23 თებერვალს, ჩოხატაურში მყოფმა საქართველოს პარლამენტის თავმჯდომარემ დავით ბაქრაძემ ვრცლად ისაუბრა იმაზე, თუ რატომ არის საქართველო ღარიბი ქვეყანა. ბაქრაძის განცხადებით, ხალხთან დეტალებზე საუბარი აუცილებელია, რადგან ყველა პრობლემას ბოლომდე უნდა ჩაწვდომა.
პარლამენტის თავმჯდომარემ უმუშევრობაზეც გაამახვილა ყურადღება და აღნიშნა, 8 წელიწადში ყველაფრის ერთად გაკეთება შეუძლებელია. როგორც ჩანს, ბაქრაძე ადგილობრივმა ხელისუფლებამ შეცდომაში შეიყვანა, წინააღმდეგ შემთხვევაში ჩოხატაურში შეკრებილ საჯარო მოხელეებს, რომლებიც პარლამენტის თავმჯდომარეს დაახვედრეს და რომელთა შორის, რიგითი მოქალაქეები თითზე ჩამოსათვლელნი იყვნენ, ბაქრაძე უმუშევართა რიცხვში არ მოიხსენიებდა:
_ ერთი რაღაც მინდა იცოდეთ _ ძალიან კარგად გვესმის, რამდენია გასაკეთებელი. ეს იმიტომ, რომ 8 წლის წინ დავიწყეთ აბსოლუტურად დაქცეული და გაპარტახებული ქვეყნიდან. დღესაც საქართველო არის ძალიან ღარიბი ქვეყანა. ამას ვამბობ პირდაპირ და ამაში დასამალი არ არის, იმიტომ, რომ ახლა ბევრი თქვენგანი, ვინც აქ ხართ, დარწმუნებული ვარ, უმუშევარია და ვინც მუშაობს, იმის ხელფასიც არ არის ისეთი მაღალი, როგორც უნდა იყოს (არადა, იქ მყოფების 50%-ის მინიმალური ხელფასი 700 ლარია, 49%-ის კი _ 400. ავტ.). ყველაფერი ვიცით, მაგრამ ამ 8 წელიწადში, რაც შეიძლებოდა, გავაკეთეთ. ჩვენ დაგვხვდა გაპარტახებული, ჩაბნელებული, გაუბედურებული ქვეყანა, სადაც 7-ლარიანი პენსია იყო და ისიც თვეობით არ გაიცემოდა. კი, ბატონო, ვიცით, რომ არც 140 ლარია ბევრი და კიდევ გავზრდით, როგორც კი საშუალება გვექნება, მაგრამ 7 ლართან შედარებით 140 ლარი ხომ უკეთესია? იმასთან შედარებით, რომ არაფერი არ იყო, ის სოციალური პოლისი ხომ უკეთესია? რაც შეიძლება, თანდათანობით კეთდება. უბრალოდ, 5 წელიწადში ვერ შენდება ის, რაც ინგრეოდა 15 წლის განმავლობაში. მაგრამ ერთი იცოდეთ _ რაც იქმნება, იქმნება ხალხისთვის. თუ არაფერი არ გაგიკეთეთ, ასეთ შეხვედრებზე მე ვერ მოვალ. რომ არ გვქონდეს გაკეთებული, ვერც ახლა მოვიდოდი. არ ვაპირებ, არც ჩემს კაბინეტში და არც ჩემს ბინაში ჩაკეტვას. ამიტომ, მაქსიმალურად გავაკეთებთ ყველაფერს, რომ ყველგან მიგვესვლებოდეს. მთავარი ის არ არის, ვინ რამდენ ხანს და რომელ თანამდებობაზე იქნება _ მე პარლამენტის თავმჯდომარეობის მერეც ვაპირებ ცხოვრებას, სიარულს, ხალხის ნახვას და არანაირად არ მინდა, ვიღაც მოვიდეს და მითხრას, შენ რომ პარლამენტის თავმჯდომარე იყავი რა გააკეთე, ქვეყანა დააქციე და შეჭამეო. მაგას მირჩევნია, დღესვე წავიდე. გესმოდეთ, რომ ყველაფერს ერთბაშად ვერ ვწვდებით და ვერ ვაკეთებ. 140 ლარი იქნება პენსია სექტემბრიდან. ხანდახან გვეუბნებიან _ რატომ სექტემბრიდანო. ნეტავ, იმის ფული ყოფილიყო ბიუჯეტში, რომ თებერვლიდან გაგვეზარდა. უფრო კმაყოფილები იქნებოდით ახლა თქვენც და მეც უფრო წელში გამართული მოვიდოდი. მაგრამ არ იყო ამის ფული. რისი ფულიც მოვძებნეთ ამ ბიუჯეტში, ის გავაკეთეთ. რატომ 140? ნეტავ, 340 ყოფილიყო, მაგრამ მეტი საშუალება არ იყო, _ განაცხადა დავით ბაქრაძემ.
