"ერთიანი ნაციონალური მოძრაობა" საპატრულო პოლიციის ყოფილი თანამშრომლის მიმართ განხორციელებულ მუქარის შემცველ ზარებზე საუბრობს, რომელსაც მათი მტკიცებით, სამართალდამცველთა მხრიდან რეაგირება არ მოჰყოლია. ზემოთ აღნიშნულ ქმედებაში კი, სამეგრელო ზემო სვანეთის გუბერნატორსა და სუს-ის უფროსს ადანაშაულებენ.
თუმცა, სამეგრელო ზემო სვანეთის გუბერნიაში აცხადებენ, რომ ოპოზიციური პარტიის მხრიდან მათი მისამართით უსაფუძვლო ბრალდებები ჟღერდება და ამას მიზანმიმართული ხასიათი აქვს.
შეგახსენებთ, რომ "ერთიანი ნაციონალური მოძრაობის" პოლიტიკურმა მდივანმა აკაკი მინაშვილმა, დღეს გამართულ ბრიფინგზე, საპატრულო პოლიციის ყოფილი თანამშრომლის, ზურაბ სოსელიას მიმართ განხორციელებულ მუქარის შემცველ ზარებზე ისაუბრა, რომელსაც სამართალდამცავი ორგანოების მხრიდან რეაგირება არ მოჰყოლია.
"ზურაბ სოსელია, რომელიც წლების განმავლობაში საპატრულო პოლიციის თანამშრომელი იყო, 2012 წლის ნოემბერში ის გაათავისუფლეს, რადგან მან სრულიად კანონიერად გააჩერა და დააჯარიმა მაშინდელი "ქართული ოცნების" ზუგდიდის რაიონული ორგანიზაციის თავმჯდომარე ედიშერ თოლორაია, რომელიც დღეს ზუგდიდის გამგებელია. ამას შემდეგ ის აქტიურადაა ჩართული საზოგადოებრივ ცხოვრებაში. მუდმივად და ინტენსიურად ამხელს ადგილობრივ ხელისუფლებას სამეგრელოში, მათ შორის გუბერნატორსა და სუს-ის თანამშრომლებს.
ამის გამო, რამდენიმე დღის წინ, ზურაბ სოსელიას დედას დაურეკეს და დაემუქრნენ, რომ თუკი ის თავის აქტიურობას არ შეწყვეტდა, სერიოზული ზიანი მიადგებოდა. მსგავსი შინაარსის ზარი ორჯერ განხორციელდა. ორივე ნომერი ცნობილია. აღნიშნულის შესახებ სოსელიამ სამართალდამცავებს შეატყობინა, თუმცა საქმის გამოძიება არ დაწყებულა და არც რაიმე სახის რეაგირება მოუხდენიათ.
ჩვენ ვიცით ბევრი დანაშაულის შესახებ, რომელსაც გუბერნატორი ლევან შონია და სუს-ის უფროსი გოგი ნაჭყებია სჩადიან", _ აღნიშნა მინაშვილმა.
"გურია ნიუსის" კითხვაზე – კონკრეტულად რა დანაშაულებზეა საუბარი, მინაშვილი განმარტავს, რომ ნაჭყებია თავის დროზე კონტრაბანდისთვის მსჯავრდებული იყო. დღეს კი, გუბერნატორ შონიას დახმარებით, იმავე საქმიანობას აგრძელებს.
"ამის საფუძვლიანი ეჭვი გვაქვს, რომ ასე ხდება", _ განაცხადა მინაშვილმა.
მისივე თქმით, ის რომ ამ და მსგავს საქმეებზე არანაირი გამოძიება არ ხორციელდება, კიდევ ერთხელ აძლიერებს იმ ეჭვებს, რომ ეს ყველაფერი ადგილობრივი ხელისუფლებისა და ცენტრალური ხელისუფლების შესაბამისი სამსახურების მიერაა მართული.
"ვაფრთხილებ ხელისუფლებას, რომ ეს და მსგავსი ფაქტები სასწრაფოდ გამოძიოს, რადგან ის ძალადობა რასაც ის აქტიური მოქალაქეების მიმართ იყენებს, მათ დასასრულს დააჩქარებს", _ განაცხადა აკაკი მინაშვილმა.
ზურაბ სოსელიას თქმით კი, მსგავსი სახის მუქარებით მას ვერ გააჩერებენ და ბრძოლას უკანონობის წინააღმდეგ კვლავაც განაგრძობს.
"გურია ნიუსი" ინფორმაციის გადასამოწმებლად, სახელმწიფო უსაფრთხოების სამსახურის პრესსამსახურს დაუკავშირდა, სადაც აცხადებენ, რომ თუ ვინმეზე ზეწოლა ხორციელდება შესაბამის ორგანოებს მიმართონ.
"თუ ამ პიროვნებაზე ხორციელდება ზეწოლა, მიმართოს შესაბამის სამსახურებს", _ გვითხრეს პრესსამსახურში.
კითხვაზე – რა უნდა ჰქნას პიროვნებამ იმ შემთხვევაში, თუ სამართალდამცავი ორგანოები რეაგირებას არ ახდენენ, უწყებაში დამატებითი კომენტარის გაკეთებისგან თავი შეიკავეს.
სამეგრელო-ზემო სვანეთის გუბერიის პოზიციას აღნიშნულ ბრალდებებს უსაფუძვლოს უწოდებენ და აცხადებენ, რომ გუბერნატორის მიმართ ცილისწამებებს აქვს ადგილი, რაც მიზანმიმართულად ხორციელდება.
"გავრცელებული ინფორმაცია სრული სიცრუეა. გუბერნატორის მონაწილეობა რაიმე კონტრაბანდულ საქმიანობაში ისეთივე აბსურდია, როგორც ახლა ის, რომ თითქოს მარსიდან გესაუბრებით.
ეს არის მიზანმიმართული უსაფუძვლო ქმედება გუბერნატორის წინააღმდეგ. თუკი ვინმეს რაიმე პრეტენზია აქვს, ეს უნდა ემყარებოდეს უტყუარ მტკიცებულებებს და არა მსგავს აბსურდულ განცხადებებს", _ აღნიშნა "გურია ნიუსთან" საუბრისას სამეგრელო-ზემო სვანეთის მხარეში სახელმწიფო რწმუნებულის-გუბერნატორის ადმინისტრაციის პრესსამსახურის უფროსმა პაატა ლაგვილავამ.
კითხვაზე – ხომ არ მიმართავს გუბერნატორი ლევან შონია ცილისწამებისთვის სასამართლოს? – ლაგვილავამ აღნიშნა, რომ "ამასთან დაკავშირებით, გუბერნატორი აპირებს კონსულტაციები გაიაროს და გადაწყვეტილებას აუცილებლად გაცნობებთ".
