პარლამენტის თავმჯდომარემ, დავით ბაქრაძემ, ჩოხატაურში ყოფნისას, მოსახლეობას მოთმინებისთვის მადლობა გადაუხადა და განაცხადა, რომ არა ეს მოთმინება, საქართველო სომალს დაემსგავსებოდა. მისივე თქმით, სწორედ ხალხის მოუთმენლობის ბრალია, რომ საბერძნეთი, მიუხედავად რამდენიმე მილიარდიანი დახმარებისა, “ფეხზე დადგომას ვერ ახერხებს და საბერძნეთის საშველი მაინც არ არ არის”:
_ ძალიან კარგად ვიცით, როგორ უჭირს მოსახლეობას და ჯერ კიდევ როგორი ღარიბია საქართველო. ბევრად უკეთესია, ვიდრე 8 წლის წინ, მაგრამ ძალიან შორს არის იქედან, სადაც გვინდა, რომ ვიყოთ. 1988 წელს ერთნაირად ვიყავით ჩვენ, ბალტიისპირეთი, პოლონეთი. აბა, ახლა შეადარეთ სად არიან ისინი და ჩვენ სად ვართ. იცით რატომ? იმიტომ, რომ ისინი 20 წელია შენდებიან და ჩვენ 12-13 წელი ვინგრეოდით, ვიძარცვებოდით, თუ რამის მოპარვა და გაუბედურება შეიძლებოდა, ყველაფერი გავაკეთეთ ამ ქვეყანაში. გავაკეთეთ, პირველ პირში, პირობითად _ არც თქვენ და არც მე არ გაგვიკეთებია (არადა, ამ შეხვედრაზე მყოფი ჩინოვნიკების უმეტესობა, სწორედ შევარდნაძის მთავრობის ის წარმომადგენლები იყვნენ, რომლებიც ამ მთავრობასაც შესანიშნავად მოერგნენ). მაგრამ ასეთი დრო იყო და ასეთი სისტემა. ახლა ამის გამოსწორებას წლები სჭირდება, დრო სჭირდება, მუშაობა სჭირდება. თქვენ რომ მოთმინებით არ იყოთ, თქვენ რომ გამძლეობით არ იყოთ, ჩვენთან ერთად არ იდგეთ, არ გვაცლიდეთ, ვიმუშაოთ და საქმე გავაკეთოთ, არაფერი არ გამოვიდოდა, იმიტომ, რომ ჩვენზე ბევრად წინწასული ქვეყნები ცუდ მდგომარეობაში არიან. ხედავთ, აგერ, საბერძნეთში რა ხდება _ ხალხი ქუჩებშია გამოსული, ამტვრევს და ლეწავს ყველაფერს. ელემენტარული რაღაცის მოთმენა არ უნდათ. აძლევენ და აძლევენ მილიარდებს და მაგათი საშველი მაინც არ არის. სამი დღის წინ, 130 მილიარდი მისცეს. ჩვენ ვინ რას გვაძლევს _ სამი მილიარდი მოგცეს ომის მერე და ეგ იყო სულ თავი-ბოლო მთელი დახმარება. იმათ მარტო გუშინწინ მისცეს 130 მილიარდი. მანამდე კიდევ სამი მაგდენი აქვთ მიცემული. არ ეშველებათ მაინც, იმიტომ რომ იქ ხალხი არის აგრესიული, გამოდის და ყველაფერს ამტვრევს და არაფრის მოთმენა არ უნდა. თქვენ რომ ასეთი მომთმენები და გვერდში დამდგომები არ იყოთ, აქამდე საბერძნეთივით კი არა, სომალივით ვიქნებოდით მთლად დაქცეული და გაუბედურებული. ამიტომ, ყველას ძალიან დიდი მადლობა ერთად ყოფნისთვის. ამ ერთად დგომისთვის სასწაული არ იქნება და არც მე გპირდებით. თუ ვინმე დაგპირდებათ, რომ ხვალ პრობლემა არ იქნება, მოგატყუებთ. ასეთი სასწაულები არ ხდება, მაგრამ რასაც გპირდებით ახლა შევასრულებთ _ ხვალ, ზეგ და მაზეგ ნაკლები პრობლემა გვექნება. ასე, ნელ-ნელა ავაშენებთ ამ ქვეყანას, რომ ეს ბავშვები, ეს ახალგაზრდები (შეხვედრაზე მყოფი სკოლის მოსწავლეები იგულისხმა ბაქრაძემ. ავტ.) რომ გადაიბარებენ ჩვენგან, არც გზაზე არ უნდა მოუწიოთ ზრუნვა, არც გაზზე და არც წყალზე. ამათთან სხვა პრობლემები გაჩნდება და იმას უნდა მიხედონ. გპირდებით, რომ ნაბიჯ-ნაბიჯ, ყოველდღე გავაუმჯობესებთ მდგომარეობას. ტყუილი არ მითქვამს და არც გეტყვით, _ განაცხადა საქართველოს პარლამენტის თავმჯდომარემ.
