"საქართველოს ახალგაზრდა იურისტთა ასოციაციის" ოზურგეთის ოფისში მრგვალი მაგიდის ფარგლებში დისკუსია გაიმართა. დისკუსია შეზღუდული შესაძლებლობების მქონე პირთათვის ქალაქში ადაპტირებული ინფრასტრუქტურის მოწყობას ეხებოდა.
საზოგადოების წევრი ინგა დუმბაძე ასეთი ინფრასტრუქტურის მოწესრიგების აუცილებლობაზე საუბრობს: "ორი წლის წინ, ბავშვთა საერთაშორისო დღისადამი მიძღვნილ ღონისძიებაზე ჩემი შვილი ჟურნალისტებმა ჩაწერეს. მან არ ინატრა კომპიუტერი და ტელევიზორი . მისი ნატვრა იყო, ოზურგეთში გარემო მორგებული იყოს ეტლით მოსარგებლეებისთვის, რადგან იოლად მოხერხდეს მათი გადაადგილება. იმედია, რომ ეს პრობლემა მალე მოგვარდება და ეს შეხვედრა შეხვედრისთვის არ დარჩება. "- გვითხრა ინგა დუმბაძემ.
"საია"-ს ოზურგეთის ოფისის ხელმძღვანელმა თამაზ ტრაპაიძემ ჩვენთან საუბრის დროს თქვა, რომ ქალაქ ოზურგეთის ინფრასტრუქტურა არ არის მოწესრიგებული, რათა დაცული იყოს შეზღუდული შესაძლებლობის მქონე პირების ინტერესები. დღევანდელი შეხვედრიდან გაირკვა, რომ საკმაოდ პრობლემატური ქალაქი გვაქვს ამ კუთხით.
" საკმაოდ ბევრი საზოგადოებრივი დაწესებულება არის ქალაქ ოზურგეთში, სადაც არ არის გათვალისწინებული შშმ პირების ინტერესები. მართალია მიმდინარეობს უკვე ტროტუარების და გარკვეული გზის საფარის მოწესრიგება ამ კუთხით, მაგრამ საუბრის დროს გამოიკვეთა სხვადასხვა სახის პრობლემები. მთავარია შეხვედრაზე მოხდა შეთანხმება ადგილობრივი ხელისუფლებასა და საზოგადოებას შორის."- გვითხრა თამაზ ტრაპაიძემ.
შეხვედრას ადგილობრივი ხელისუფლების, მედიის და არასამთავრობო სექტორის წარმომადგენლები ესწრებოდნენ.
" პრობლემას, რომელიც გამოიკვეთა შეხვედრის დროს, ქალაქის მუნიციპალიტეტის მერია ხედავს. ვაღიარებთ, რომ გადაადგილების კუთხით შშმ პირებისთვის არსებობს პრობლემები. მაგრამ ყველა პროექტში, რომელიც ხორციელდება და უნდა განხორციელდეს ქალაქის მასშტაბით, ქალაქის მერი ითვალისწინებს შშმ პირების მდგომარეობას. არცერთ პროექტს ხელს არ აწერს და არ ამტკიცებს, თუ პანდუსების საკითხი არ არის მოგვარებული. აღმაშენებლის ქუჩის რეაბილიტაციისთვის დროსაც გავითვალისწინეთ შშმ პირების უფლებები და გაკეთდა პანდუსები", – თქვა კობა დუნდუამ.
შეხვედრაზე ითქვა, რომ შენობებზე ადაპტირებული შესასვლელები გათვალისწინებული არ არის. ადგილობრივი ხელისუფლება არასამთავრობო და მედია-სექტორთან ერთად, ამ მხრივ, ქმედითი ნაბიჯების გადადგმაზე შეთანხმდა.
