_ 7 მარტს, დილის თერთმეტი საათისთვის გაუწმენდავი იყო დაბის ცენტრალური გზები. პრობლემა შეიქმნა სოფლების გზებზეც _ თითქმის არც ერთ სოფელში გზა 7 მარტის პირველ ნახევარში გაწმენდილი არ იყო. სოფელ წიფნარში გზა 3 მარტს გაწმინდეს, მაშინ, ამ სოფელს რეგიონალური განვითარებისა და ინფრასტრუქტურის მინისტრი, რამაზ ნიკოლაიშვილი სტუმრობდა. მას შემდეგ კიდევ ბევრი ითოვა. 7 მარტს, სოფელ წიფნარის გზის გაკვალვა ჩვენ მოგვიწია, თუმცა, თოვლის დიდი საფარის გამო, სოფლის ცენტრამდე ასვლა ვერ შევძელით. გზა გაუწმენდავი იყო საჭამიასერში, კოხნარში, ზემოხეთში, ბუკისციხეში, დიდვანში, სურებში, ზემო სურებში, გოგოლესუბანში, გუთური-ერკეთის მიმართულებით.
ჩოხატაურის ავტოსადგურში თოვლს საბურავის კვალი არ ეტყობოდა. მოლარე ოპერატორის, მარინა ლორიას თქმით, ბათუმის, თბილისისა და ქუთაისის მიმართულებით მიკროავტობუსები დილიდან გავიდნენ, თუმცა ის ფაქტი, რომ ავტოსადგურში მიკროავტობუსის ნაკვალევი არ იყო, ჩვენმა ფოტო და ვიდეო ობიექტივმა ნათლად დააფიქსირა.
ჩოხატაურელების თქმით, გზის გაუწმენდაობის და ინტენსიური თოვის გამო, მთელი ღამის განმავლობაში ცენტრალურ გზებზე საცობები იყო. როგორც მგზავრებმა გვითხრეს, საჯავახოს გზაზე საპატრულო პოლიციის რამდენიმე ავტომანქანა შეუჩერებლივ მოძრაობდა და გზიდან გადავარდნილი ავტომანქანები და სამარშუტო ტაქსები ამოჰყავდა.
გურიის სამაშველო სამსახურის უფროსის, შალვა ბოლქვაძის თქმით, 6 მარტის საღამოს 8 საათიდან 7 მარტის დილის 8 საათამდე, გურიის მასშტაბით 12 გამოძახება დაფიქსირდა: _ ძირითადად ჩოხატაურის მიმართულებით, ასევე, ოზურგეთის მუნიციპალიტეტის სოფლების _ ასკანის, მთისპირის, მელექედურის მიმართულებითაც. ავტოავარიის შემთხვევა არ ყოფილა. ავტომანქანები გზის სავალი ნაწილიდან იყო გადავარდნილი, _ გვითხრა ბოლქვაძემ.
ჩოხატაურის მუნიციპალიტეტის საკრებულოს თავმჯდომარემ, ანტონ ხუნდაძემ, ჩვენს ზარს, რამდენიმე მცდელობის მიუხედავად არ უპასუხა. გამორთული იყო გამგებლის, ლელა იმედაშვილის ტელეფონი, რომელიც როგორც გვითხრეს, თბილისში იმყოფება მივლინებით.
გურიის გუბერნატორის მოადგილის ლელა თავართქილაძის თქმით, გზები ეტაპობრივად იწმინდება: _ იცით, რომ ჩოხატაურში თოვდა გუშინ, დღის განმავლობაშიც (საუბარი ჩაწერილია 7 მარტს) და ღამითაც. შესაბამისად, გუშინდელი გაწმენდილი გზები ღამით ისევ დაითოვა და გასაწმენდი გახდა. რამდენადაც ვიცი, ღამის 2-3 საათამდე მიმდინარეობდა გაწმენდითი სამუშაოები დაბასა და სოფლებში. ამ დილით კიდევ ინტენსიურად განახლდა გზების გაწმენდა. ნუ დაგვავიწყდება, რომ ვინც ამ ტექნიკას მართავს, ისინიც ადამიანები არიან და, შესაბამისად, ელემენტარულად შესვენება მათაც სჭირდებათ. რაც შეეხება ამ წუთისთვის მდგომარეობას, როგორც დაბაში, ისე ყველა მიმართულებით ტექნიკა მობილიზებულია და გზები იწმინდება, _ აღნიშნა ჩვენთან საუბრისას თავართქილაძემ.
როგორც გვითხრეს, უგზოობის გამო, 7 მარტს, გაჩერებული იყო “ნაბეღლავის” ქარხანა. ერთადერთი გზა, რომელიც კარგად იყო გაწმენდილი, საჯავახოს მიმართულება გახლდათ. ამ გზის მოვლა-შენახვა ტენდერით შპს “გზამშენი 18”-ს აქვს მოგებული. მასვე ეკუთვნის ჩოხატაური-ბახმაროს მიმართულების გზის გაწენდა.
7 მარტს, 11 საათისთვის, მაშინ როცა ნაბეღლავის მიმართულებით გზა გაუწმენდავი იყო და როგორც აღვნიშნეთ, ამის გამო ქარხანაც კი გაჩერდა, “გზამშენი 18”-ის ტრაქტორები სურების გადასახვევზე იდგნენ. როგორც მძღოლებმა გვითხრეს, საჯავახოს გზაზე მთელი ღამე მუშაობდნენ: _ ახლა ცოტას ვისვენებთ, მთელი ღამე ვმუშაობდით. ვიცით, რომ ნაბეღლავის მიმართულებით პრობლემებია. რამდენიმე წუთში დავიწყებთ გზის გაწმენდას, _ აღნიშნეს ჩვენთან საუბრისას მძღოლებმა.
