საქართველოს განსახლებისა და ლტოლვილთა მინისტრი სოზარ სუბარი ლანჩხუთის და ქალაქ ოზურგეთის მუნიციპალიტეტებში იმყოფებოდა. მინისტრმა, გურიის რეგიონის სახელმწიფო რწმუნებული-გუბერნატორი გია სალუქვაძესთან და ქალაქ ოზურგეთის მერთან, ბეგლარ სიორიძესთან ერთად ოთხი ოჯახი მოინახულა.
ისინი საქართველოს ოკუპირებული ტერიტორიებიდან იძულებით გადაადგილებულ პირებს და განსახლებულ ეკომიგრანტ ოჯახებს შეხვდნენ და მათთვის გადაცემული სახლები მოინახულეს.
არჩილ ჩხაიძის, რევაზ ურუშაძის, მარინა ორმაცაძის და აკაკი რუსიეშვილის ოჯახებს უკვე საკუთარი სახლები აქვთ.
მარინა ორმაცაძის ოჯახი 13 წელზე მეტი ელოდა საკუთარ საცხოვრებელ სახლს.
"გულის ოპერაციის გავიკეთე და მეორე დღეს გავიგე, რომ სამინისტრო აპირებდა ჩემი ოჯახისთვის საცხოვრებელი სახლის ყიდვას." _ გვითხრა მარინა ორმოცაძემ,
სოზარ სუბარის თქმით, სტიქიით დაზარალებულ ოჯახებს, საშუალება ეძლევათ, 20 000 ლარის ფარგლებში, საცხოვრებელი სახლი თავისი სურვილის მიხედვით საქართველოს ნებისმიერ რეგიონში მოიძიონ.
კრიტერიუმების დაკმაყოფილების შემთხვევაში, სამინისტრო ეკომიგრანტების მიერ შერჩეულ სახლებს, "ლევან სამხარაულის სახელობის სასამართლო ექსპერტიზის ეროვნული ბიუროს" დასკვნის საფუძველზე შეისყიდის. სტიქიით დაზარალებული ოჯახების მიერ სახლების შერჩევა ხელს უწყობს განსახლების შემდგომ, მათი ინტეგრაციის პროცესს.
2012 წლიდან დღემდე გურიის რეგიონში ეკომიგრანტი ოჯახებისთვის შესყიდულია 11 სახლი, მიმდინარე წლის ბოლომდე საცხოვრებლით დაკმაყოფილდება კიდევ 7 ოჯახი.
სულ საქართველოს მასშტაბით სამინისტრომ სახლი გადასცა 156 ეკომიგრანტ ოჯახს და წლის ბოლომდე უსაფრთხო გარემოში კიდევ 55 ოჯახი განსახლდება
