ოზურგეთის მუნიციპალიტეტის 2012 წლის ბიუჯეტში და შესყიდვების წლიურ გეგმაში ცვლილებები შევიდა. 16 საათზე დაწყებულმა საკრებულოს სხდომამ და საკითხების სიმრავლემ დეპუტატები ხუმრობის განწყობაზე დააყენა: “არ გვინდა პროექტების ბოლომდე წაკითხვა, გვიანია, ყინავს და სოფლებში ვართ წასასვლელი,” _ ფრაქცია “მაჟორიტარების” თავმჯდომარის ეს მოთხოვნა ყველაზე მნიშვნელოვან საკითხებს შეეხო, თორემ რამდენიმეწუთიანი პრეზენტაციების დროს, სახლში არც ერთ მათგანს არ ეჩქარებოდა.
ოზურგეთის მუნიციპალიტეტის საკრებულოს სხდომაზე, რომელიც გასული კვირის ოთხშაბათს გაიმართა, დღის წესრიგით გათვალისწინებული 15 საკითხის ნაცვლად, დეპუტატებმა კენჭი მხოლოდ 14 საკითხს უყარეს. ოზურგეთის მუნიციპალიტეტის ისტორიული მუზეუმის სტრატეგიული განვითარების გეგმის დამტკიცება, ხმათა უმრავლესობით, მომდევნო სხდომისთვის გადაიდო.
დღის წესრიგის წაკითხვის შემდეგ, საკრებულოს თავმჯდომარემ სხდომა გახსნილად გამოაცხადა და ოზურგეთის მუნიციპალიტეტის გამგეობის საფინანსო-საბიუჯეტო სამსახურის უფროსს, ლია ქათამიძეს ტრიბუნასთან უხმო.
ქათამიძე საკრებულოს წევრებს 2012 წლის დამტკიცებულ ბიუჯეტში გასახორციელებელი ცვლილებების და დამატებების შესახებ ესაუბრა: “2012 წლის 27 თებერვლის მონაცემებით, ბიუჯეტში მობილიზებულია სასოფლო-სამეურნეო დანიშნულების მიწის არასასოფლო-სამეურნეო მიზნით გამოყოფისას, სანაცვლო მიწის ათვისების ღირებულებისა და მიყენებული ზიანის ანაზღაურებიდან მიღებული შემოსავალი _ 14 700 ლარი. მიზანშეწონილად მიგვაჩნია, 2012 წლის ბიუჯეტის საშემოსავლო ნაწილი 14 700 ლარით გაიზარდოს. მიღებული შემოსავლიდან დაფინანსდეს სარეზერვო ფონდი 10 000 ლარით. ბატონო ალეკო, მოგახსენებთ, რომ 2012 წლის ბიუჯეტში სარეზერვო ფონდი განსაზღვრული იყო მხოლოდ 30 000 ლარით, რომლის მნიშვნელოვანი ნაწილი, დიდთოვლობის გამო, გახარჯულია. ამიტომ გამგეობას მიზანშეწონილად მიაჩნია, სარეზერვო ფონდი, ამ ეტაპისთვის, მინიმუმ, 10 000 ლარით გაიზარდოს. ასევე, დაფინანსდეს გამგეობის ტრანსპორტის მოვლა-შენახვის ხარჯი (სათადარიგო ნაწილების შეძენა) _ 1 000 ლარი, განათლების ხელშეწყობის პროგრამა (მცირეკონტიგენტიანი სკოლების ხელშეწყობა) _ 3 700 ლარი. დანარჩენი ნაწილი არის შიდა მუხლობრივი ცვლილებები”, _ ქალბატონ ლიას არ უსაუბრია სხვა ცვლილებებზე, რომელიც პროექტში იყო აღნიშნული.
