ნიკოლა ანელკა
ნიკოლა ანელკამ ისლამი 2004 წელს მიიღო. ბავშვობის მეგობრებთან რელიგიაზე საუბრის შემდეგ, ნიკოლა არაბეთის გაერთიანებულ საემიროებში გაემგზავრა და იქ, ერთ-ერთ მეჩეთში, ისლამი მიიღო. ნათლობისას მას სახელად აბდულ სალამ ბილალი ეწოდა.
ფრანკ რიბერი
ავტოკატასტროფაში მიღებული ნაიარევებით ცნობილმა ფრანგმა, ფრანკ რიბერიმ ისლამი რამდენიმე წლის წინ მიიღო. ერთ-ერთ ინტერვიუში "ბაიერნის" ლიდერს ნათქვამი აქვს: "მე დღეში ხუთჯერ ვლოცულობ და ლოცვის შემდეგ თავს უკეთესად ვგრძნობ". მისი მეუღლე ვაჰიბა და ქალიშვილები – ჰიზია და შაჰინეზი, ასევე მუსლიმანები არიან. სწორედ მეუღლის გამო მიიღო ფრანკმა ისლამი. ალჟირელი ვაჰიბა ბელჰამის მშობლები წინააღმდეგები იყვნენ შვილი სხვა რელიგიის მიმდევარს გაჰყოლოდა და ფრანკმა მნიშვნელოვანი გადაწყვეტილება, რელიგიის ცვლილებასთან დაკავშირებით, ერთ საათში მიიღო. სხვათა შორის, 2006 წლის მსოფლიო ჩემპიონატის მსვლელობის დროს, ფრანკ რიბერი და ფრანგთა ლიდერი – ზინედინ ზიდანი ერთად ლოცულობდნენ.
ქარიმ ბენზემა
საფრანგეთის ნაკრების ლიდერისა და "რეალ-მადრიდის" თავდამსხმელის, ქარიმ ბენზემას მშობლები ალჟირის ღარიბი სოფლიდან ფრანგულ ლიონში ჩასახლებული ემიგრანტები არიან. ქარიმი ბავშვობიდან ეზიარა ისლამს და „ყურანი” მისი სამაგიდო წიგნია.
სამირ ნასრი
ალჟირული წარმოშობის კიდევ ერთი ფრანგი ვარსკვლავი, რომელსაც წლების წინ სამშობლოში "ახალი ზიდანი" შეარქვეს – სამირ ნასრი დაბადებიდან მუსლიმანია და ამჟამად „მანჩესტერ სიტის” ღირსებას იცავს.
მესუთ ოზილი
ლონდონის "არსენალის"ფეხბურთელი, თურქული წარმოშობის გერმანიის ნაკრების ერთ-ერთი ლიდერი, მესუთ ოზილი ისლამის ჭეშმარიტი მორწმუნეა. ცნობილია, რომ ფეხბურთელი ყოველი მატჩის წინ ყურანს კითხულობს. გასახდელში კი, ლოცულობს და მისმა თანაგუნდელებმა იციან, ამ დროს მასთან საუბარი არ შეიძლება. ოზილი ბოლო დროის ევროპის ერთ-ერთი საუკეთესო ნახევარმცველია.
