"კრიზისული პერიოდი უკვე გადავლილია და საშუალოვადიან პერიოდში ველოდებით ლარის გაცვლითი კურსის გამყარებას", – ამის შესახებ პრემიერ–მინისტრმა ირაკლი ღარიბაშვილმა მთავრობის ეკონომიკურ გუნდთან და ეროვნული ბანკის პრეზიდენტთან გამართული სამუშაო შეხვედრის დასრულების შემდეგ ჟურნალისტებს განუცხადა.
"გურია ნიუსმა" სცადა გარკვევა ლარის კურსის ვარდნამ რამდენად იმოქმედა თბილისის ოჯახების ბიუჯეტზე და მოსახლეობა რამდენად ემხრობა პრემიერ-მინისტრის გამოთქმულ მოსაზრებას, რომ კრიზისული პერიოდი უკვე გადალახულია.
ამის გასარკვევად თბილისის ქუჩებში შემთხვევითი შერჩევითი გზით მოქალაქეები გამოიკითხა.
42 წლის ლიზას თქმით, რაც ლარის კურსი დაეცა ხან შუქი არ აქვს, ხან გაზი და ზამთარში რა ეშველება არ იცის.
"ლარის კურსის დაცემამ ჩემი ოჯახის ბიუჯეტი ძალიან დააზარალა. ხან შუქს ვერ ვიხდი, ხან გაზს. უშუქობასთან შეგუებაც ძნელია, მაგრამ ზამთარში რა გვეშველება მე და ჩემს ოჯახს არ ვიცით, თან მარტო ჩვენ ხომ არ ვართ ასე? დარწმუნებული ვარ თბილისში და არა მარტო აქ ბევრია გაჭირვებული. მთავრობას უკვე არ ვიცი ანაღვლებს თუ არა ხალხის, საკუთარი მოქალაქეების ბედი.დღეს განაცხადა პრემიერმა, არ ინერვიულოთო, მაგრამ აღარ მჯერა მათი, "_ ამბობს 42 წლის უმუშევარი, ლიზა.
35 წლის გელას თქმით, ლარის კურსის დაცემა კიდე გამოიწვევს გადასახადების გაზრდას და თითოეული ოჯახი საქართველოში კიდე უფრო გაღატაკდება თუ ლარი ვარდნას განაგრძობს.
"არ მჯერა, რომ ქვეყანაში რამე გამოსწორდება. ლარიც დღითიდღე ეცემა,რაც სავარაუდოდ კიდევ გამოიწვევს გადასახადებზე ფასის ზრდას. დღევანდელი კურსით არ ვარ კმაყოფილი, ცხოვრება სასწაულებრივად გაძვირდა და ასე თუ გაგრძელდება თითოეული ოჯახი საქართველოში გაღატაკდება. რაც შეეხება თქვენს კითხვას პრემიერის განცხადებასთან დაკავშირებით, ჯერ არ მომისმენია,მაგრამ რას იზამს საზოგადოება, ალბათ, ისევ თავს დაიმშვიდებს როგორღაც, მეტი რა გზა აქვთ,"_ ამბობს 35 წლის დასაქმებული გელა.
32 წლის ნინოს თქმით,ლარის კურსის ვარდნით გამოწვეულმა კრიზისმა კი არ ჩაიარა, პირიქით, ახლა იწყება.
"ლარის კურსის ვარდნამ არა მარტო ჩემს, არამედ ყველა ოჯახის ბიუჯეტზე მოახდინა გავლენა. გაძვირდა კომუნალური გადასახადები, პური და კიდევ ბევრი ისეთი წვრილმანი, რის გარეშეც ადამიანი 21-ე საუკუნეში ყოველდღე ვერ შეძლებს არსებობას, თორემ ცხოვრებისთვის ხელფასის გაზრდაც არის აუცილებელი ჩვენს ქვეყანაში ისეა საქმე. ბატონმა პრემიერმა, რომ განაცხადა დღეს კრიზისულმა პერიოდმა ჩაიარაო, ყველაზე დიდი კრიზისი ახლა იწყება მე თუ მკითხავთ,"_ამბობს ნინო.
76 წლის არჩილი კი ფიქრობს, რომ ქვეყანაში ყველაფერი გამოსწორდება.
"მჯერა ამ მთავრობის. პრემიერმა რაკი ბრძანა ყველაფერი კარგად იქნება აწი დარწმუნებული ვარ და ამის იმედითაც ვცოცხლობ. მართალია პენსიონერი ვარ, მაგრამ პენსია არც ადრე არ მყოფნიდა თვიდან თვემდე თავის სარჩენად და ახლა უფრო მეტად არ მყოფნის, მაგრამ რას ვიზამ. ახლობლები მეხმარებიან პროდუქტების შეძენაში, თორემ მაღაზიაში "ნისიას" არავინ იძლევა უკვე. მათიც მესმის თვითონაც ხომ უნდა ნახონ მოგება. მაგრამ თუ ერთმანეთზე დავიბოღმებით რაღაც-რაღაცეების გამო და ერთმანეთში ვიკინკლავებთ ქვეყანა უკან წავა და ვერანაირ პროგრესს ვერ მივაღწევთ,"_ ამბობს 76 წლის არჩილი.
"ლარის კურსის დაწევამ ყველა დაგვაზარალა. კომუნალურ გადასახადებსა და ბანკის ვალებს ვერ ვფარავ. ხან შუქი მაქ ჩაჭრილი, ხან გაზს მიწყვეტენ ხან კიდე სულაც ულუკმაპუროდ ვზივარ სახლში, რომ როგორმე ჩემს შვილს ვაჭამო როცა მოშივდება. სამწუხაროდ ასეთია ჩემი რელოაბა და არ მინდა იფიქროთ, რომ თავს გაცოდებთ. მაგრამ ნამდვილად არ მეგონა 21-ე საუკუნის საქართველოც თუ კიდე ერთხელ აღმოჩნდებოდა ბურუსით მოცული მომავლის წინაშე. რაც შეეხება პრემიერ-მინისტრის განცხადებას, როგორ უნდა დავმშვიდდე,"_ამბობს 27 წლის თეონა.
50 წლის ლევანს შექმნილი ვითარებიდან გამომდინარე საქართველოში ცხოვრება რცხვენია.
"დღეს საქართველოში მოსახლეობის უმეტესობა გაღატაკებულია. ლარის კურსის დაცემამ არა მარტო მე და ჩემი ოჯახი, არამედ საქართველოში მცხოვრები ყველა ადამიანი დააზარალა. ბანკში როცა შევდივარ სულ რიგი დგას, ზოგი სესხს იღებს, ზოგი კი სესხის პროცენტებში უზარმაზარ თანხას იხდის. ვინც ვერ ფარავს, სახლსაც კი უყიდიან და ქუჩაში ასახლებენ. აქ ცხოვრების არა, არსებობისაც კი -მრცხვენია უკვე. სამარცხვინოა, მთავრობა საკუთარ მოქალაქეებზე რომ არ ფიქრობს, თუმცა ალბათ ისევ ჩვენ, ხალხმა, თვითონ უნდა ვიფიქროთ ჩვენს თავზე.რაც შეეხება კითხვას პრემიერის განცხადებასთან დაკავშირებით არაფერი ვიცი."_ამბობს ლევანი.
