საქართველოს ადვოკატთა ასოციაციის თავმჯდომარე ზაზა ხატიაშვილი ტელეკომპანია "იმედის" მიერ გავრცელებულ განცხადებას ეხმაურება და ამას ქვეყანაში დიქტატურის დამყარების მცდელობას უკავშირებს.
"ძალიან აღმაშფოთა ორი რეიტინგული გადაცემის დახურვამ; ქვეყანაში, სადაც იხურება მსგავსი გადაცემები დიქტატურის დამყარების დაწყების მანიშნებელია. იმიტომ, რომ ეს არის ხელისუფლების მიერ დამოუკიდებელ მედიაზე პირდაპირი ზეწოლა. კერძო ტელეკომპანია "იმედი", რომელიც ახლო წარსულში პოლიტიკური დევნის მსხვერპლი იყო, მთავრობის ვიოლინოზე აცეკვებული ვიხილეთ. ტელეკომპანიამ ეჭვქვეშ დააყენა ჟურნალისტების პროფესიონალიზმი, სანდოობა და ავტორიტეტი.
რა კრიტერიუმებით შეიძლება შეაფასო ორი გადაცემის რეიტინგი, თუ არა მისი პოპულარობა და ავტორიტეტი, ტელეკომპანია გაემიჯნა თავის ჟურნალისტებს, თავისუფალ სიტყვას, პროფესიონალიზმს, ევროპულ სტანდარტებს და თანხმობა უთხრა დიქტატურას, სიბნელეს, ძალადობას და აგრესიას. რას უნდა ნიშნავდეს ეს? თუ არა ზეწოლა მოქალაქეებზე და დიდი ტერორი. საქართველოს მთავრობას და ყველაზე დიდ "მოქალაქეს „ მივმართავ: ცეცხლს ეთამაშებით. ინგა გრიგოლიას გადაცემას მთელი საქართველო ელოდება ყოველ პარასკევს იმ იმედით, რომ გაიგებს მიუკერძოებელ, სამართლიან და ობიექტურ ინფორმაციას. დამრჩა შთაბეჭდილება, რომ "ზემოთ" სწორედ პოლიტიკური გადაწყვეტილებებით ხდება ზეწოლა მედიაზე. დამოუკიდებელი მედია არის ქვეყნის თავისუფლების ლაკმუსი.
მივმართავ და ვაფრთხილებ ხელისუფლებას, თუ თქვენ შეეცდებით ხელი შეუშალოთ ჟურნალისტებს თავისუფლად განახორციელონ თავისი პროფესიული მოვალეობები და სამოქალაქო საზოგადოებას გადაუკეტავთ მიუკერძოებელი და თავისუფალი ინფორმაციის მიღების გზებს. ამის შესახებ გაიგებს მთელი ცივილიზებული სამყარო და მე პირადად ვიქნები ინიციატორი გადავდგა ქმედითი ნაბიჯები ამ მიმართულებით. ადვოკატთა ასოციაციის თავმჯდომარე დიდი ხანია ვაანონსებ ქვეყანაში ტერორს და დიქტატურას. რაც, პირველ რიგში, დაახშობს სიტყვის თავისუფლებას და მოკლავს მართლმსაჯულებას. ვერცერთი ხელისუფლება ვერ იარსებებს დამოუკიდებელი მედიის გარეშე. ჟურნალისტების მოვუწოდებ გაერთიანებისკენ, რათა არ დაუშვათ ქვეყანაში თავისუფალი სიტყვის და აზრის გამოხატვის აკრძალვა. თუ არ გაერთიანდებით, ხვალ თქვენს გადაცემას დახურავენ", _ აღნიშნავს ხატიაშვილი.
