“ქართული ოცნების” ოფისების გახსნა საქართველოს სხვადასხვა ქალაქებში უკვე დაიწყო. ჯერჯერობით, ოფისის საზეიმო გახსნა ჭიანურდება გურიის სამივე მუნიციპალიტეტში. ჩვენ მიერ მოპოვებული ინფორმაციით, ყველაზე დიდი “კასტინგი” ოზურგეთშია. ამ ეტაპზე რამდენიმე კანდიდატის შესახებ საუბრობენ, ხდება მათი წარსულის შესწავლა.
“გურია ნიუსის” ინფორმაციით, “გურიის თავისუფალი დემოკრატების” ლიდერი თემურ სალუქვაძე, “ეროვნული ფორუმის” ოზურგეთის რაიონული ორგანიზაციის თავმჯდომარე შოთა გოგიბერიძე და ოზურგეთელი კოტე შარაშენიძე თბილისში იმყოფებოდნენ. ჩვენი წყაროს თქმით, ამ დროისთვის ვერ დგინდება, თუ ვინ ჩაუდგება სათავეში “ქართულ ოცნებას” გურიაში.
“რესპუბლიკელი” ტიფო მიქატაძე: _ ოფისების გახსნა, რაც მთავარია, უკვე დაწყებულია საქართველოს სხვადასხვა ქალაქში და აუცილებლად გაიხსნება გურიაშიც. პოლიტიკური პარტიების წარმომადგენლებთან სათავო ოფისებში მიმდინარეობს შეხვედრები.
_ ბატონო ტიფო, არის თუ არა წარდგენილი თქვენი კანდიდატურა “ქართული ოცნების” ოზურგეთის ოფისის ხელმძღვანელის პოსტზე?
_ პარტიები თავიანთ კანდიდატებს წარადგენენ, ალბათ, ჩემს კანდიდატურას წარადგენს “რესპუბლიკური პარტია”.
“გურიის თავისუფალი დემოკრატების” თავმჯდომარე, თემურ სალუქვაძე “გურია ნიუსთან” სატელეფონო საუბრისას ამბობს, რომ სათავო ოფისში შეხვედრები და თათბირები ტარდება: _ მე მაქვს ინფორმაცია, რომ მიმდინარეობს გასაუბრება, შეხვედრები, _ გვითხრა თემურ სალუქვაძემ. მან არ დაადასტურა ინფორმაცია, რომ მისი კანდიდატურაც იხილება “ქართული ოცნების” ოზურგეთის ოფისის ხელმძღვანელად.
“გურია ნიუსი” შოთა გოგიბერიძეს იმ დროს დაუკავშირდა, როცა ის თბილისიდან ოზურგეთში მოემგზავრებოდა: _ შეხვედრაზე ვიყავი “ეროვნული ფორუმის” ლიდერებთან. იხილებოდა მიმდინარე საკითხები, რეგიონში გასახორციელებელი საქმიანობები.
_ თქვენ, შესაძლებელია, “ქართული ოცნების” ხელმძღვანელად გიხილოთ?
_ არ ვიცი, ასეთ საკითხზე არ მქონია საუბარი. შეიძლება, სადმე იყო ეს საუბარი. დიდი ოფისია.
_ ეს შეხვედრა “ქართულ ოცნების” სათავო ოფისში შედგა?
_ ჩემს ლიდერებთან შეხვედრა შედგა გაერთიანებული ბლოკის შტაბში.
_ ანუ “ქართული ოცნების” შტაბში.
_ დიახ, იქ შევხვდი “ეროვნული ფორუმის” ლიდერებს.
_ ბატონო შოთა, როგორც გავიგეთ, “ქართულ ოცნებაში” შეხვედრას ოპოზიციის სხვა ადგილობრივი წარმომადგენელიც ესწრებოდა.
_ არ ვიცი, მე შევხვდი “ფორუმის” ლიდერებს. არ არის გამორიცხული, სხვა პარტიის წარმომადგენლებსაც ჰქონოდათ შეხვედრები. საარჩევნო შტაბის სტრუქტურები და ორგანიზაციული სამსახურის საკითხები გაურკვეველია. ცოტა ნაადრევად მეჩვენება ხელმძღვანელობაზე საუბარი.
კოტე შარაშენიძე ვერ გვიდასტურებს ინფორმაციას მისი კანდიდატურის დამტკიცებაზე, მაგრამ არც გამორიცხავს: _ დადასტურებით ვერ გიდასტურებთ. არაფერი არ არის გამორიცხული.
_ სათავო ოფისში მოხდა თქვენი შეხვედრა “ქართული ოცნების” წარმომადგენლებთან?
_ მე სად ვიყავი და როგორ ვიყავი, ეს სხვა თემაა. ვნახოთ, რა იქნება. ჯერ გადასაწყვეტია ყველაფერი.
ჩვენი წყაროს თქმით, არ არის გამორიცხული, ლანჩხუთში “ქართული ოცნების” ხელმძღვანელად სოსო ბოლქვაძე დაინიშნოს.
ის, წლების წინ, ლანჩხუთის მერი იყო, ახლა კი საქველმოქმედო ორგანიზაცია “ატუში” მუშაობს.
_ მე ვმუშაობ ორგანიზაცია “ატუში,” სადაც ჩემს მოვალეობას ვასრულებ. ჯერჯერობით, ამ თემაზე ვერაფერს გეტყვით, რადგან არანაირი მოლაპარაკებები არ მიდის, _ გვითხრა ბოლქვაძემ.
