ოზურგეთის მუნიციპალიტეტის სოფელ ლიხაურში, ე.წ. "ნიაბაურში" მცხოვრებლები : ეფემია ცინცაძე, დოდო ჭელიძე, მერი მუჯირი, ანი სალუქვაძე, ნონა ჩხარტიშვილი, მარიამ ჭელიძე, იუნონა ლორთქიფანიძე "გურია ნიუსს" დახმარებისთვის მიმართავენ.
ადგილზე აქ მცხოვრებლების მოთხოვნით მივედით.
"ამ უბანში 9 ოჯახი ვართ, წყალი გვენატრება. ხომ ხედავთ გზა რა დღეშია. გადათხარეს, იმის გამო, რომ წყალი შემოეყვანათ, მაგრამ სამუშაოები შეჩერებულია. ჩვენი უბანი ანასეულის წყალზე იყო მიერთებული. ამ ბოლოს ანასეულის მცხოვრებლებმა რამდენიმეჯერ აქციაც მოაწყვეს უწყლობის გამო, ხმაური ატეხეს და მათი მოთხოვნები დააკმაყოფილეს. სამაგიეროდ, ჩვენ გადაგვიკეტეს წყალი და და უწყლოდ დაგვტოვეს.
სოფელში დასასვენებლად ჩამოსული ბავშვები დაავადმყოფდნენ სიბინძურისგან, ვერ დავბანეთ, სასმელი წყალი ჩვენ არ გვქონდა, ვერ ვიცავდით სისუფთავეს, ბავშვებს ტანზე გამოაყარა და დღესაც მკურნალობენ თბილისში. ეს არის ცხოვრება? ან როგორ შეიძლება, ანასეულს მისცენ წყალი და ამის ხარჯზე ლიხაურს გადაუკეტონ? . დაგვიდგან მრიცხველები და გადავიხდით წყლის ფულს, არ გვაქვს ამის პრობლემა.
21 საუკუნეში ვინ ცხოვრობს ასე? მოვითხოვთ წყალს და გზას, ღელეში ჩამოდის წყალი და იმას ვსვამთ. დენის ფული გაგვიძვირეს,
სამუშაო არაფერი არაა. ორი უმაღლესდამთავრებული მყავს სახლში უმუშევარი, აქეთ უწყლობით ვიხრჩობით." _ პროტესტს გამოთქვამდნენ ლიხაურის მცხოვრებელები.
მათივე თქმით, ადგილობრივი ხელისუფლების წარმომადგენლები აქ მცხოვრებლებს აღნიშნული პრობლემების გადაჭრაში დახმარებას დაჰპირდნენ, თუმცა როგორც თავად ამბობენ, პროცესი გაჭიანურებულია.
"როგორც ვიცით, ფული გადმორიცხულია, რომ პროექტზე მუშაობა დაიწყოს , მაგარამ ჯერ არ დაწყებულა. ვიყავით გამგეობაში მისულები, დაგვპირდნენ, რომ მუშებს მალე გამოაგზავნიდნენ და დაიწყებოდა სამუშაოები, თუმცა, ჯერჯერობით ყველაფერი შეჩერებულია.
ჩვენი სოფლის რწმუნებულმაც გვითხრა, რომ პროექტის შესრულება რაც შეიძლება მალე დაიწყებაო, მაგრამ ჩვენ ამასობაში უწყლობით დავიხოცეთ. გაგვცენ პასუხი, რატომ გაგვითიშეს წყალი? რატომ გადაგვიჭრა ხელაძემ წყალის მილები? ჩვენი პრობელემები არ ადარდებთ? "– უკმაყოფილებას ვერ მალავენ ისინი.
ოზურგეთის მუნიციპალიტეტის გამგებლის წარმომადგენელი სოფელ ლიხაურში მერაბ სალუქვაძე ამბობს, რომ ამ ადამიანების მოთხოვნებს ყოველთვის ეთანხმებოდა და აღნიშნული პრობლემების მოგვარებაში მათ ეხმარება კიდეც.
"აქაურებმა საკუთარი თავი თავად შეიყვანეს შეცდომაში, მთელი კუთხე ორი ადამინიას აზრს დაემორჩილა, მოხდა გაუგებრობა:
გავაკეთეთ შესაბამისი პროექტი. შევუძინეთ "სოფლის მხარდამჭერი პროგრამის" თანხებიდან 450 მ. პლასტმასის მილი, ჩავდეთ ეს მილი. მანამდე გავაფრთხილეთ, რომ თუ ამ მილს ანასეულის წყალზე მიართებდნენ, წყალი არ ექნებოდათ. მათ გვითხრეს, რომ თქვენ ოღონდ გაგვიკეთეთ და სხვას არაფერს მოვითხოვთო.
ჩემი დანაშაული ისაა, რომ მათ ხელწერილი არ დავაწერინე. ჩავატარეთ სამუშაოები, დავაერთეთ მილები. როცა ანასეულმა გაიგო ეს ამბავი, რომ ლიხაურელებს ჰქონდათ წყალი ანასეულის მილზე დაერთებული, მოითხოვეს მისი ჩაჭრა და ლიხაურის მილზე გადაერთება.
ამის შემდეგ მოსახლეობამ წყალი ვეღარ მიიღო და სერიოზული პრობლემის წინაშე აღმოჩნდა. მე მათ აღვუთქვი დახმარება, ჩემი შესაძლებლობების ფარგლებში. ისევ გამოვნახე ფინანსები "სოფლის მხარდამჭერი პროგრამის" თანხებიდან, გავაკეთე სხვა პროეტებიდან ეკონომია და მოვაგროვეთ თანხა. სოფელს აქვს აუზი, საიდანაც შესაძლებელი იქნებოდა წყალის გამოყვანა, აქედან ჰქონდათ კიდეც მთელი ცხოვრება წყალი, მაგრამ რატომღაც ეს აიკვიატეს. ახლა ვუკეთებთ ამას. თანხები მოძიებული გვაქვს, საპროექტოს ხარჯთაღრიცხვა გაკეთებული აქვს. საკრებულომ თანხმობა მისცა პროექტს, ახლა დარჩა პატარა საკითხები მოსაგვარებელი, რაც უბრალოდ დროში გაიწელა. მაგათ უნდათ, რომ ერთ დღეს მოიფიქრონ და სახელმწიფომ მეორე დღესვე გააკეთოს, ამას თავისი პროცედურები სჭირდება. ესენი მოითხოვენ, გინდა თუ არა, ხვალ გაგვიკეთეო.
შეგიძლიათ გადაამოწმოთ ეს ინფორმაცია შესაბამისს სამსახურებთან, რამდენიმე დღეში ინდმეწარმე ხელს მოაწერს ხელშეკრულებას და დაიწყება აღნიშნული პროექტის განხორციელებაც. ეს ადამიანები ჩვენ უყურადღებოდ არ დაგვიტოვებია არცერთი წუთით"–გვითხრა მერაბ სალუქვაძემ.
