სუს-ის თანამშრომლის გია არდაზიშვილის დაკავებასთან დაკავშირებით დამატებითი განმარტებები უწყების ხელმძღვანელმა ვახტანგ გომელაურმა დღეს გააკეთა.
მისი თქმით, "გია არდაზიშვილი იყო რიგითი თანამშრომელი, რომელიც მუშაობდა ღია წყაროებზე, აკეთებდა ანალიზს და აწვდიდა ხელმძღვანელობას".
შეგახსენებთ, რომ არდაზიშვილთან დაკავშირებით ინფორმაცია "ნაციონალური მოძრაობის" წევრმა გივი თარგამაძემ გუშინ გაავრცელა, სადაც აღნიშნულია იყო, რომ სუს-ის თანამსშრომელმა უკანონოდ მოპოვებული ინფორმაცია ოკუპირებული ტერიტორიის გავლით საზღვარზე გადაიტანა.
თუმცა, გომელაურის მტკიცებით, გავრცელებული ინფორმაცია სიმართლეს არ შეესაბამება. მაგრამ უწყების ხელმძღვანელმა დაადასტურა ინფორმაცია არდაზიშვილის ცემასთან დაკავშირებით, რაზეც გუშინ "გურია ნიუსთან" საუბრისას სუს-ში კომენტარი არ გააკეთეს.
"რაც შეეხება გია არდაზიშვილის თემას, ძალიან ბევრი მითქმა-მოთქმა გამოიწვია… მოგეხსენებათ, როცა მე წარდგენილი ვიყავი პარლამენტში და უნდა მომხდარიყო ჩემი დამტკიცება, იქ ბევრი კითხვა დაისვა. მაშინ საუბარი იყო, რომ ანალიტიკური სამსახურის ხელმძღვანელმა პირმა დატოვა საქართველო და წაიღო, ასე ვთქვათ, საიდუმლო ინფორმაცია, გადაიტანა სხვა სახელმწიფოს სპეცსამსახურებთან. არდაზიშვილი არის რიგითი თანამშრომელი, რომელიც მუშაობდა ღია წყაროებსა და მოკვლევაზე, ანალიზის გაკეთებაზე და აწვდიდა ხელმძღვანელობას, მას არანარი წვდომა არ ჰქონდა საიდუმლო ინფორმაციაზე. იმ დროისთვის გამოძიება დაწყებული იყო და მიმდინარეობდა მისი დაკავების ოპერაცია, აქედან გამომდინარე, ჩვენ ვერანაირ განცხადებას ვერ გავაკეთებდით და გიორგი ბარამიძე კარგად მიხვდა, მე რომ ავუხსენი, ის იყო შს მინისტრი და მან გაიგო, მე რაზე ვსაუბრობდი. არ შეიძლებოდა ამ განცხადების გაკეთება, რომ ჩვენი სპეცსამსახურის თანამშრომელმა მიატოვა და გადავიდა სხვა ქვეყანაში. მინდა ხაზი გავუსვა, განცხადებები გაკეთდა მათი მხრიდან, თითქოსდა ის არა ჩვენ, არამედ რუსულმა სპეცსამსახურებმა, ოსურმა სპეცსამსახურებმა სცემეს, დააკავეს და გადმოაგდეს ე.წ. საოკუპაციო ზოლზე. როგორ წარმოგიდგენიათ თქვენ, რომ ადამიანი გადავიდეს, გადაუტანოს ღირებული ინფორმაცია და ის ადამიანი სცემონ, გაკოჭონ, აუხვიონ თვალები, ფეხებით დააბან და გადმოაგდონ ისევ უკან… ეს მე მგონი ლოგიკაში არ ჯდება და კითხვები მოხსნილია.." _ განაცხადა ვახტანგ გომელაურმა.
სახელმწიფო უსაფრთხოების სამსახურის უფროსის თქმით, არდაზიშვილი ქართველმა სამართალდამცველებმა დააკავეს და მიმდინარეობს გამოძიება:
"ჩატარდა ღონისძიება, დეტალებში მე ვერ ჩავალ და ვერ მოვყვები. გამოძიება მიმდინარეობს, მას რამდენიმე მუხლი აქვს წაყენებული და ის დღესდღეობით დაკავებულია", _ განაცხადა ვახტანგ გომელაურმა.
ამავე თემაზე:
სუს-ის თანამშრომელმა ქვეყნიდან უკანონოდ მოპოვებული ინფორმაცია გაიტანა – თარგამაძე