“სამსახურეობრივი აუცილებლობიდან გამომდინარე (გამგეობაში შემოსულია სამსახურის უფროსების წერილები, რომლებიც ითხოვენ 2012 წლის ბიუჯეტით გამოყოფილი თანხებიდან მუხლობრივი ცვლილებების გატარებას), 2012 წლის ბიუჯეტით, სახანძრო-სამაშველო დაცვის სამსახურში სახანძრო მოტოპომპების შესაძენად გამოყოფილი თანხიდან, 1 200 ლარი გადატანილ იქნას შეშის შესაძენად, ხოლო 300 ლარი, მცირეფასიანი საოფისე ინვენტარის შესაძენად. ასევე, გაზის მონტაჟისთვის გამოყოფილი 2 500 ლარი გამოყენებულ იქნას შტატგარეშე მომუშავეთა ანაზღაურებისთვის. შრომის, ჯანმრთელობის და სოციალური დაცვის, ლტოლვილთა და იძულებით გადაადგილებულ პირთა სამსახურის ოფისის ხარჯებში შემცირდეს მცირეფასიანი საქონლის შეძენის ხარჯი 400 ლარით. აღნიშნული თანხა გადატანილი იქნას კომპიუტერული ტექნიკის შეძენის ხარჯებში. ქონების მართვის სამსახურის ოფისის ხარჯებში შემცირდეს მცირეფასიანი საქონლის შეძენის ხარჯი 300 ლარით, აღნიშნული თანხა გადატანილი იქნას კომპიუტერული ტექნიკის შეძენის ხარჯებში. ადმინისტრაციულ სამსახურში საკანცელარიო ნივთების შესყიდვების ეკონომიიდან 100 ლარი გადატანილი იქნას სატელეფონო მომსახურების ხარჯში, ხოლო 200 ლარი სამეურნეო და მცირეფასიანი საქონლის შეძენის ხარჯებში. გამგეობის ხელმძღვანელობის სახელფასო მუხლიდან 5400 ლარი გადატანილ იქნას საპრემიო მუხლში, სოფლის მეურნეობის განვითარების სამსახურში შემცირდეს მონობარათების შეძენის ხარჯი 100 ლარით, საკანცელარიო საქონელი _ 200 ლარით, დაემატოს კომპიუტერული ტექნიკის შეძენის ხარჯებს 200 ლარი, ხოლო მცირეფასიანი საქონლის შეძენის ხარჯებს 100 ლარი. სახელმწიფო შესყიდვების და მატერიალურ ტექნიკური უზრუნველყოფის სამსახურში შემცირდეს მცირეფასიანი საქონლის შეძენის ხარჯი 300 ლარით, კარტრიჯების დამუხტვის ხარჯი _100 ლარით, ხოლო 400 ლარი გადატანილ იქნას კომპიუტერული შეძენის ხარჯებში”, _ ეწერა პროექტში, რომელიც წაკითხვის გარეშე დამტკიცდა საკრებულოს სხდომაზე.
ამის შემდეგ, ალეკო მამეშვილმა ბიუჯეტში შესატან კიდევ ერთ ცვლილებაზე ისაუბრა: _ მოგეხსენებათ, რომ სოფლის განვითარების მხარდამჭერი პროგრამა რამდენიმე წელია, ხორციელდება. დღეისთვის მიმდინარეობს საჯარო შეხვედრები მოსახლეობასთან, სადაც ხდება ძირითადი პრობლემების წამოწევა, ამის შემდეგ ჩვენი სამსახურის მიერ, მოხდება თითოეული პრობლემისთვის ხარჯთაღრიცხვის მომზადება. ერთი თვის ვადაში, ჩვენ მოგვიწევს კიდევ გასვლები მოსახლეობასთან, სადაც წარვუდგენთ მათ მიერ დასახელებული პრობლემების გადაჭრა რა ღირებულების დაფინანსებას საჭიროებს. გვეცოდინება და ვიცით, თითოეულ სოფელში რამდენი ლარია გამოყოფილი, აქედან გამომდინარე, მოსახლეობა თვითონ გადაწყვეტს, რა პრობლემების გადაწყვეტა შეიძლება, _ აღნიშნა საკრებულოს თავმჯდომარემ.
საქართველოს მთავრობის განკარგულებით, აღნიშნული პროგრამის ფარგლებში ოზურგეთის მუნიციპალიტეტს 1381415 ლარი გამოეყო, რაც გასულ წელთან შედარებით 296 000 ლარით არის გაზრდილი.
სახელმწიფო შესყიდვების 2012 წლის გეგმაში ცვლილების შეტანის შესახებ გამგეობის შესყიდვების სამსახურის უფროსმა, ამირან გირკელიძემ ისაუბრა.
