გასულ ორშაბათს, გურიის გუბერნატორის მოადგილის, სოსო ერქომაიშვილის კაბინეტში გურიის ფეხბურთის ფედერაციის გამგეობის წევრები შეიკრიბნენ. შეხვედრას სუს-ის თანამშრომელი ირაკლი ანდღულაძეც ესწრებოდა.
"გურია ნიუსის" კორესპონდენტის, გიორგი გირკელიძის კითხვაზე _ რა თემაზე იმართებოდა შეხვედრა, რომელსაც სუს-ის წარმომადგენელი ესწრებოდა, ერქომაიშვილმა აღნიშნა, რომ "ჩვეულებრივი, სამუშაო შეხვედრა იყო", თუმცა, რატომ ესწრება "ჩვეულებრივ სამუშაო შეხვედრას" სუს-ის წარმომადგენელი, უპასუხოდ დატოვა.
შეხვედრაზე, რომელიც 4 საათის განმავლობაში მიმდინარეობდა, ჩვენს კორესპონდენტებს _ გიორგი გირკელიძეს და ჟანა მეგრელიშვილს დასწრების საშუალება არ მისცეს.
უფრო მეტიც, ჩვენი მცდელობა, რომ ოთახში მყოფი ადამიანები დაგვეფიქსირებინა, ერქომაიშვილმა მასზე "ზეწოლად" (?!) შეაფასა.
"არ ვიცი, რამდენიმე ხანი უნდა დამელოდოთ, კომენტარს შემდეგ გავაკეთებ. ზეწოლას ნუ გვიკეთებთ, როცა რაიმე სამუშაო პროცესი მიმდინარეობს, მასში ჩაჭრა ეჭვის ფაქტად აღიქმება _ ფსიქოლოგიურად ცუდია. ვერ შეგიშვებთ ოთახში. შევთანხმდეთ, რომ კომენტარს მერე გავაკეთებ. ნუ ცდილობთ, ასეთი ფორმით ზეწოლა მოახდინოთ ამ საქმეზე", _ ამბობდა ერქომაიშვილი.
დაახლოებით, 4 საათის გასვლის შემდეგ, ერქომაიშვილი კაბინეტიდან გამოვიდა და გაგვიცხადა, რომ გველოდებოდა გუბერნიის შენობის დარბაზში. ჟურნალისტები რამდენიმე წუთით ერქომაიშვილის კაბინეტის კართან დავრჩით _ კაბინეტიდან სუს-ის მაღალჩინოსანი ირაკლი ანდღულაძე გამოვიდა და უსიტყვოდ დატოვა მისაღები.
"მოგეხსენებათ, რომ გურიის ფეხბურთის ფედერაციაში დაძაბულობაა _ გამგეობის წევრებმა საპროტესტო აქცია გამართეს გურიის ფეხბურთის ფედერაციის შენობის წინ. ფედერაციის ხელმძღვანელი არ გამოეხმაურა ამ აქციას. გამგეობის წევრებმა, მათი მოთხოვნის რეაგირების გარეშე დატოვების შემდეგ მომართეს გუბერნიას. ეს ჩვეულებრივი მუშა პროცესია _ ჩვენ ნებისმიერ ადამიანს ვხვდებით, ვუსმენთ და ვცდილობთ, გადავჭრათ საჭირბოროტო საკითხები.
კიდევ ერთხელ ხაზს ვუსვამ იმას, რომ ეს არის ჩვეულებრივი სამუშაო პროცესი. აქედან გამომდინარე, ფედერაციის გამგეობის წევრები მობრძანდნენ გუბერნატორთან და გუბერნატორმა დამავალა ამ ბატონების მიღება, მათთან გასაუბრება და სიტუაციაში გარკვევა. ამის შემდეგ, ეს ბატონები მოვიდნენ ჩემთან. შევეცადეთ, დავკავშირებოდით გურიის ფედერაციის ხელმძღვანელს. ამ მცდელობის შემდეგ, შედეგი, სამწუხაროდ, არის არადამაკმაყოფილებელი _ გურიის ფედერაციის ხელმძღვანელი არ გამოეხმაურა ჩვენს გამოძახილს.
