“ფაქტია, რომ ზეწოლა არსებობს გამგეობის წევრებზე“ _ გფფ-ს პრეზიდენტი გუბერნატორის მოადგილეს პასუხობს

გურიის გუბერნატორის მოადგილის სოსო ერქომაიშვილი ამბობს, დღეს გურიის ფეხბურთის ფედერაციის წევრებთან და სუს-ის თანამშრომელთან ერთად, საკუთარ კაბინეტში, 4 საათის განმავლობაში ფედერაციის პრეზიდენტთან კახა ებრალიძესთან დაკავშირებას ცდილობდა.

ერქომაიშვილი კატეგორიულად გამორიცხავს, რომ რეგიონული ფედერაციის წევრებზე  ხელისუფლება ზეწოლას ახდენს.

_  ფედერაციის გამგეობის წევრები მობრძანდნენ გუბერნატორთან და გუბერნატორმა დამავალა მე ამ ბატონების მიღება, მათთან გასაუბრება და სიტუაციაში გარკვევა. ამის შემდეგ ეს ბატონები მოვიდნენ ჩემთან. შევეცადეთ, დავკავშირებოდით გურიის ფედერაციის ხელმძღვანელს. ამ მცდელობის შემდეგ, შედეგი, სამწუხაროდ,  არის არადამაკმაყოფილებელი _ გურიის ფედერაციის ხელმძღვანელი არ გამოეხმაურა ჩვენს გამოძახილს, ჩვენი მცდელობა იყო უშედეგო, _ განაცხადა ერქომაიშვილმა საგანგებოდ გამართულ პრესკონფერენციაზე.

გურიის ფეხბურთის ფედერაციის პრეზიდენტი კახა ებრალიძე ამბობს, რომ არავინ დაკავშირებია და არც შეხვედრის შესახებ ჩაუყენებიათ საქმის კურსში:

_ შემიძლია გაჩვენოთ ჩემი ტელეფონი _ ჩემთან არავის დაურეკავს და არც შეხვედრა მოუთხოვია. „გურია ნიუსის“ საშუალებით გავიგე, რომ მსგავსი შეხვედრა მიმდინარეობდა. ასევე, თქვენთან წავიკითხე ფედერაციის ერთ-ერთი წევრის ბენო თავბერიძის კომენტარი, სადაც ის ამბობს,რომ დებულებას არ იცნობს.

სამწუხაროა, რომ მათ არ იციან წესდება, რომელშიც გარკვევით წერია, რომ გამგეობის წევრებს არა აქვთ უფლება სხვა უწყებას, ან სხვა თანამდებობის პირს მიმართონ პრეტენზიით, გარდა ფეხბურთის ფედერაციისა.

კიდევ ერთხელ გეტყვით, რომ არცერთი შეხვედრა ჩემთან არ შეთანხმებულა და არც ტელეფონით დამკავშირებია ვინმე.

ფაქტია, რომ ზეწოლა არსებობს გამგეობის წევრებზე. ერთ დღეს ერთს ამბობენ, მეორე დღეს მეორეს. რამდენიმე დღის წინ, გურიის ფედერაციაში მოსულები ამბობდნენ, რომ მერაბ ჟორდანიას უჭერდნენ მხარს, დღეს ამბობენ იმის გარკვევა გვინდა ჩვენს დაუკითხავად რატომ წარადგინა არველაძე. თვითონაც ვერ გარკვეულან რა უნდათ.

ჩემი გადაყენება სურთ? _ კი ბატონო, გადამაყენონ, მაგრამ  რა უფლებით? ან რატომ გადამაყენებენ, რეზი არველაძე რომ წარვადგინე? _ აი, ამიტომაა აუცილებელი წესდების წაკითხვა. მათ ამის უფლებაც არა აქვთ. ერთ დღეს ერთს ამბობენ, მეორე დღეს მეორეს. მე გამოვედი და ჩამოვთვალე ის საქმეები, რაც ფეხბურთის ფედერაციასთან, ზვიად სიჭინავასთან და რეზი არველაძესთან ერთად განვახორციელე. ახლა მათაც თქვა რის გამო სურთ ჩემი გადაყენება, _ გვითხრა ებრალიძემ.

მისივე თქმით, ასევე არასწორია ის განცხადება, რომლის თანახმადაც მან უპასუხოდ დატოვა გამგეობის წევრების წერილი:

_ არანაირი წერილი და მოთხოვნა ჩემთან, ფედერაციაში არ შემოსულა. სოციალურ ქსელში გავრცელდა მოხსენებითი ბარათი, რომელსაც ვერაფერი გავიგე. ძალიან სასაცილო "დოკუმენტია“. არც ის წერია ვის წერენ, რატომ წერენ, ან ვის უხდიან მადლობას. თუ შემოვა აუცილებლად ვუპასუხებ. მე არაფერი მაქვს დასამალი, _ დასძინა ჩვენთან საუბრისას გურიის ფეხბურთის ფედერაციის პრეზიდენტმა.