მისი თქმით, “ადმინისტრაციული სამსახურის მოთხოვნა გაითვალისწინეს და ამავე სამსახურისთვის საოფისე მაგიდის შესაძენად გათვალისწინებული 300 ლარი კარტრიჯების დამუხტვის ხარჯებში გადაიტანეს, ხოლო ამავე სამსახურის საკანცელარიო ხარჯებში დარჩენილი ეკონომიიდან ერთ ტელეფონს დადგამენ, რომლის სავარაუდო ღირებულება 220 ლარია. აპარატის შეძენის სავარაუდო ღირებულება კი _ 50 ლარი. ასევე გაითვალისწინეს სოფელ ჭანიეთის რწმუნებულის თხოვნა და შეშის ღუმელის, საკვამური მილის და კარის საკეტის ნაცვლად, ერთ მობილურ ტელეფონს შეუძენენ, რომლის სავარაუდო ღირებულებაც 126 ლარია. სამხედრო სამსახურს კი ერთი პერსონალური კომპიუტერის ნაცვლად, 1500 ლარიან ლეპტოპს შეუძენენ. სახელმწიფო შესყიდვების და მატერიალურ- ტექნიკური უზრუნველყოფის სამსახურის თხოვნით, შემცირდა ამავე სამსახურისთვის გათვალისწინებული კომპიუტერის მაგიდის შეძენის და კარტრიჯების დამუხტვის ხარჯი, სულ 200 ლარით. გარდა ამისა, გეგმიდან ამოიღეს: ნაგვის ურნები, ელექტრო ჩაიდანი, კარის საკეტები, “შტეფსელები” და კედლის თარო, საერთო ჯამი _ 270 ლარი. აღნიშნული თანხიდან 345 ლარით გაიზარდა ლეპტოპის შეძენის ხარჯი, ხოლო მრავალფუნქციური პრინტერისა _ 125 ლარით. გარდა ამისა, ქონების მართვის სამსახურის თხოვნაც გაითვალისწინეს და 310 ლარი კომპიუტერული ტექნიკის შეძენისთვის გამოყვეს. ასევე სოციალური სამსახურის მოთხოვნაც დააკმაყოფილეს და სხვადასხვა ნივთების შესასყიდი თანხიდან 415 ლარი კომპიუტერული ტექნიკის შესაძენად გადაიტანეს. ხოლო ახლად შექმნილ სოფლის მეურნეობის სამსახურისთვის 1900 ლარის ღირებულების საკანცელარიო თუ საოფისე ნივთს შეიძენენ. მუნიციპალიტეტის გამგეობის ავტომანქანის რემონტის ხარჯი 200 ლარით გაიზარდა, საბურავების შეძენის ხარჯი კი _ 800 ლარით”.
ბიუჯეტში ცვლილებების შეტანის შემდეგ, ოზურგეთის დასუფთავების სამსახურის უფროსმა, ვოვა სალუქვაძემ დასუფთავების სექტორში დაგეგმილ და მიმდინარე მოვლენებზე ისაუბრა.
ოზურგეთის მუნიციპალიტეტის არასამეწარმეო (არაკომერციული) იურიდიული პირის სკოლამდელი სააღმზრდელო-საგანმანათლებლო ცენტრის და კომუნალური მომსახურების ცენტრის სტრატეგიული განვითარების გეგმის დამტკიცებამდე, აღნიშნული აიპიების წარმომადგენლებმა პრეზენტაცია მოაწყვეს და მომავალი 5 წლის სამოქმედო გეგმის დეტალებზე ისაუბრეს.
აღნიშნულ აიპიებს გეგმის შემუშავებაში დახმარება არასამთავრობო ორგანიზაცია “ახალგაზრდა მეცნიერთა კლუბის” თავმჯდომარემ, მინდია სალუქვაძემ გაუწია.
გეგმის მისამართით საკრებულოს ოპოზიციონერ დეპუტატებს შენიშვნები არ ჰქონიათ, თუმცა პრეზენტაციის დასრულებამდე ლელა ნაცვალაძემ კომენტარი გააკეთა, რასაც საკრებულოს თავმჯდომარის მხრიდან რეპლიკა მას შემდეგ მოჰყვა, რაც ამ უკანასკნელს, შეკითხვები არა აიპიების სტრატეგიულ გეგმასთან დაკავშირებით, არამედ, გამგეობის პრემიების გაზრდასთან მიმართებაში ჰქონდა, რომელიც ისე დაამტკიცეს საკრებულოს წევრებმა, რომ ამის შესახებ დარბაზში კრინტიც არ დაუძრავთ.
_ შვილო, შენი მისამართით არანაირი პრეტენზია არ მაქვს, უბრალოდ, ახლა წავიკითხე და არ შემიძლია, არ გამოვეხმაურო პრემიების გაზრდის საკითხს. ბიუჯეტის უმეტესი ნაწილი თქვენს ხელფასებში იხარჯება და საპრემიო თანხაც გაზარდეთ? _ იკითხა ნაცვალაძემ.
_ შვილო არა, დეიდული, _ შეეპასუხა მამეშვილი და დააკონკრეტა, რომ საკრებულოს დეპუტატი სხდომამდე უნდა გასცნობოდა პროექტებს და შენიშვნებიც ამის შემდეგ გამოეთქვა.
