციისა" და "იმედის კვირის" პროდიუსერები და ჟურნალისტები ერთობლივ განცხადებას ავრცელებენ, რომელსაც "გურია ნიუსი" უცვლელად გთავაზობთ"

"გვინდა ჩვენი პოზიცია დავაფიქსიროთ ტელეკომპანია „იმედის“ გადაწყვეტილებაზე გადაცემების „რეაქციისა“ და „იმედის კვირის“ მოულოდნელ დახურვასთან დაკავშირებით. ჩვენთვის მიუღებელია ის განცხადება, რომელიც არხის ხელმძღვანელობამ გაავრცელა . საეჭვოა კომერციულ არხს ისეთი მაღალრეიტინგული, პოპულარული და კომერციულად მომგებიანი გადაცემები როგორიცაა „ რეაქცია „ და „ იმედის კვირა“ საკუთარი ნებით შეეჩერებინა ახალი სატელევიზიო სეზონის დასაწყისში თან არჩევნებამდე 1 წლით ადრე.

მიუღებელია ის ფორმაც, რომლითაც არხის მენეჯმენტმა აღნიშნული გადაწყვეტილება გაახმოვანა, რადგან 29 აგვისტომდე არცერთი მინიშნება და შეტყობინება შემოქმედებითი ჯგუფების წევრებს არ მიუღიათ. ჩვენ დაგვაყენეს ფაქტის წინაშე.

აქედან გამომდინარე, ჩნდება საფუძვლიანი ეჭვი, რომ ეს არის პოლიტიკური გადაწყვეტილება. მით უფრო, რომ ბოლო პერიოდში ხშირად ისმოდა ხელისუფლების ზოგიერთი წარმომადგენლის უკმაყოფილო განცხადებები ამ გადაცემების მისამართით. იმედია, ტელევიზიის ხელმძღვანელობა საჯაროდ ახსნის გადაწყვეტილების რეალურ მიზეზს და მოტივს, თუ რა მოხდა სინამდვილეში და რის გამო მოხსნეს ეთერიდან არხის ყველაზე რეიტინგული ჟურნალისტი პოლიტიკური თოქ-შოუების წამყვანი ინგა გრიგოლია.

გვინდა გვჯეროდეს, რომ ტელეკომპანია „იმედი“ არ დარჩება პოლიტიკურ- საზოგადოებრივი თოქ-შოუების გარეშე და ჟურნალისტებს მიეცემათ თავისუფალი მუშაობის საშუალება", _ აღნიშნულია განცხადებაში.

შეგახსენებთ, რომ ტელეკომპანია "იმედმა" საზოგადოებრივ პოლიტიკურ თოქშოუების შეწყვეტის შესახებ საზოგადოებას და ჟურნალისტებს განცხადებით ამცნო:

"საშემოდგომო სატელევიზიო სეზონზე ტელეკომპანია იმედი დროებით აჩერებს საზოგადოებრივ-პოლიტიკური თოქშოუების სეგმენტს.

ამის მიზეზია ჩვენი სურვილი, შევცვალოთ არსებული გადაცემების ფორმატი  და შევიმუშაოთ თვისობრივად ახალი სატელევიზიო პროდუქტი, რომელსაც შევთავაზებთ მაყურებელს 2016 წლიდან.

ამავე განცხადებაში დიდი მადლობა გვინდა გადავუხადოთ გადაცემების გუნდის წევრებს, რომელთაგან თითოეულს დიდი წვლილი აქვს შეტანილი იმედის საზოგადოებრივ-პოლიტიკური თოქშოუების შექმნაში", _ აღნიშნულია განცხადებაში.

ტელეკპანიის ამ გადაწყვეტილებაში პოლიტიკურ მოტივს ხედავს  გადაცემების "რეაქციისა და "იმედის კვირის" წამყვანმა ინგა გრიგოლიამ:

_  "იმედი,, არის კერძო ტელევიზია და არხს აქვს სრული უფლება მიიღოს გადაწყვეტილება,რომელი გადაცემა სჭირდება და რომელი არა. ამიტომ, როგორც ჩვენში იტყვიან, ,,გაგებით ვეკიდები" მათ გადაწყვეტილებას, რომელიც ვითომ მათ მიიღეს და ვითომ სულაც არ იყო პოლიტიკური.

