დაახლოებით 50-მდე ჩოხატაურელს, კონტროლის პალატის უწყება ამ დილით მიუვიდათ. უწყების თანახმად, ეს ადამიანები ხვალ, წერეთლის ქუჩა #2-ში, პირველ სართულზე არიან დაბარებულები, თუმცა მითითებული არ არის, რომელ ქალაქში.
აღსანიშნავია, რომ უწყება დევს კონვერტში, რომელსაც არ აწერია კონტროლის პალატის მისამართი, ხოლო თავად უწყება არ არის დაბეჭდილი კონტროლის პალატის ბლანკზე, არ არის მითითებული რეგისტრაციის ნომერი და რეგისტრაციაში გატარების თარიღი. უწყებას ხელს აწერს საქართველოს კონტროლის პალატის პოლიტიკური პარტიების ფინანსური მონიტორინგის სამსახურის უფროსის მოადგილე, ვინმე გიორგი ამირანაშვილი
ამ მისამართზე ჩოხატაურის მუნიციპალიტეტის გამგეობა მდებარეობს. გამგეობაში არავინ იცის რა ხდება. ჩოხატაურის მუნიციპალიტეტის საკრებულოს თავმჯდომარის, ანტონ ხუნდაძის თქმით, ის მსგავს ინფორმაცის არ ფლობს:
_ არ ვიცი, პირველად მესმის, რომ კონტროლის პალატა ჩოხატაურელებს იბარებს, მით უმეტეს, მუნიციპალიტეტის შენობაში, _ გვითხრა ხუნდაძემ.
მუნიციპალიტეტის გამგებელის ლელა იმედაშვილის თქმით, კონტროლის პალატის გურიაში ვიზიტის შესახებ მცირე ინფორმაცია აქვს:
_ მე კონტროლის პალატის გურიაში შემოსვლის თაობაზე ინფორმირებული ვარ. ამ ეტაპზე ვიცი მხოლოდ ის, რომ დღეს ლანჩხუთის მუნიციპალიტეტში არიან. სხვას ამ ეტაპზე ვერაფერს გეტყვით.
კონტროლის პალატის თავმჯდომარის მოადგილის, დევი ვეფხვაძის თქმით, აღნიშნულის შესახებ ის საქმის კურსში არ არის. ვეფხვაძემ არც ის იცის, რატომ არის მითითებული უწყებაზე გამგეობის მისამართი.
კონტროლის პალატის პრესამსახურის ხელმძღვანელი, ფატი მამიაშვილი ამბობს, რომ სავარაუდოდ, გამგეობის შენობაში ის ჯგუფი მივა, რომელიც პალატის ინტერესში მოხვედრილ ადამიანებს გაესაუბრება. მამეიშვილი არ აკონკრეტებს, რატომ არიან ეს ადამიანები დაბარებულები.
როგორც გავარკვიეთ, დაბარებულების უმრავლესობას “ქართულ ოცნებასთან” აქვს კავშირი, თუმცა, მათ შორის არიან ისეთები, რომლებიც არანაირ პოლიტიკურ საქმიანობას არ ეწევიან და არც რომელიმე საჯარო ან კერძო სამსახურში მუშაობენ.
“გურია ნიუსის” ინფორმაციით, ამ წუთებში, ლანჩხუთის მუნიციპალიტეტის გამგეობის მესამე სართულზე კითხავენ იმ ლანჩხუთელებს, რომლებიც კონტროლის პალატის ინტერესის სფეროში მოექცნენ.
რესპუბლიკური პარტიის ლანჩხუთის ორგანიზაციის ხელმძღვანელის, რომან ბიწაძის თქმით, პოლიციას გამგეობის მესამე სართული აქვს “ოკუპირებული” და იქ გარეშე პირებს არ უშვებენ:
_ მე ოპერაცია გავიკეთე და თბილისში ვიყავი. ჩემმა დამ შემატყობინა გუშინ, რომ კონტროლის პალატიდან შეტყობინება მოვიდა. იქ წერია, რომ პარტიების თვალთმაქცურ დაფინასებასთან დაკავშირებით ვარ დაბარებული. დღეს ათ საათზე უნდა მივსულიყავი, მაგრამ ფიზიკურად არ ვარ ლანჩხუთში. მაქვს ინფორმაცია, რომ ხალხი მიდის იქ. მესამე სართული მთლიანად აქვს ოკუპირებული პოლიციას. იქ არავის არ უშვებენ და დაკითხვები გრძელდება ორ საათზე მეტ ხანს.
_ რამდენი ადამიანია დაბარებული?
_ ჩემი მონაცემებით, რესპუბლიკელებიდან დაბარებულია 8 ადამიანი, თუმცა, მათ შორის არიან ისეთები, რომლებსაც არანაირი შეხება არ ჰქონიათ არც პარტიის დაფინანსებასთან, არც ხელწერების შეგროვებასთან. ინფორმაცია პალატას მიღებული აქვს, როგორც ჩანს, სოფლის რწმუნებულების ან ვიღაც მოენებიის დონეზე, რომ ესა და ეს ადამიანი დადიოდა ოპოზიციის ოფისებში. რაზე დადიოდა ან რამე, არ იციან. მე დღეს უკვე შევიტანე ცენტრალურ ოფისში საჩივარი, რომ უწყება, რომელიც მივიღეთ კანონს არ შეესაბამება.
ჯერჯერობით უწყებები არ დარიგებულა ოზურგეთში, თუმცა როგორც ჩვენმა წყარომ გვითხრა, უწყება ოზურგეთელებს რამდენიმე დღეში მიუვათ.
“გურია ნიუსი” დეტალებს ამ წუთებში არკვევს და ვრცელ ინფორმაციას მიმდინარე მოვლენების შესახებ უახლოეს ხანში შემოგთავაზებთ.