ამასთან დაკავშირებით, გურიის ფედერაციის გამგეობის წევრები აპირებენ განცხადების გაკეთებას, რომელსაც თქვენ მალე გაეცნობით", _ თქვა ერქომაიშვილმა პრესკონფერენციაზე და სუს-ის მაღალჩინოსნის შეხვედრაზე დასწრების მიზეზები განმარტა:
"რაც შეეხება უშიშროების თანამშრომელის დასწრებას შეხვედრაზე, ეს იყო ჩვეულებრივი სამუშაო შეხვედრა, პროცესი, და მეტი არაფერი. ჩვენ ვხედავთ რაღაც არასწორ ნაბიჯებს ფედერაციის პრეზიდენტის მხრიდან და ჩვენ ამასთან დაკავშირებით ვაპირებთ განცხადების გაკეთებას.
ამ საქმეში იმიტომ ჩავერიე, რომ გურიის ფეხბურთის ფედერაციის გამგეობის წევრები და პრეზიდენტი დაკავშირებოდნენ ერთმანეთს, რასაც 4 საათის განმავლობაში ამაოდ ველოდით",_ განაცხადა ერქომაიშვილმა.
ერქომაიშვილის თქმით, "გამგეობის წევრებზე არავითარი ზეწოლა არ გახორციელებულა და ისინი მოქმედებენ დამოუკიდებლად".
თუმცა, როგორც შეხვედრის დასრულების შემდეგ გავიგეთ, ხელისუფლებამ სუს-ის თანამშრომლის თანდასწრებით გამგეობის წევრებს პირდაპირი მითითება მისცა, რომ გურიის ფეხბურთის ფედერაციის პრეზიდენტი კახა ებრალიძე, ნებისმიერ ფასად უნდა გადააყენონ. ებრალიძეს რევაზ არველაძის სფფ-ს პრეზიდენტობის კანდიდატად წარდგენას არ პატიობენ.
ჩვენი წყაროს მტკიცებით, რეგიონული ფედერაციის წევრებს გუბერნიაში იურიდიული კონსულტაციებიც ჩაუტარეს და უთხრეს, რომ ებრალიძის მიერ მიღებული ერთპიროვნული გადაწყვეტილება არასწორია.
_ არ ვიცი, რა წერია დებულებაში. არ წამიკითხავს. უბრალოდ, ჩვენ, ფედერაციის წევრებს გვაინტერესებს, რატომ მიიღო ებრალიძემ ერთპიროვნული გადაწყვეტილება და რატომ არ დაგვეკითხა ჩვენ. სწორედ, ამ საკითხში ვთხოვეთ დახმარება გურიის გუბერნატორს, რომელმაც მის მოადგილესთან გადაგვამისამართა, _ აღნიშნა ჩვენთან საუბრისას შეხვედრიდან გამოსულმა გამგეობის ერთ-ერთმა წევრმა ბენო თავბერიძემ.
თავბერიძის თქმით, მისთვის უცნობია იმყოფებოდა თუ არა შეხვედრაზე სუს-ის თანამშრომელი:
_ ვერაფერს გეტყვით, სახეზე არ ვიცნობ და როგორ გითხრათ, _ განმარტა თავბერიძემ და მასზე და მის კოლეგაზე ზეწოლა კატეგორიულად უარყო.
თუმცა, ასე არ ფიქრობს კახა ებრალიძე, რომლის განმარტებით, გუბერნიიდან მას არავინ დაკავშირებია: "შემიძლია გაჩვენოთ ჩემი ტელეფონი _ ჩემთან არავის დაურეკავს და არც შეხვედრა მოუთხოვია. "გურია ნიუსის" საშუალებით გავიგე, რომ მსგავსი შეხვედრა მიმდინარეობდა. ასევე, თქვენს ვებგვერდზე წავიკითხე ფედერაციის ერთ-ერთი წევრის, ბენო თავბერიძის კომენტარი, სადაც ის ამბობს,რომ დებულებას არ იცნობს.
სამწუხაროა, რომ მათ არ იციან წესდება, რომელშიც გარკვევით წერია, რომ გამგეობის წევრებს არა აქვთ უფლება, სხვა უწყებას, ან სხვა თანამდებობის პირს მიმართონ პრეტენზიით, გარდა ფეხბურთის ფედერაციისა.
კიდევ ერთხელ გეტყვით, რომ არც ერთი შეხვედრა ჩემთან არ შეთანხმებულა და არც ტელეფონით დამკავშირებია ვინმე.
