გასული კვირის ოთხშაბათს ქალაქ ოზურგეთში, ზვანის უბანში, ერთ-ერთ საცხოვრებელ ბინაში სამართალდამცავებმა ახალგაზრდა მამაკაცი ბადრი მახინია დააკავეს. როგორც დაკავებულის ახლობლებმა გვითხრეს, პოლიციამ საცხოვრებელ სახლში საბრძოლო მასალა ამოიღო. ბრალდებულის ბიძა ამტკიცებს, რომ სამართალდამცავებმა მის ძმისშვილს ტყვიები ჩაუდეს.
"გურია ნიუსის" ინფორმაციით, ბრალდებული რამდენიმე თვის წინ, ირაკლი კვაჭანტირაძის მკვლელობის ბრალდებით დააკავეს, თუმცა ბრალი ვერ დაუმტკიცეს და რამდენიმე დღეში გაათავისუფლეს.
ოჯახის წევრები ამბობენ, რომ "სამართალდამცავები ბადრი მახინიაზე "გადაკიდებულები" არიან და უკანონოდ ცდილობენ მის დაკავებას".
ბრალდებულის ერთი-ერთი ადვოკატი დავით მამალაძე: "ჩატარდა ჩხრეკა გიორგი მახინიას საცხოვრებელ სახლში. სახლში იმყოფებოდა მისი შვილი ბადრი მახინია, რომელიც სამართალდამცავებმა დააკავეს. მას არანაირი წინააღმდეგობა არ გაუწევია პოლიციისთვის. სახლში აღმოაჩინეს საქორწილო მაშხალა. მახინიას თქმით, ის ამ მაშხალებს ინახავდა. რაც შეეხება ტყვიებს, ის სახლში აღმოჩნდა გაურკვეველ ვითარებაში. ჩვენს მიერ მოპოვებული ინფორმაციით, პოლიციელებს ახლდა სამოქალაქო ფორმაში გამოწყობილი, ჩვენთვის დაუდგენელი პირი. არსებობს საფუძვლიანი ეჭვი, რომ სწორედ ამ პირის მიერ არის ჩადებული აქვს ტყვიები".
" მე დაგვიანებით მივედი ჩემი მეზობლის ანუ მახინიას სახლში. იმ დროს, სახლში უკვე ორი მეზობელი იმყოფებოდა და იქ საოცარი მდგომარეობა იყო. ორი თუ სამი თვის წინ აქ კიდევ იყვნენ პოლიციელები და ჩაატარეს ჩხრეკა მეზობლების თანდასწრებით, თუმცა, არანაირი ტყვიები და ცეცხლსასროლი იარაღი არ უნახავთ. ხშირად ამოწმებდნენ ბადრის და აქედან გამომდინარე, რამდენად რეალურად გეჩვენებათ, რომ ის სახლში ტყვიებს შეინახავდა?! ეს წარმოუდგენელია", – გვითხრა ბადრი მახინიას მეზობელმა.
შინაგან საქმეთა სამინისტროს პრესსამსახურმა ბადრი მახინიას დაკავებიდან რამდენიმე საათში გაავრცელა ინფორმაცია, რომ "გურიის სამხარეო მთავარი სამმართველოს ოზურგეთის რაიონული სამმართველოს თანამშრომლებმა, 1990 წელს დაბადებული, წარსულში ნასამართლევი ბადრი მ. საბრძოლო მასალის მართლსაწინააღმდეგო შეძენა-შენახვის ბრალდებით ოზურგეთში დააკავეს.
სამართალდამცველებმა, ბრალდებულის საცხოვრებელი ბინის ჩხრეკისას, სხვადასხვა ტიპის ცეცხლსასროლი იარაღისთვის განკუთვნილი 6 საბრძოლო ვაზნა ამოიღეს.
გამოძიება საბრძოლო მასალის მართლსაწინააღმდეგო შეძენა-შენახვის ფაქტზე მიმდინარეობს (საქართველოს სსკ-ის 236-ე მუხლის მე-2 მუხლით).
თუმცა, მოგვიანებით მახინიას ბრალი დაუმძიმდა –მას ედავებიან საქართველოს სისხლის სამართლის კოდექსის 19-108 მუხლით გათვალისწინებულ დანაშაულის ჩადენას, რაც ითვალისწინებს განზრახ მკვლელობის მცდელობას.
როგორც ჩვენთვის არის ცნობილი, მას ბრალად ედება ერთ-ერთი ოზურგეთელი მოსწავლის დაჭრა.
ბადრი მახინიას მიმართ მოსამართლე ბიძინა სტურუამ აღკვეთი ღონისძიების სახით გამოიყენა დაპატიმრება. ბრალდებულის ადვოკატის, რამინ პაპიძის თქმით, წინა სასამართლო სხდომა 6 ნოემბერს ჩაინიშნა.
"სკოლის მოსწავლის დაჭრის დროს, ბადრი მახინია სხვაგან იმყოფებოდა და ამის მოწმეები არიან. ეს ახალგაზრდა უდანაშაულოა და ამას აუცილებლად დავამტკიცებთ" _ თქვა ჩვენთან საუბრის დროს რამინ პაპიძემ.
