სამეგრელო-ზემო სვანეთის ყოფილი გუბერნატორი თენგიზ გუნავა ბოლო დღეებში უკრაინული საიტებით გავრცელებულ წამების კადრებზე ამბობს, რომ ვინც ეს დანაშაული ჩაიდინა, ყველა დასასჯელია.
გუნავა "გურია ნიუსთან" საუბრისას აღნიშნავს, რომ მის წილ პასუხისმგებლობას ისიც გრძნობს.
"მე არასოდეს გავქცევივარ პასუხისმგებლობას. მინდა კიდევ ერთხელ ხმამაღლა ვთქვა, რომ ვინც ეს ჩაიდინა ყველა დასასჯელია. ჩვენ თავის დროზე ეს რომ გვცოდნოდა, ბუნებრივია, ყველა დაისჯებოდა, რა თქმა უნდა, ძალიან მკაცრად. ისე კი არა, დღეს რომ წახალისებული არიან მთავარი მწამებლები, მათ შორის, ბედუკაძიც დაწყებული და სხვებით დამთავრებული. ესენი გარეთ დატოვეს და ხელისუფლებამ წაახალისა, ის, რაც დღეს უკრაინულ საიტებზე გავრცელდა სრული პასუხისმგებლობა ეკისრება ხელისუფლებას თავიდან ბოლომდე. ამის შემდეგ ხედავთ, რომ "ნაციონალური მოძრაობის" ოფისებზე დაიწყო თავდასხმები რეგიონებში", _ ამბობს გუნავა.
კითხვაზე – ხომ არ უკავშირდება "რუსთავი 2"-თან, რეგიონებში განვითარებული მოვლენები და წამების კადრების გავრცელება ერთმანეთს, გუნავა ამბობს, რომ "ეს ყველაფერი ერთ კონტექსტშია".
"მგონი უკვე პატარა ბავშვმაც იცის, რომ ეს ქმედებები სიტყვის თავისუფლების წინააღმდეგ არის მიმართული. მათ უნდათ „რუსთავი 2“ ხელში ჩაიგდონ და ხალხმა სიმართლე არ გაიგოს. ეს მეტყველებს იმაზე, რომ ბიძინა ივანიშვილმა ეს თავის სასახლეში გადაწყვიტა, გასცა ბრძანება და დაიწყო ეს მოძრაობა. ქართველი ხალხი ამას არ დაუშვებს და ჩვენ ბოლო წვეთამდე ვიბრძოლებთ იმისთვის, რომ სიტყვის თავისუფლება იყოს დაცული. რუსთავი 2-ის წინააღმდეგ მიმართული პროცესები, თავდასხმები, NDI-ს კვლევის შედეგების გამოცხადება ერთმანეთთანაა კავშირში. პრობლემა აქვს "ქართულ ოცნებას“იმ დაპირებებთან მიმართებაში, რომელიც მან უხვად დაარიგა 2012 წელს. დღეს უკვე ჩიხში არიან შესულები და ამიტომ გადავიდნენ ასეთ უმსგავსო ქმედებებზე. როგორც დაამთავრებენ, ამასაც დაინახავს ქართველი ხალხი. ბუნებრივია, ისინი მოშორდებიან ხელისუფლებას ახლო მომავალში", _ განაცხადა გუნავამ "გურია ნიუსთან" საუბრისას.
