"გურია ნიუსი" კვლავ აგრძელებს NDI-ს მიერ გავრცელებული კვლევის შედეგების გამოქვეყნებას. ამჯერად მკითხველს ვთავაზობთ კვლევის ნაწილს, ინფრასტრუქტურული პრობლემებისა და გარემოს შეფასების კუთხით.
კვლევის დიდი ნაწილი დაეთმო ინფრასტრუქტურული მდგომარეობისა და საცხოვრებული გარემოს შეფასებას. კითხვაზე, რა არის ყველაზე მნიშვნელოვანი ინფრასტრუქტურული საკითხი თქვენი ქალაქისთვის ან სოფლისთვის, გამოკითხულთა 38 პროცენტი მიიჩნევს, რომ ყველაზე მნიშვნელოვანი პრობლემა მოუწესრიგებელი გზებია, 32 პროცენტისთვის- წყალმომარაგება. პრობლემების ჩამონათვალში შემდეგ მოდის გაზმომარაგება, გარემოს დაბინძურება, კანალიზაცია, ქუჩების დასუფთავება და ა. შ. გამოკითხულთა შედარებით მცირე ნაწილი მიიჩნევს პრობლემად მოუწესრიგებელ სკოლებსა და საბავშვო ბაღებს და ელექტროენერგიით მომარაგებას. ასეთ რესპოდენტთა რიცხვი ჯამში 12 პროცენტია.
თბილისელებისთვის სამი ყველაზე მთავარი და პირველ რიგში გადასაწყვეტი პრობლემა აღმოჩნდა: 43 პროცენტისთვის- გარემოს დაბინძურება, 31-ისთვის მოუწესრიგებელი გზები და 27-სთვის საგზაო მოძრაობა. თბილისში გაცილებით ნაკლები რაოდენობის მოსახლეობისთვის რჩება პრობლემად გაზმომარაგება და ქუჩების განათება.
ბიუჯეტის ხარჯვის დროს გასათვალისწინებელ პრიორიტეტთა რიცხვში გამოკითხულთა 38 პროცენტმა კვლავ გზები მიიჩნია, 32 პროცენტი თვლის რომ აუცილებელია ბიუჯეტის სახსრებით მოწესრიგდეს წყალმომარაგება, ხოლო 23 პროცენტისათვის გაზმომარაგებაც ამ რიგის საკითხს წარმოადგენს.
საკუთარ საცხოვრებელ გარემოში გზების მდგომარეობით უკმაყოფილოა რესპოდენტთა 37 პროცენტი, 36 პროცენტი თვლის, რომ გზების მდგომარეობას მისცემს შეფასება საშუალოს, მხოლოდ 25 პროცენტია კმაყოფილი მათი მდგომარეობით.
ჭუჭყიანი და დაუგველი ქუჩები აწუხებს გამოკითხული მოსახლეობის 21 პროცენტს, 53 პროცენტის მიიჩნევს, რომ ქუჩები, ასე თუ ისე, სუფთავდება და 25 პროცენტი კმაყოფილია ქუჩების სისუფთავით.
რაც შეეხება საზოგადოებრივი ტრანსპორტის მუშაობას, ამ შემთხვევაში, შედარებით დიდი რაოდენობა გამოხატავს თავის დადებით დამოკიდებულებას ტრანსპორტის მუშაობის მიმართ.
მანქანების ტექნიკურ დათვალიერებას აუცილებლობად მიიჩნევს გამოკითხულთა 68 პროცენტი, 25 პროცენტი კი თვლის რომ ამის აუცილებლობა არ არის.
საკუთარ საცხოვრებელ გარემოში გამწვანების, პარკებისა და სკვერების მოწყობის კუთხით უკმაყოფილოა 40 პროცენტი, 28 პროცენტი მიიჩნევს, რომ საერთოდ არ არსებობს გამწვანებული სივრცე მის ირგვლივ, ხოლო 29 პროცენტი კმაყოფილია.
წყლის სისუფთავეს, რომელსაც მოიხმარს, ენდობა გამოკითხულთა 63 პროცენტი, 31 პროცენტი კი ფიქრობს, რომ მის მიერ მოხმარებული წყალი არასაკმარისად სუფთაა.
კითხვაზე, რამდენად კმაყოფილი ან უკმაყოფილო ხართ იმ საბავშვო ბაღში არსებული პირობებით, სადაც თქვენი შვილი დადის, პასუხები ასე გადანაწილდა: 67% კმაყოფილია, 17- უკმაყოფილო, ხოლო 14% მდგომარეობას მისცა შეფასება საშუალო.
კვლევა მოიცავდა კითხვას თბილისში განსახორციელებელი ინფრასტრუქტურული პროექტების, კერძოდ „პანორამა თბილისის“ შესახებ. კვლევის ავტორები დაინტერესდნენ, ემხრობიან თუ არა გამოკითხული რესპოდენტები ამ პროექტის განხორციელებას. თბილისელების 41 % მიიჩნევს, რომ პროექტი არ უნდა განხორციელდეს, 32% მისაღებია. 26% ამ საკითხთან დაკავშირებით პოზიცია არ გააჩნია.
გამოკითხული მოსახლეობის 71 პროცენტს მიაჩნია, რომ საქართველოს პარლამენტი თბილისში უნდა მუშაობდეს, 20 პროცენტის აზრით კი ჯობია ისევ ქუთაისში დარჩეს.
