დღეს, შენობა, სადაც "ნაციონალური მოძრაობის" ჩოხატაურის ოფისია განთავსებული, გამოძიებისთვის ამ დრომდე დაუდგენელმა უცნობმა პირებმა დააზიანეს.
"მკვლელები, ქათმები" _ ეს წარწერები თითქმის მთლიან ფასადზეა გაკეთებული.
_ დროშაც კი ძირს დაგვხვდა დაგდებული. ჩვენი ოფისი მეორე სართულზეა განთავსებული, როგორც ჩანს, იქ ვერ შეძლეს ასვლა და პირველ სართულზე გააკეთეს წარწერები, _ აღნიშნა ჩვენთან საუბრისას პარტიის რაიონული ორგანიზაციის თავმჯდომარემ დიმიტრი კორიფაძემ.
ადამიანები, რომლებმაც ოფისი დააზიანეს, სავარაუდოდ ადგილობრივები არ იყვნენ, რადგან წარწერები შენობის პირველ სართულზეა გაკეთებული და არა იქ, სადაც პარტიის ოფისია განთავსებული.
შენობა ჩოხატაურის მუნიციპალიტეტის სოფლის მეურნეობის სამსახურის უფროსის, საკრებულოს წევრის მანანა მინდაძის ოჯახის საკუთრება:
_ მეორე სართული რამდენიმე წელია ხელშეკრულების საფუძველზე "ნაციონალურ მოძრაობას" აქვს ნაქირავები. პირველი სართული დაკეტილი იყო და არ ვიცი მე რას მერჩოდნენ, რატომ დამიზიანეს საკუთრება, _ ამბობს ჩვენთან საუბრისას მინდაძე.
_ ქალბატონო მანანა, შენობაზე გაკეთებულ წარწერას "ქათამი" თქვენს სამსახურთან და სოფლის მეურნეობასთან ხომ არ აქვს შეხება? მით უმეტეს, რომ მეორე სართულს, სადაც პარტიის ოფისია განთავსებული არავინ შეხებია…
_ თქვენც ხომ იცით, რომ სოფლის მეურნეობა არაფერ შუაშია! თუმცა, რაც მოხდა ძალიან ცუდი ფაქტია. მეუღლეს გავესაუბრები და შემდეგ აუცილებლად მივმართავ შესაბამის ორგანოებს, რადგან მე საკმაოდ მნიშნელოვანი ზარალი მომადგა, _ დასძინა მინდაძემ.
მანანა მინდაძე ჩოხატაურის მუნიციპალიტეტის საკრებულოში "თავისუფალი დემოკრატების" სიით მოხვდა. თუმცა, პარტია მას შემდეგ დატოვა, რაც "დემოკრატები" კოალიციას გამოეთიშნენ.
