“ნუ ცდილობთ ზეწოლა მოახდინოთ საქმეზე” _ რა ხდებოდა დღეს გუბერნატორის მოადგილის კაბინეტში (ვიდეო)

გურიის გუბერნატორის მოადგილის სოსო ერქომაიშვილის კაბინეტში გურიის ფეხბურთის ფედერაციის გამგეობის წევრები დრეს 4 საათის განმავლობაში იმყოფებოდნენ.  შეხვედრას სუს-ის თანამშრომელი ირაკლი ანდღულაძეც ესწრებოდა.

 ჩვენ კორესპონდენტებს შეხვედრაზე დასწრების საშუალება არ მისცეს.

 ჩვენი წყაროს ცნობით გუბერნატორის მოადგილის კაბინეტში გურიის ფეხბურთი ფედერაციის პრეზიდენტის კახა ებრალიძის გადაყენების საკითხს განიხილავდნენ. 

ებრალიძემ ცოტა ხნის წინ ერთპიროვნული გადაწყვეტილებით ფეხბურთის ფედერაციის პრეზიდენტობის კანდიდატად რევაზ არველაძე წარადგინა, რამაც გამგეობის წევრების უკმაყოფილება გამოიწვია.

ებრალიძე ამბობს, რომ მას ამის უფლება დებულებით ჰქონდა, თუმცა საწინააღმდეგოს ამტკიცებენ გამგეობის წევრები, თუმცა არცერთ მათგანს დებულება არ გააჩნია:

_ არ ვიცი რა წერია დებულებაში. არ წამიკითხავს. უბრალოდ, ჩვენ, ფედერაციის წევრებს გავინტერესებს რატომ მიიღო ებრალიძემ ერთპიროვნული გადაწყვეტილება და რატომ არ დაგვეკითხა ჩვენ. სწორედ ამ საკითხში ვთხოვეთ დახმარება გურიის გუბერნატორს, რომელმაც მის მოადგილესთან გადაგვამისამართა, _ გვითხრა შეხვედრის დასრულების შემდეგ გამგეობის ერთ-ერთმა წევრმა ბენო თავბერიძემ.

თავბერიძის თქმით, მისთვის უცნობია იმყოფებოდა თუ არა შეხვედრაზე სუს-ის თანამშრომელი:

_ ვერაფერს გეტყვით, სახეზე არ ვიცნობ და როგორ გითხრათ, _ განმარტა თავბერიძემ.

შეხვედრის დასრულების შემდეგ გუბერნატორის მოადგილემ პრესკონფერენცია გამართა და აღნიშნა, რომ ეს ჩვეულებრივი სამუშაო პროცესი იყო (იხილეთ ლინკი).

დღევადელ შეხვედრასთან დაკავშირებით კომენტარი ამ დრომდე არ გაუკეთებია გურიის ფეხბურთის ფედერაციის პრეზიდენტს კახა ებრალიძეს, რომელიც ჩვენ სატელეფონო ზარებს არ პასუხობს.