სამშაბათს საქართველოს პრემიერ-მინისტრი ირაკლი ღარიბაშვილი ოზურგეთს სტუმრობდა.
მთავრობის მეთაურმა სახელმწიფო პროგრამის _ "აწარმოე საქართველოში" ფარგლებში გახსნილი ჩაის შესაფუთი საწარმო გახსნა.
"ჩაის წარმოების აღდგენა არის ჩვენი მთავრობის ერთ-ერთი მთავარი მიმართულება. ჩემი დავალებით, სოფლის მეურნეობის სამინისტრო მუშაობს ჩაის წარმოების განვითარების პროგრამაზე, რომელიც უახლოეს მომავალში დამტკიცდება მთავრობის სხდომაზე. ეს გახდება საჯარო დოკუმენტი ყველასთვის. ჩვენ ვაპირებთ მაქსიმალურად ავაღორძინოთ ქართული ჩაის წარმოება, ხელი შევუწყოთ ამ დარგის წახალისებას საქართველოში. ეს გამოიწვევს პლანტაციების აღდგენას, _ განაცხადა ირაკლი ღარიბაშვილმა.
მისივე თქმით, ხელისუფლების მთავარი ამოცანაა ეტაპობრივად მოხდეს იმპორტირებული დაბალი ხარისხის ჩაის ჩანაცვლება ადგილობრივი წარმოებით.
_ ჩვენ გვაქვს უნიკალური ჩაი, რომელიც უნდა გახდეს ქვეყნის სავიზიტო ბარათი. როგორც ქართული ღვინოა ყველაზე გამორჩეული პროდუქტი, ასევე უნდა იყოს ქართული ჩაი. ამის პოტენციალი გვაქვს. გეტყვით მაგალითს _ რამდენიმე თვის წინ ჩამოსული იყო თურქმენეთის პრეზიდენტი, რომელმაც პირდაპირ მითხრა, რომ თურქმენეთში ქართული ჩაის ნოსტალგია აქვთ. ცოტა ხნის წინ ჩინეთში გახლდით _ რამდენიმე შეხვედრაზე პირდაპირ მკითხეს, ქართული ჩაის ექსპორტს როდის დაიწყებს საქართველოო. იქ ერთ-ერთ გამოსვლაშიც აღვნიშნე _ ერთ-ერთი ჩინელი ლაო ჯინჯოუ მეცხრამეტე საუკუნეში საქართველოში იყო ჩამოსული, წაიღო ქართული ჩაი და შექმნა ჩინური ბრენდი "ლაო ჩაი". სინამდვილეში ეს არის ქართული ჩაი. სწორედ ამაზე ვმუშაობთ, რომ დავიწყოთ ჩვენი რესურსების ათვისება, გამოყენება და ამას გავუფრთხილდეთ განსაკუთრებულად, _ აღნიშნა ღარიბაშვილმა ჟურნალისტებთან საუბრისას.
მედიის წარმომადგენლებმა პრემიერს მიმდინარე პოლიტიკურ მოვლენებზე და აქტუალურ საკითხებზეც დაუსვეს შეკითხვები, თუმცა, მთავრობის მეთაურმა სხვა თემებზე საუბარი არ ისურვა.
_ არავითარი პარლამენტი, არავითარი არჩევნები. ამათ არ უყვართ ჩაი, _ ჟურნალისტების მისამართით კომენტარი გააკეთა პრემიერმა და ყველა ჩაის დასაგემოვნებლად დაპატიჟა.
ჩაის დაგემოვნების შემდეგ პრემიერ-მინისტრმა ოზურგეთის მუნიციპალიტეტის სოფელ შემოქმედში გადაინაცვლა, სადაც სოფლის მხარდამჭერი პროგრამის ფარგლებში მიმდინარე პარკის მშენებლობა დაათვალიერა _ სკვერი, რომელშიც ფერადი და მუსიკალური შადრევანია დამონტაჟებული, იმ ადგილზეა გაკეთებული, რომელიც გასულ წელს სტიქიამ დააზიანა.
