ქალაქის რამდენიმე ქუჩის მცხოვრებლებს, რომლებიც ბუნებრივი აირის მომხმარებლები არიან, შპს “სოკარ ჯორჯია გაზი გურია” ოზურგეთის წარმომადგენლებმა ოფიციალური განცხადებით მიმართეს: “შეგახსენებთ, რომ თქვენ დავალიანება გერიცხებათ თქვენთან შეცვლილი მრიცხველის ღირებულება _158 ლარისა და 64 თეთრის ოდენობით. გთხოვთ, დაფაროთ აღნიშნული დავალიანება თვის ბოლომდე, თორემ შეგიწყდებათ ბუნებრივი გაზის მიწოდება”, _ წერია განცხადებაში.
აღნიშნულ საკითხთან დაკავშირებით, “გურია ნიუსს” არა ერთმა მოქალაქემ მიმართა და დახმარება სთხოვა. რამდენიმე დღის წინ კი “გურია ნიუსის” ოზურგეთის განყოფილებაში სულხან საბა ორბელიანი ქუჩის მცხოვრებლები მოვიდნენ და გაზის მრიცხველების შეცვლასთან დაკავშირებით წარმოშობილი პრობლემების შესახებ ისაუბრეს.
_ ძველი მრიცხველები შეგვიცვალეს, გამოიტანეს და გარეთ დადგეს, რაშიც გვახდევინებენ 160 ლარს. მრიცხველები, რომლებიც ადრე გვქონდა, ვარგისიანი მრიცხველები იყო. რატომ მოგვიხსნეს, არ ვიცით, ჩამოსაწერიაო, თქვეს. მოვიდნენ, ხელშეკრულება ჰქონდათ, რომელიც არ გვაჩვენეს. ჯერ გვითხრეს, უფასოაო, მერე _ ეტაპობრივად 2 ლარს გადაიხდითო და ახლა ერთბაშად ითხოვენ 160 ლარს, თორემ გაზი გაგეთიშებათო. ვერ ვიხდით, სად აქვს ხალხს ამდენი საშუალება? _ ამბობს მოსახლეობა.. მათი თქმით, სულხან-საბა ორბელიანისა და ბარათაშვილის ქუჩების კვეთაზე გაყვანილი გაზის მილები დაზიანებულია, რის გამოც წყალი ჩადის და აფუჭებს ამ მრიცხველებს:
_ თვითონ არიან ვალდებულები, რომ მრიცხველები შეცვალონ. მაგათი დაუდევრობის და უყურადღებობის გამო რატომ ვისჯებით ჩვენ? სხვათა შორის, როცა ერთ-ერთი ჩვენი მეზობელი ესწრებოდა მრიცხველის ლაბორატორიულ შემოწმებას. თავად თქვეს, წყლის გამოა დაზიანებულიო, თუმცა, დასკვნა არ მისცეს. უთხრეს, დასკვნას ვერ მოგცემთ, უბრალოდ, რომ არ მუშაობს, ამას ვაფიქსირებთო(?), _ ამბობენ სულხან საბა ორბელიანი ქუჩის მცხოვრებლები და აქეთ გვეკითხებიან: გინახავთ სადმე წითელი გაზი? ძლივს ეკიდება ცეცხლი და წითელი ალი აქვსო.
შპს “სოკარ ჯორჯია გაზი გურიას” ოზურგეთის სერვისცენტრის მენეჯერი, არსენ ცინცაძე “გურია ნიუსთან” საუბარში ამბობს, რომ აღნიშნულ საკითხთან დაკავშირებით, თუ ვინმეს დაწვრილებითი ინფორმაცია აინტერესებს, იურისტს უნდა მიმართოს.
_ ბატონო არსენ, რატომ ხდება გაზის მრიცხველების შეცვლა და რატომ გამოიწვია ამან მოსახლეობაში აჟიოტაჟი?
_ როცა გაზის მრიცხველი ლაბორატორიული შემოწმების შედეგად აღმოჩნდება უვარგისი, ხდება ამ უვარგისი მრიცხველების შეცვლა. ღირს 160 ლარი. თუ ვარგისიანია, არ ავიღებთ, რა თქმა უნდა.
_ რა ქნან ამ ადამიანებმა, რომლებსაც არ აქვთ 160 ლარის გადახდის საშუალება, მით უმეტეს, როცა მათივე თქმით, მრიცხველებს აფუჭებს ლუქში ჩასული წყალი?
_ არქონა არ ათავისუფლებს გადამხდელს ვალდებულებისგან _ მაშინ არც გაზი უნდა ჰქონდეს. თუ გაზის მოხმარება უნდა, ეს თანხაც უნდა გადაიხადოს, აბა, რა უნდა ვქნათ ჩვენ?! დეტალებზე თუ ვინმეს რამე აინტერესებს, მიმართოს ჩვენს იურისტს, რომელიც ყველა დებულებას და დადგენილებას, რაც ამ საკითხთან არის დაკავშირებული, აუხსნის. ჩვენ ეს მივაწოდეთ ხელისუფლებას და ის საქმის კურსშია. ისე, მარტო ჩვენი ინიციატივით მაგ საქმეს ვერც მოვაგვარებთ და ვერც გადავწყვეტთ _ ეს არის სემეკის დადგენილება.
