გუშინ ლანჩხუთში საქართველოს საფეხბურთო ჩემპიონატის მეშვიდე ტურის გადადებული შეხვედრა გაიმართა, რომელიც წესით 6 ოქტომბერს უნდა ჩატარებულიყო, მაგრამ ლანჩხუთის "გურიას" მეკარის, მიხეილ გოგუაძის ტრაგიკულად დაღუპვის გამო გადაიდო.
"გურიას" ამ მატჩამდე სამთამაშიანი კრიზისი ქონდა და აუტსაიდერ "ზუგდიდთან" უეჭველი მოგება მართებდა. ასეც მოხდა, მართალია მასპინძელთა დიდი უპირატესობა მხოლოდ ორ გოლში აისახა, მაგრამ მთავარია გუნდმა წაგებათა სერია შიწყვიტა.
თამაშის დაწყებამდე სტადიონზე წუთიერი დუმილით პატივი მიაგეს მიხეილ გოგუაძის ნათელ ხსოვნას და საგულისხმო იყო, რომ მიშოს ოჯახის წევრებმა გამონახეს ძალები და სტადიონზე მისვლით, იქეთ გაამხნევეს "გურიას" ფეხბურთელები. ტრიბუნებზე კი ორი ბანერი გამოჩნდა, ერთი მასპინძლებმა მიუძღვნეს გარდაცვლილ თანაგუნდელს, მეორე კი ზუგდიდელებმა ჩამოიტანეს და ასე გამოხატეს მწუხარება.
თავად მატჩი ლანჩხუთელთა დომინირებით დაიწყო და მალე ამან შედეგიც გამოიღო. მეშვიდე წუთი იყო, სანდრო ბახიამ კუთხური რომ ჩააწოდა და უცნაური ტრაექტორიით წასული ბურთი კარის ბადეშიც აღმოჩნდა.
ამ გოლმა მეგრული კლუბი სულ დააბნია და პირველ ტაიმში საკმაოდ გახსნილ ბურთაობაში აყვა მეტოქეს და გაუმართლა, კიდევ რამდენიმე გოლი რომ არ მიიღო. ბევრი საგოლე შანსი ებოძათ გიალო ჩხაიძის მიერ დამოძღვრილ გურულებს, მაგრამ ხან იღბალი ღალატობდათ და ხანაც სათამაშო კლასი.
"ზუგდიდი" არ ცდილობდა გატანასო, ვერ ვიტყვით, მაგრამ იგივე სათამაშო კლასი მეტოქეზე დაბალი ქონდა . ერთხელ იყო, გოგი ფიფიას თავით ახლოდან რომ უნდა გაეტანა უეჭველად, მაგრამ პირდაპირ მეკარეს უბოძა ბურთი.
შესვენების შემდგომაც არ შეცვლილა სურათი და "გურიას" უპირატესობა უფრო თვალსაჩინო გახდა. აქტიური ჩანდა აფრიკელი ლეგიონერი დემელ ბოტო გოა, მაგრამ მან არაერთი საგოლე შანსი ვერ გამოიყენა. მის გარდა გატანა ვანო წილოსანს, იმავე ბახიას და შოთა ჯიქიასაც არაერთხელ შეეძლოთ, მაგრამ ვერ ივარგეს. სამაგიეროდ ივარგა შეცვლაზე შესულმა ალექსანდრე რეხვიაშვილმა, რომელმაც მატჩის ბოლოსკენ წერტილი დაუსვა შეხვედრას.
სიმბოლურია, რომ ორი გოლი გაიტანეს "გურიას" ფეხბურთელებმა და ისე გამოვიდა, ერთი გოლი გოგუაძის ხსოვნას მიუძღვნეს, მეორე კი რამდენიმე თვის წინ ასევე ტრაგიკულად დაღუპულ თანაგუნდელს – ნიკა კილაძეს.
ამ მოგებით "გურიას" 8 ქულა გაუხდა და სატურნირო ცხრილში მეათე ადგილზე ამაღლდა. მერვე ტურში კი მას ურთულესი შეხვედრა ელის ბოლო ტურში სამტრედიაში შერცხვენილ გორის "დილასთან", რომელსაც გორში 18 ოქტომბერს გაეჯიბრება.
