ცოტა ხნის წინ ამერიკის შეერთებული შტატების ხელისუფლებამ გერმანული "კომერცბანკის" მიმართ ძიება დაიწყო. ბანკს ბრალად ედება იმ ქვეყნებში ტრანზაქციების განხორციელება, რომელსაც ოფიციალური ვაშინგტონი ბოროტების ღერძის შემადგენელ ქვეყნებად ასახელებს.
იმ შემთხვევაში, თუ "კომერცბანკის" ამ ქვეყნებთან კავშირი დადასტურდება, გერმანიის სიდიდით მეორე ბანკს მრავალმილიონიანი ჯარიმის გადახდას დააკისრებენ.
ეს ამერიკის ხელისუფლების მხრიდან ბანკების დასჯის პირველი მცდელობა როდია. მანამდე, ამერიკის მთავრობამ ბანკებს – "ბერკლის", "ლოიდს", "სტერიდ სვიზზსა" და "ეი ბი ენ ამროს" დააკისრა ჯარიმის გადახდა. ამერიკა გააღიზიანა გერმანული "კომერცბანკის" მიერ ირანთან გაფორმებულმა კონტრაქტმა ტრანზაქციების შესახებ.
ბანკის ხელმძღვანელობამ განაცხადა, რომ ამერიკის თხოვნას გაითვალისწინებს. ბანკი უარს აცხადებს ჯარიმის ოდენობის დასახელებაზე, რომელიც შესაძლოა, მას დაეკისროს და არც იმას აკონკრეტებს, თუ რომელი რეზერვებიდან გადაიხდის მას.
ამერიკის სანქციები მოქმედებს ირანის, კუბის, სუდანისა და მიანმის წინააღმდეგ. ტრანზაქციები, რომელიც ამერიკის მტკიცებით, "კომერცბანკმა" ამ ქვეყნებში განახორციელა, 2005-დან 2013 წლამდე მოხდა. გერმანიის კანონმდებლობით, ეს კანონის დარღვევა არ ყოფილა, რადგან ბანკი ამერიკის დეპარტამენტის აკრძალვებს ოფიციალურად მხოლოდ 2009 წლიდან შეუერთდა. ამერიკის წყრომა იმ ფაქტმა გამოიწვია, რომ ზოგიერთი ევროპული ქვეყნიდან გადარიცხული ფული ირანმა თავის დროზე ბირთვული იარაღის შესაქმნელად გამოიყენა.
