დღეს, ფეხბურთში დავით ყიფიანის სახელობის საქართველოს ეროვნული თასის გათამაშების მერვედფინალური ეტაპის პირველი შეხვედრები გაიმართა. ლანჩხუთში, "ევგრაფ შევარდნაძის" სახელობის სტადიონზე "გურიამ" ბოლნისის "სიონს" უმასპინძლა და 0:2 დამარცხდა.
"სიონი" გურულებისთვის წლებია უკვე უხერხულ მეტოქედ იქცა. ბოლოს 2012 წლის 3 მარტს მოიგეს სტუმრად ლანჩხუთელებმა და მას შემდეგ ხუთი შეხვედრა დათმეს, სამჯერ ფრე ითამაშეს, მოგებით კი ერთხელაც ვერ მოიგეს. ეს უსიამო ტრადიცია არც ახლა დაირღვა, მითუმეტეს, რომ "სიონი" აშკარად კარგ ფორმაშია, მაშინ როცა "გურია", პირიქით, კრიზისში იმყოფება.
ეს სათასო პაექრობა სტუმართა დომინირებით აღინიშნა და მე – 15 წუთზე მიქაბერიძემ გახსნა კიდეც ანგარიში. არც პირველში ტაიმში და არც შესვენების შემდგომ, კახა გოგიჩაიშვილის შეგირდების ქმედებებს რეალური ხიფათი და რაც მთავარია შედეგი არ მოჰყოლია. აი, მატჩის ბოლო წუთზე იმავე ბოლნისელი მანჯგალაძის გოლი კი ლოგიკური აკორდი იყო.
საერთოდ ვინმემ შეიძლება აღიაროს, რომ ისედაც ფინანსურად შეჭირვებულ გუნდს რა ეთასებაო. მართლაც ზედმეტი ტვირთია "გურიასათვის" დამატებით სათასო ბატალიები, მაგრამ გუნდი რომ აშკარად ჩავარდნას განიცდის, ეს ჩემპიონატის ბოლო ტურში დებიუტანტ "ლოკომოტივთან" სამარცხვინო მარცხიც მეტყველებს. ვინც ეს შეხვედრა ტელევიზიით იხილა, დამეთანხმება, რომ "გურიაში" დისციპლინის მხრივ ბევრი პრობლემაა, ამიტომ სჯობს მისმა ხელმძღვანელობამ ყველაფერი მსაჯებს არ გადააბრალოს და ამა თუ იმ სხვა თემასთან ერთად, საკრებულოს ბოლო სხდომაზე ერთერთი დეპუტატის მიერ ნახსენებ "კომბლე დეპუტატოვიჩის" საკითხსაც მიხედოს.
სხვა შეხვედრათაგან აღსანიშნავია გორის "დილას" საშინაო მარცხი ზუგდიდის "ზუგდიდთან" – 1:2. სხვათა შორის, ერთერთმა ცნობილმა საბუქმეკერო კანტორა "bet 365" – მა, საქართველოს თასის რამდენიმე შეხვედრა შეიტანა თავის პროგრამაში და 12,0 (!) კოეფიციენტით შეაფასა ზუგდიდელთა გამარჯვება, ხოლო "სიონის "ორიანს" 2,9 მისცა.
