2012 წლის 12 მარტიდან, გურიაში დაიწყო ხელისუფლების მიმართ კრიტიკულად განწყობილი მოქალაქეების მასობრივი დაბარება და დაკითხვა, რომელიც საქართველოს კონტროლის პალატის პოლიტიკური პარტიების ფინანსური მონიტორინგის სამსახურის ეგიდით, ადგილობრივი თვითმმართველობების შენობებში ეწყობა. უწყება, რომლითაც მოქალაქეები ახსნა-განმარტების მისაცემად არიან დაბარებულები, არაა დამოწმებული ოფიციალური ბეჭდით, არ შეიცავს თარიღს, რეგისტრაციის ნომერს, გამოცხადების ზუსტ მისამართს, დაბარების მოტივაციას (თან ერთვის უწყების ასლი).
გუშინ ლანჩხუთში, დღეს კი ჩოხატაურში, ადმინისტრაციული შენობები პოლიციელებით, სხვა ძალოვანი უწყებების წარმომადგენლებითაა გარშემორტყმული, ჟურნალისტებს, და რაც მთავარია, უწყებით გამოძახებული მოქალაქეების ადვოკატებს არ ეძლევათ უფლება შევიდნენ შენობაში.
გუშინ დაკითხულ მოქალაქეთა საუბრებიდან ირკვევა, რომ დაკითხვას, კონტროლის პალატის წარმომადგენელთა გარდა, ესწრებიან ძალოვანი უწყებების წარმომადგენლები. თითოეული ადამიანის დაკითხვა რამდენიმე საათის განმავლობაში მიმდინარეობს (ერთ-ერთი მათგანის მონათხრობის ვიდეოჩანაწერი შეგიძლიათ ნახოთ ლინკზე _ http://www.gurianews.com/index.php?option=com_content&view=article&id=3240:2012-03-12-20-13-33&catid=122:news-tv&Itemid=185 ).
მნიშვნელოვანია, რომ დაბარებულთა შორის არიან ადამიანები, რომლებიც არც ერთი პოლიტიკური პარტიის წევრები არ არიან; უწყება მიუვიდა გაზეთ “გურია ნიუსის” გამომცემლის, საქართველოს რეგიონული მედიის ასოციაციის თავმჯდომარის, სამოქალაქო კამპანიის “ეს შენ გეხება” ერთ-ერთი ორგანიზატორი ორგანიზაციის, კოალიცია “არჩევნის თავისუფლებისთვის” წარმომადგენლის, ია მამალაძის ძმას _ ზაალ მამალაძეს, რომელიც არ არის არც ერთი პარტიის წევრი, არაა ჩართული არავითარ პოლიტიკურ პროცესებში; მისი საზოგადოებრივი აქტიურობა უკავშირდება არასამთავრობო ორგანიზაციის – “თემი და თვითმმართველობა” საბჭოს წევრობას; ასევე, გაზეთ “გურია ნიუსში” სამეურნეო საქმეებში დახმარებას და ერთ-ერთ პროექტში, არანორმირებული სამუშაო გრაფიკის პირობებში, რედაქციის თანამშრომლების ტრანსპორტით უზრუნველყოფას.
ამიტომ, გვაქვს საფუძვლიანი ეჭვი, ვივარაუდოთ, რომ ხელისუფლება, საქართველოს კონტროლის პალატის მეშვეობით, ცდილობს, ზემოქმედება მოახდინოს “გურია ნიუსის” გამომცემელზე და კამპანიის – “ეს შენ გეხება” აქტიურ მიმდინარეობაზე.
მიგვაჩნია, რომ ამგვარი მასობრივი, უკანონო ქმედება საფუძველშივე გამორიცხავს 2012 წლის საპარლამენტო არჩევნების თავისუფალ, კონკურენტულ და გამჭვირვალე გარემოში ჩატარების შესაძლებლობას და მიმართულია დამოუკიდებელი მედიისა და სამოქალაქო აქტივობის წინააღმდეგ.
საქართველოს ხელისუფლებას მოვუწოდებთ, დაუყოვნებლივ შეწყვიტოს კანონიერ საფუძვლებს მოკლებული ქმედება, ხოლო საერთაშორისო ორგანიზაციებს, საქართველოში აკრედიტებულ ელჩებს ვთხოვთ, გამოიყენონ მათ ხელთ არსებული ყველა ბერკეტი, რათა უზრუნველყოფილი იყოს დამოუკიდებელი მედიასაშუალების, ნებისმიერი მოქალაქის კანონიერი უფლებები და უსაფრთხოება.