ფაქტია, რომ ზეწოლა არსებობს გამგეობის წევრებზე. ერთ დღეს ერთს ამბობენ, მეორე დღეს _ მეორეს. რამდენიმე დღის წინ, გურიის ფედერაციაში მოსულები ამბობდნენ, რომ მერაბ ჟორდანიას უჭერდნენ მხარს, დღეს ამბობენ, იმის გარკვევა გვინდა, ჩვენს დაუკითხავად რატომ წარადგინა არველაძე. თვითონაც ვერ გარკვეულან, რა უნდათ.
ჩემი გადაყენება სურთ? _ კი, ბატონო, გადამაყენონ, მაგრამ რა უფლებით? ან რატომ გადამაყენებენ, რეზი არველაძე რომ წარვადგინე? _ აი, ამიტომაა აუცილებელი წესდების წაკითხვა. მათ ამის უფლებაც არ აქვთ. მე გამოვედი და ჩამოვთვალე ის საქმეები, რაც ფეხბურთის ფედერაციასთან, ზვიად სიჭინავასთან და რეზი არველაძესთან ერთად განვახორციელე. ახლა მათაც თქვან, რის გამო სურთ ჩემი გადაყენება, _ გვითხრა ებრალიძემ.
ამ სკანდალურ შეხვედრაზე, რომელიც "გურია ნიუსის" საშუალებით გახდა ცნობილი, კომენტარი ფეხბურთის წარმომადგენლებმაც გააკეთეს. მათ შორის, ფედერაციის პრეზიდენტობის კანდიდატებმაც.
_ საერთოდ, ჩარევების წინააღმდეგი ვარ. ბოლო დროს ბევრი რამ გახდა მიუღებელი. უპირველესად, ეს ფეხბურთის ფედერაციის ქმედებებს ეხება. მან აბსოლუტურად ყველა კანდიდატს უნდა მისცეს საშუალება, რომ საარჩევნო კამპანია თანაბარ პირობებში წარმართოს. ყველა სუბიექტი უნდა შეხვდეს კანდიდატებს და არჩევანი მხოლოდ ამის შემდეგ გააკეთოს, _ აღნიშნა ლევან კობიაშვილმა.
რევაზ არველაძემ კი "გურია ნიუსის" ჟურნალისტთან, გოჩა ჯანაშიასთან საუბრისას განმარტა, რომ გურულებს გაკეთებულ საქმეებზე გურიაში სტუმრობისას მოუყვება:
_ გურიის ფეხბურთის ფედერაციის პრეზიდენტმა რა არჩევანიც გააკეთა, ეს იყო სრულიად ლეგიტიმური და მას ამის სრული უფლება ჰქონდა. რატომ გააკეთა ეს არჩევანი და რატომ ჩათვალა მან განვლილი პერიოდის შეფასების შემდეგ ასე, ამაზე თავად კახამ უკვე ბევრი ისაუბრა და ამით ეს თემა დავხუროთ.
რამდენად მნიშვნელოვანია ჩემთვის საფეხბურთო კლუბი "გურია” და მთლიანად გურიის რეგიონი, ამას რომ ჩამოვალ, ადგილზე გეტყვით. რაც შეეხება გუბერნიას, ბუნებრივია, მიმაჩნია, რომ ასეთი საკითხები იქ არ უნდა წყდებოდეს. არ შეიძლება სხვამ დააყენოს კიდევ ახალი კანდიდატურა. ყველამ ჩვენ-ჩვენი მომხრეები რომ მოვძებნოთ, ამით რა გამოვა? ყველა გადაწყვეტილებას ჰყავს, როგორც მომხრეები, ასევე მოწინააღმდეგები, სხვასაც შეუძლია მომხრეები შეკრიბოს და ატეხოს ერთი ამბავი. მე, პირადად, მოწადინებული ვარ, რაც შეიძლება, ადვილად გადაწყვეტის საშუალება მიეცეს ყველა ხმის მიმცემს.
მაინტერესებს, კარგის გარდა რა გავაკეთე გურიაში? მინდა, ეს კითხვა დავსვა. საერთოდ, რასაც ვაკეთებ, ამას, უპირველესად, ქვეყნის სიყვარულით ვაკეთებ და რა გზაც გავიარე აქამდე, ყველაფერი ამ სულისკვეთებით მოვახერხე. თანაც ეს მხოლოდ ჩემით შევძელი და არავინ მიკვალავდა გზას. ჰოდა, მინდა, რომ ჩემი ცოდნით და გამოცდილებით, კიდევ ბევრი ვაკეთო ის საქმე, რაც ჩემთვის უცხო ნამდვილად არაა”, _ აღნიშნა ჩვენთან საუბრისას არველაძემ.
