ახლა ძალიან მოდაშია დოქისა თუ ჩაიდნის ფორმის საყვავილე ქოთნები.
ყველა ოჯახში ხშრიად ზიანდება, ტყდება ან ფუჭდება არაერთი სახის ჭურჭელი _ როგორ გავაკეთოთ დაზიანებული დოქისგან ძალიან ლამაზი საყვავილე?
ახლახან ხელიდან დამივარდა და სახელური მოტყდა საშუალო ზომის ფართოყელიან საღვინე დოქს. ის ოჯახის რელიქვია იყო, რადგან სულ ცოტა, 70 წლის ისტორია აქვს. მოვიმარჯვე სპეციალური წებო და ჯერ სახელური მივაკარი, თუმცა მინაწებები ადგილი ცუდად გამოჩნდა.
გადავწყვიტე, საყვავილე გამეკეთებინა. მეუღლე დავიხმარე და ელექტრობურღის მეშვეობით ფსკერზე ნახვრეტი გავუკეთეთ, რომ შიგ ჩარგული ყვავილის მორწყვის შესაძლებლობა მქონდეს.
შეწებებული ადგილები რაღაცით რომ დამეფარა, დიზაინზე დიდხანს ფიქრი არ დამჭირვებია _ სალათისფერ დოქზე ცოტათი მწვანე ძაფი შევარჩიე, ჯერ მინიყვავილი მოვქსოვე, შემდეგ კი მაკრამეს ერთ-ერთი “უზორით” (ნაყშით) სახელური თანდათან დავფარე, ნაქსოვი ყვავილი კი სახელურის მუხლზე მოვაქციე და ნასკვით ჩავამაგრე. მერე შიგ ქოთნის ლამაზი ყვავილი ჩავრგე.
ძალიან ლამაზი თვითშემოქმედება გამომივიდა _ ჩემი სამზარეულო “დოქი-ქოთანით” დამშვენდა. არადა, სულ ადვილად შეიძლებოდა, სანაგვეზე აღმოჩენილიყო.
დაფიქრდით, სანამ დაზიანებულ თუ გატეხილ ჭურჭელს გადააგდებთ. სულ ადვილი შესაძლებელია, მისგან ისეთი ორიგინალური ნივთი გააკეთოთ, რომელიც არაფრით ჩამოუვარდება ახალს.
