საქართველოს პრეზიდენტის მრჩევლის, კახა კოჟორიძის განცხადებით, "რუსთავი 2"-თან დაკავშირებით განვითარებულ მოვლენებს პრეზიდენტის ადმინისტრაცია სწავლობს.
ამის შესახებ კოჟორიძემ დღეს საღამოს გამართულ პრესკონფერენციაზე განაცხადა.
მისი თქმით, დამოუკიდებელი მედია არის დემოკრატიული სახელმწიფოს ერთ-ერთი უმთავრესი პრიორიტეტი.
"საქართველოს პრეზიდენტისთვის ეს თემა არის უაღრესად მნიშვნელოვანი. როგორც ეს ინფორმაცია გავრცელდა, მქონდა პრეზიდენტთან კომუნიკაცია, რომელმაც დამავალა, რომ ეს თემა შემესწავლა და მისთვის მიმეწოდებინა დეტალური ინფორმაცია და ჩვენი შემდგომი მოქმედებები მხოლოდ ამის შემდეგ გახდება ცნობილი. ამ კონკრეტულ ეტაპზე ჯერჯერობით თავს შევიკავებ სხვა განცხადებისგან", _ აღნიშნა კახა კოჟორიძემ და დასძინა, რომ იგი პრეზიდენტის დავალებით სწავლობს "რუსთავი 2"-თან დაკავშირებულ საკითხს.
"პრეზიდენტის დავალებით დეტალურად ვსწავლობთ განვითარებულ პროცესებს და მხოლოდ შესწავლის შემდეგ გახდება ჩვენი პოზიცია ცნობილი", _ განაცხადა კოჟორიძემ.
