შეფასებისა და გამოცდების ეროვნულმა ცენტრმა აბიტურიენტებისთვის ახალ პროექტი დაიწყო. ცენტრის ხელმძღვანელის მაია მიმინოშვილის ინფორმაციით, აბიტურიენტებს საშუალება ეძლევათ, გამოსცადონ საკუთარი ცოდნა და შესაძლებლობები გამოცდის ახალ ფორმატთან მიახლოებულ პირობებში.
_ წინასწარ გამოქვეყნებულ ვადებში, სპეციალურ ვებგვერდზე განთავსდება სავალდებულო და არჩევითი გამოცდების ტესტების ელექტრონული ვერსიები, რომელთა გაცნობა ყველა მსურველს უსასყიდლოდ შეეძლება.
ელექტრონული ვერსიები რამდენიმე დღის განმავლობაში იქნება განთავსებული, გარკვეული პერიოდის შემდეგ კი გამოქვეყნდება სწორი პასუხები.
მონაწილეს შესაძლებლობა ექნება, საკუთარ (ან სკოლის) კომპიუტერთან შეასრულოს მოცემული დავალება, სურვილის შემთხვევაში კი საგამოცდო ფორმატი (მონიტორიდან წაკითხული ტესტის შესრულება, დროის ათვლა, განაწილება და ა.შ.) სრულად გაიმეოროს, _ აღნიშნავენ შეფასებისა და გამოცდების ეროვნულმა ცენტრში.
პროექტი ამავე დროს დამატებით მომსახურებას სთავაზობს მონაწილეებს _ თუ აბიტურიენტი გარკვეულ საფასურს გადაიხდის, ცენტრი ნაშრომების გასწორებას, სურვილის შემთხვევაში კი გათანაბრებული და სკალირებული ქულების დათვლას უზრუნველყოფს. მინიმუმ, 4 გამოცდის არჩევისას, მონაწილეს სპეციალური პროგრამის მეშვეობით შეეძლება, მიღებული შედეგები წინა წლის საკონკურსო ქულებს შეადაროს. ამისათვის ჩამონათვალიდან სასურველი ფაკულტეტები უნდა აირჩიოს. ამის შემდეგ კი ეკრანზე გამოჩნდება მისი საკონკურო ქულა იმ ფაკულტეტისათვის, რომელიც მან აირჩია და 2015 წელს შესაბამის ფაკულტეტზე ჩარიცხულთა მინიმალური საკონკურსო ქულა.
_ ცხადია, მიმდინარე წელს კონკრეტულ ფაკულტეტზე ჩარიცხვის პროგნოზირებისთვის ამ ინფორმაციის გამოყენება მიზანშეუწონელია (საკონკურსო ქულები 2015-2016 წელს შესაძლებელია სრულიად განსხვავებული იყოს), თუმცა, აბიტურიენტს არჩევანის ოპტიმალურად გაკეთებასა თუ წინასაგამოცდო პროცესის სწორად დაგეგმვაში დაეხმარება, _ აღნიშნავენ ცენტრში.
მათივე ინფორმაციით, შეთავაზებით სარგებლობა შეუძლია ყველა მსურველს, რომელიც გადაიხდის შესაბამის საფასურს, გაივლის რეგისტრაციას, აირჩევს გამოცდებს, მიუთითებს საქართველოს ფოსტის ფილიალს, სადაც მიიღებს ერთიან ეროვნულ გამოცდებზე გამოყენებული პასუხების ფურცლების იდენტურ ფურცლებს და დეტალურ ინსტრუქციას.
_ ტესტების გამოქვეყნების შემდეგ მონაწილე დავალებების პასუხებს საგამოცდო ინსტრუქციის შესაბამისად, გადაიტანს ფურცელზე. შევსებულ ფურცლებს კი მოათავსებს კონვერტში და იმავე საფოსტო განყოფილებაში მიიტანს.
ნაშრომების გასწორების შემდეგ პროექტის მონაწილე საკუთარ გვერდზე იხილავს შედეგებს, გათანაბრებულ ქულებს, სკალირებულ ქულებს, 4 გამოცდის არჩევის შემთხვევაში კი ინფორმაციას იმის შესახებ, თუ რომელ ფაკულტეტებზე ჩარიცხვის შესაძლებლობა ექნებოდა 2015 წელს მიღებული შედეგებით, _ განმარტავენ უწყებაში.
_ იდეა გამოცდის ნაწილობრივ ელექტრონული ფორმატის დანერგვასთან ერთად გაჩნდა, თუმცა პროექტი განხორციელდება იმის მიუხედავად, მიიღებენ თუ არა წელს აბიტურიენტები ტესტის რვეულს ელექტრონული ფორმატით.
რაც შეეხება ერთიანი ეროვნული გამოცდების ნაწილობრივ ელექტრონული ფორმატით ჩატარებას, ეს ინიციატივა მხოლოდ ტესტის (და არა პასუხების ფურცლის) ელექტრონულად მიწოდებას ითვალისწინებს: აბიტურიენტი დავალებას მისთვის განკუთვნილი კომპიუტერის ეკრანზე დაინახავს, პასუხებს კი ჩვეულებრივ, პასუხების ფურცელზე მონიშნავს ან დაწერს, _ დასძენენ გამოცდების ეროვნულ ცენტრში და დასძენენ, რომ მოსწავლეები სურვილის შემთხვევაში რეგისტრაციის გავლას 20 ოქტომბრიდან ვებგვერდებზე: www.naec.ge და online.naec.ge-ზე შეძლებენ.
საბოლოო გადაწყვეტილება იმის შესახებ, შეცვლის თუ არა ტესტის რვეულს აბიტურიენტზე მორგებული მონიტორი, უახლოეს მომავალში გახდება ცნობილი.