მე მაქვს სრული უფლება ვიფიქრო, რომ ესაა პოლიტიკური გადაწყვეტილებას, და აი რატომ _ არც ერთი კერძო ტელევიზია არ ხურავს გადაცემას,რომელსაც დიდი სარეკლამო შემოსავალი და ძალიან მაღალი ყურებადობა აქვს. მით უფრო, არ ხურავს ორ გადაცემას ერთდროულად, რომელსაც ძალიან მაღალი რეიტინგი აქვს. ეს ტელევიზიის წესია. ამიტომ, მე ვფიქრობ, რომ ესაა პოლიტიკური გადაწყვეტილება, რომ მე არ ვყოფილიყავი ეკრანზე არჩევნების წინ.

ვერ დავიჯერებ, რომ ეს გადაწყვეტილება თავში ტელევიზიის მენეჯმენტს მოუვიდა, რომლებიც ყოველი გადაცემის მერე აღფრთოვანებულები იყვნენ გადაცემის ყურებადობით. ვფიქრობ,რომ ,,იმედმა,, შეასრულა პოლიტიკური დავალება და თან შეასრულა ძალიან ცუდი ფორმით.

ერთ დღეს დახურა ორი თოქ-შოუ, რომელიც მე მიმყავდა. რომ გითხრათ დიდად მეწყინათქო, მოგატყუებთ, რადგან გადაცემების დახურვას შეჩვეული ვარ. ვნერვიულობ იმ გუნდზე და დამიანებზე, ვინც იმის გამო, რომ ინგა გრიგოლია მოაშორონ ეკრანს, შესაძლოა უმუშევრები დარჩნენ და ამიტომ  პირადად ვესაუბრე ტელევიზიის დირექტორს ამ თემაზე, რომ თუ სხვა გადაცემებს გააკეთებენ ძველის ნაცვლად, ეს ჩემი არაჩვეულებრივი თანამშრომლები იქ დატოვონ თავის პროდუსერებიან-ჟურნალისტებიან, ოპერატორებიანად, რადგან ყველაზე მაგარი პროფესიონალები არიან და ამ ჩემს მეგობართა გუნდსაც გულით ვთხოვე, დარჩნენ და აკეთონ თავისი საქმე.

კიდევ ერთი-გასაოცარი ისაა, რომ წინასწარ არც ერთი ფრაზით, არც ერთი შეტყობინებით არავის უთქვამს, რომ გადაცემებს მიხურავდნენ, რამაც გამოიწვია ჩემი გაოგნება. ჩამოვფრინდი ამერიკიდან 28-ში, სადაც დიდი შემართებით ვსაუბრობდი ჩემი გადაცემების უკიდეგანო თავისუფლებაზე და 29-ში ყოველგვარი გაფრთხილების გარეშე დამიხურეს გადაცემები.

რა თქმა უნდა, ესაა პოლიტიკური გადაწყვეტილება. რა თქმა უნდა კარგად მახსოვს ჩემს წინააღმდეგ გაკეთებული განცხადებები მმართველი გუნდის ზოგიერთი წარმომადგენლისგან და რა თქმა უნდა მე მჯერა, რომ დაავალეს ჩემი დახურვა და ,,იმედმაც,, მიიღო პოლიტიკური გადაწყვეტილება.

ასეთი ამბები ხდებოდა ყველა ხელისუფლების დროს ჩემს თავს და ასე მოხდა დღესაც. ესეც გაივლის. რამდენი მინახავს მოსული და წასული ხელისუფალი, რომელიც მედია პროექტებს ხურავდა…კიდევ რამდენს ვნახავ, _ აღნიშნავს ინგა გრიგოლია.