ფეხბურთის ფედერაციის პრეზიდენტობის კანდიდატის ამ კომენტარს განცხადებით გამოეხმაურა საფეხბურთო კლუბ "გურიას" პრეზიდენტი, ლანჩხუთის მუნიციპალიტეტის გამგებელი ზაზა ურუშაძე:
_ საინტერესოა, რას გულისხმობს ბატონი არველაძე? ფედერაციაში მისი ყოფნის დროს "გურია" არაერთხელ დაზარალდა. გავიხსენოთ, თუნდაც, არაობიექტური მსაჯობა, რომლის გამო, ჩვენ მოსაგები თამაშები წავაგეთ. ერთ-ერთი ასეთი იყო თამაში "შუქურასთან", სადაც მსაჯმა აშკარად წაგვართვა მოგების შანსი.
თუმცა, მიუხედავად იმისა, რომ კლუბის ოფიციალურ გვერდზე გავრცელდა თამაშის ამსახველი ვიდეო მასალაც, ამ ფაქტს რეაგირება ფედერაციის მხრიდან არ მოჰყოლია. ამავე დროს, სწორედ, არველაძის ფედერაციაში ყოფნის დროს "გურია" რამდენჯერმე დაჯარიმდა. ქართული ფეხბურთის საქმე რომ უკან მიდის, ეს უკვე აშკარა და თვალშისაცემია.
ლანჩხუთისთვის, ისევე როგორც დანარჩენი მუნიციპალიტეტებისთვის, ფინანსური თვალსაზრისით, რთულია უმაღლეს ლიგაში გუნდის შენახვა. სწორედ ეს უნდა იყოს გათვალისწინებული ფედერაციის მხრიდან. პირიქით, "გურია" რამდენჯერმე დაჯარიმდა, რამაც ფინანსური ზარალი მოგვიტანა. ისიც გვინდა გკითხოთ _ ისედაც ფინანსურად შეჭირვებულ გუნდს ქულების დაკლებითა და ეროვნული ჩემპიონატიდან გამოთიშვით რომ გვემუქრებიან, თქვენთვის რამდენად მისაღებია?
ქართული ფეხბურთი რომ არ ვითარდება, ეს უკვე აშკარაა. ცხრა წლის მანძილზე წარმატების ნაცვლად, უკუსვლა გვქონდა. საინტერესოა, ყოფილ პოსტსაბჭოთა რესპუბლიკებს შორის მხოლოდ ერთ ქვეყანას რომ გაუსწრებ და ისიც არასაფეხბურთოს, რამდენად გაქვთ მორალური უფლება, რომ რაიმეზე პრეტენზია განაცხადოთ?
დღეს რომ ასეთ დღეშია ეროვნული ჩემპიონატი და სანაკრებო დონე, ამაზე პასუხს ვინ აგებს? ისიც ხომ პარადოქსია, რომ ისეთ დამსახურებულ გუნდს, როგორიც "გურიაა", არჩევნებში ხმის მიცემის უფლება არ აქვს. რამდენჯერმე დავაყენეთ ეს საკითხი ფედერაციის წინაშე, მაგრამ ამაოდ.
მიუხედავად იმისა, რომ კლუბი "გურია" და მე, როგორც პრეზიდენტი, არ ვერევით საქართველოს ფეხბურთის ფედერაციის პრეზიდენტის არჩევნებში, ჩვენ გვსურს, სასიკეთო და ძირეული ცვლილებები ქართულ ფეხბურთში, რაც აუცილებელია და რაც ხელს შეუწყობს ფეხბურთის განვითარებას არა მხოლოდ რეგიონებში, არამედ ქვეყნის მასშტაბით", _ აღნიშნავს ურუშაძე.
ურუშაძის ამ განცხადებაზე კომენტარი ამ დრომდე არ გაუკეთებია რევაზ არველაძეს, რომელიც ამ დღეებში საარჩევნო კამპანიით და პრეზენტაციითაა დაკავებული.
