კონკურსის "ჩემი სოფლის ისტორიის" მეორე დღეს სხვადასხვა ნომინაცია გამარჯვებულები სპეციალურმა ჟიურიმ გამოავლინა.
ოზურგეთის მუნიციპალიტეტის კულტურის, სპორტისა და ტურიზმის განვითარების ცენტრის დირექტორის ავთანდილ სირბილაშვილის თქმით, კონკურსში ოზურგეთის მუნიციპალიტეტის 24 თემი მონაწილეობდა.
სოფელში მცხოვრებ ახალგაზრდებს შევთავაზეთ წარმოედგინათ თავისი ძალებით მოპოვებული საინტერესო ისტორიები მშობლიურ სოფელზე და საინტერესო ადამიანებზე. პროექტმა დიდი დაინტერესება გამოიწვია და მასში მუნიციპალიტეტის თითქმის ყველა სოფელი ჩაერთო. _ გვითხრა ავთანდილ სირბილაშვილმა.
"ჩვენი რეგიონის ისტორია თოთოეული ჩვენგანის სოფლიდან იწყება. მივესალმები ამ არაჩვეულებრივ პროექტს და მადლობას ვუხდი იდეის ავტორებს, მონაწილეებს. წარმოდგენილ ნამუშევრებში ჩანდა თუ რამხელა პასუხისმგებლობით მიუდგნენ ბავშვები დასახულ ამოცანას. ძველი იტორიული თუ დოკუმენტური მასალის გამოყენებით ჩვენს თვალწინ გააცოცხლეს სოფლების ისტორია, ძველი დიდება, სოფლის კოლორიტები. იყო ახალი აღმოჩენები, საინტერესო მიგნებები და ორიგინალური გადაწყვეტა. ჩვენ ვიქნებით ყოველთვის მზად მსგავსი პროექტების მხარდასაჭერად", – აღნიშნა ჟურნალისტებთან საუბრის დროს ოზურგეთის მუნიციპალიტეტის გამგებელმა მერაბ ჭანუყვაძემ.
აქტიური მონაწილეობისთვის დიპლომი და წიგნები გადაეცათ გურიანთის, შემოქმედის, სოფელ მერიას, სოფელ ბახვის, სოფელ გომის, სოფელ თხინვალის, სოფელ ქვედა ბახვის, სოფელ ნაგომრის, დაბა ნარუჯას, სოფელ მაკვანეთის სკოლის მოსწავლეებს.
ორ ნომინაციაში გაიმარჯვა და წარმატებას მიაღწია სოფელ ლიხაურის საჯარო სკოლის მოსწავლემ ლადო ლომჯარიამ. საუკეთესო ფილმის და საკონფერენციო თემის ავტორი აღმოჩნდა. საუკეთესო პრეზენტაცია – სოფელ ბოხვაურის საჯარო სკოლა, საუკეთესო ისტორიის ფურცელი – შრომის საჯარო სკოლა, ორიგინალური გადაწყვეტილება – სოფელ ბაღდათის საჯარო სკოლა, უნიკალური მასალის აღმოჩენა – სოფელ ჭანიეთის საჯარო სკოლა, საუკეთესო ფოტო მასალა – დაბა ლაითური, ნომაციაში "სიუპრიზი" – გაიმარჯვა ვაკიჯვრის საჯარო სკოლამ. გამარჯვებულებს ფასიანი საჩუქრები და დიპლომები გადაეცა.
ა.(ა).ი.პ. კულტურის, სპორტის და ტურიზმის განვითარების ცენტრის ინიციატივით და ოზურგეთის მუნიციპალიტეტის გამგეობის მხარდაჭერით დაიწყო კონკურსი "ჩემი სოფლის ისტორია" .
