“გაოგნებული ვარ აღნიშნული განცხადების არაადეკვატურობის ხარისხით”

"მინდა, მივმართო პოლიტიკოსებს, რომელთაც პოლიტიკოსობის პრეტენზია აქვთ, მათი ასეთი პროვოკაციული ქმედება მიმართულია ჩვენი სახელმწიფოს წინააღმდეგ. ვიცი, რომ ერთ-ერთი დეპუტატი, გვარად ღვინიაშვილი, რომელიც წლების განმავლობაში იყო კახეთის გუბერნატორი და პირდაპირ მიუთითებდა კომპანიებს, არ ჩაებარებინათ ყურძენი მაღალ ფასად, იმისთვის, რომ გუბერნატორს, თუმცა არა კახეთის, არამედ – ოდესის, დაუმტკიცოს ერთგულება, ჩადის რეგიონში და აქტიურობს.

მინდა, მივმართო სამართალდამცავ ორგანოებს, მაქსიმალურად გააკონტროლოთ ადგილზე სიტუაცია, რომ მოსახლეობას ჩაბარებაში პრობლემა არ შეექმნას. თუ ვინმე პროვოკატორი შეეცდება სიტუაციის დაძაბვას, იმოქმედეთ კანონის ფარგლებში. ყოვლად დაუშვებელია, რომ ისეთი დისკრედიტებული ორგანიზაცია, როგორიც არის "ნაციონალური მოძრაობა", 20-30 კაცის მეშვეობით, ინტრიგნული და პროვოკაციული მეთოდებით აპირებს რთველის პოზიტიური სურათის გაფუჭებას, ფონის გაუარესებას და მოსახლეობის დაძაბვას", _ ეს განცხადება დღეს   ირაკლი ღარიბაშვილმა მთავრობის სხდომაზე გააკეთა.

"ნაციონალური მოძრაობის"  ლიდერი დავით ბაქრაძე, პრემიერ-მინისტრის მიერ   გაკეთებულ განცხადებას გამოეხმაურა, სადაც ის ღვინიაშვილს დაპატიმრებით დაემუქრა.
"სრულიად გაოგნებული ვარ აღნიშნული განცხადების  არაადეკვატურობის ხარისხით. ნაცვლად იმისა, რომ პრემიერ-მინისტრმა გლეხების პრობლემის მოგვარებასა და გაჭირვებული ხალხის დახმარებაზე იზრუნოს, პოლიციას გურჯაანის მაჟორიტარი დეპუტატის დაკავებას ავალებს,  რომელიც საკუთარ მოვალეობას ასრულებს და საკუთარი ხალხის გვერდით დგას.
მინდა ცალსახად განვაცხადო, გიორგი ღვინიაშვილი, გურჯაანის მაჟორიტარი დეპუტატი,  თავის მოვალეობას შეასრულებს და კახელი გლეხების გვერდით იდგება, განსხვავებით "ქართული ოცნების" მინისტრებისგან, დეპუტატებისა და გუბერნატორებისგან, რომლებთაც არჩევის შემდეგ თვეობით არ მოუკითხავთ საკუთარი ამომრჩევლები, არ აღელვებთ ის პრობლემები, რომლებიც მათ აქვთ. გიორგი ღვინიაშვილი, განსხვავებით დღევანდელი მთავრობისგან, დღეს საკუთარ მოვალეობას ასრულებს და ცდილობს საკუთარი რაიონის ხალხს დაეხმაროს.
მინდა ხაზგასმით ავღნიშნო,  ჩვენი სურვილია არაა რთველის პოლიტიზება მოხდეს, მაგრამ ამასთან ერთად, ყველამ უნდა იცოდეს, რომ ჩვენ ვიდგებით ხალხის გვერდით.
ამასთან, უნდა აღნიშნოს, რომ ადამიანები, რომლებიც იქ შეიკრიბნენ, არ არიან 20-30 პროვოკატორი, როგორც მათ პრემიერმა უწოდა. იქ შეკრებილია ათასობით კახელი გლეხი, რომელთა უკანაც 10 ათასობით ოჯახი დგას.  ის ოჯხები, რომლებთაც ყურძნის მინიმალური ფასს – 1 ლარს დაპირდნენ, დღეს კი 60 თეთრია; ის ოჯახები, რომლებთაც რუსულ ბაზრის გახსნასა და პრობლემის მოგვარებას დაპირდნენ;  ის ოჯახები, რომლებიც მთავრობის არაკომპეტენტური პოლიტიკის გამო, დღეს უფრო მეტ სიღარიბეში ცხოვრობენ  .
მინდა მთავრობას მოვუწოდო, თვი დაანებოს პოლიტიკური ოპონენტებთან ბრძოლას და თუ რამე შეუძლია, თუმცა ამაში ეჭვი გვეპარება, მიხედოს ხალხს და გააკეთოს ყველაფერი.  ამ შემთხვევაში კახელმა გლეხმა მიიღოს ის თანხა, რასაც წლების წინ პირდებოდნენ.
განცხადებაზე, სადაც  პრემიერ-მინისტრი მაჟორიტარ დეპუტატს დაპატიმრებით ემუქრება იმის  გამო, რომ ის ხალხის მიერ ორგანიზებულ აქციაში მონაწილეობს, პარლამენტის თავმჯდომარის რეაქციას ველოდები და ვიმედოვნებ, რომ  პარლამენტის მხრიდან შესაბამისი რეაქციები იქნება." – განაცხადა დავით ბაქრაძემ.