ვიზიტის ბოლოს, პრემიერ-მინისტრი "ალეგრობის" დღესასწაულს დაესწრო და იქ შეკრებილ მოსახლეობას მიესალმა:
_ "ალეგრობა" ჯერ კიდევ 170 წლის წინ დაარსდა და ყოფილმა პრეზიდენტმა ედუარდ შევარდნაძემ, სწორედ "ოზურგეთობიდან" დააარსა "თბილისობა".
გურია არის, იყო და ყოველთვის იქნება ქართული პოლიტიკის, თანამედროვე, პროგრესული აზროვნების ცენტრი. გურულები გამორჩეულად ნიჭიერი ქართველები არიან და ამ დღესასწაულის სახელითაც ჩანს, რაოდენ პროგრესულად მოაზროვნეა გურული კაცი.. მინდა, ყველას გისურვოთ ჯანმრთელობა, გაძლიერება, მშვიდობა, რაც არის სტაბილურობისა და განვითარების საწინდარი. გურია ჩემთვის და ყველასთვის არის უნიკალური მხარე, თავისი გამორჩეული ადამიანებით. ქედს ვიხრი თქვენს წინაშე, პატივისცემით მოგესალმებით ყველას, ძალიან მიყვარხართ! _ მიმართა პრემიერმა "ალეგრობის" დღესასწაულზე შეკრებილ გურულებს.
სიტყვით გამოსვლის შემდეგ, მთავრობის მეთაურმა, ქალაქის მერ ბეგლარ სიორიძესთან ერთად, საპატიო ოზურგეთელები დააჯილდოვა. ეს წოდება წელს ბიბლიოთეკარ ზინაიდა სალუქვაძეს, ლოტბარ ჯემალ ჭკუასელს, ხელოვან გულღია სალუქვაძეს, მსახიობ გაბრიელ მდინარაძეს და მეცნიერ ვლადიმერ ცანავას მიენიჭათ.
დაჯილდოების შემდეგ, პრემიერი სცენიდან ჩავიდა და მოსახლეობას გაესაუბრა.
მაშინ, როცა ირაკლი ღარიბაშვილი სელფების გადაღებით იყო დაკავებული, მას ოზურგეთის თეატრის მსახიობები შეეგებენ და ისეთივე კოსტუმირებული სანახაობა მოუწყვეს, როგორითაც რამდენიმე წლის წინ მიხეილ სააკაშვილს დახვდნენ
მსახიობმა ბელა კიკვაძემ, რომელიც ოლღა ბებიას როლში იყო, ირაკლი ღარიბაშვილს აუწყა, "როგორი დიდი მშენებლობები მიდის ოზურგეთში" და "როგორ ყვავდება ქალაქი".
მანვე პრემიერს ოზურგეთის თეატრის გარემონტებაც სთხოვა.
მსახიობმა ომარ ურუშაძემ კი ზუსტად ისეთივე თასით მიართვა პრემიერს ღვინო, როგორიც სამი წლის წინ _ სააკაშვილს.
_ გურულებს გაუმარჯოს, _ ღვინიანი თასი ბოლომდე დაცალა პრემიერმა.
_ თქვენთან ერთად! იცოცხლეთ! _ ვალში არ დარჩა ღარიბაშვილს ურუშაძე.
პრემიერის წასვლიდან, რამდენიმე წუთში, ადგილი სადაც მსახიობები ღარიბაშვილს დახვდნენ, გათავისუფლდა, რაც იმის დასტურია, რომ ეს დადგმა სპეციალურად ღარიბაშვილისთვის მომზადდა და არა ოზურგეთელებისთვის _ მათთვის ქალაქის ცენტრში სხვა ღონისძიებები, რომლებიც სანახაობრივად მართლაც საინტერესო და ლამაზი იყო, დღის ბოლომდე მიმდინარეობდა.
