როგორც “გურია ნიუსის” კორესპონდენტი ნატო გოგელია ჩოხატაურის მუნიციპალიტეტის გამგეობის მიმდებარე ტერიტორიიდან იუწყება, უკვე საათნახევარზე მეტია, ჟურნალისტებს ადმინისტრაციულ შენობაში შესვლის შესაძლებლობას არ აძლევენ: “თერთმეტი საათისთვის მოვედით ჟურნალისტები და ადვოკატები იმ ადამიანებთან ერთად, რომლებიც დაბარებული ჰყავდა კონტროლის პალატას დასაკითხად გამგეობის შენობაში. არც ჩვენ შეგვიშვეს და არც _ ადვოკატები. ახალგაზრდა იურისტთა ასოციაციის მხოლოდ ერთი ადვოკატი შეუშვეს, ისიც გასაუბრების მიზნით. ახლა ყველანი გარეთ ველოდებით _ უნდა მიიღონ გადაწყვეტილება ჩვენი შენობაში შესვლის თაობაზე, თუმცა ვინ გასცემს ამ ბრძანებას, ჩვენთვის უცნობია.
დასაკითხთა რიგებში მდგომი მოქალაქეები ადვოკატების გარეშე შენობაში შესვლას არ აპირებენ. მე დავუკავშირდი კონტროლის პალატის თავმჯდომარის მოადგილეს, რომელმაც მითხრა, რომ საქმის კურსში არ იყო, გაარკვევდა და დამიკავშირდებოდა.
რაც შეხება ჟურნალისტებისთვის ადმინისტრაციულ შენობაში შესვლის აკრძალვას, არავინ გვიხსნის, რა მიზეზით არ გვიშვებენ შენობაში. დღეს საკრებულოს სხდომაა და არც დეპუტატს მისცეს საშუალება, შენობაში შესულიყო. გამგებელი ლელა იმედაშვილი ამბობს, რომ მან არ იცის, რა ხდება. ყოველივე ამის შემდეგ, დავურეკეთ პატრულს, თუმცა, ისინი ადგილზე არ მოსულან. ამის შემდეგ დავუკავშირდი შინაგან საქმეთა სამინისტროს პრესსამსახურს ზურაბ გვენეტაძეს, რომელმაც გვითხრა, რომ გაარკვევდა, რა ხდებოდა. ასევე, ვესაუბრე შსს გურიის სამხარეო მთავარი სამმართველოს უფროსს დავით ცირეკიძეს, მან კი პრესსამსახურთან დაკავშირება მირჩია. ამის შემდეგ მოვიდა ჩოხატაურის პოლიციის უფროსი, მისი მოადგილე და რამდენიმე თანამშრომელი, რომლებმაც გვითხრეს, რომ გაარკვევდნენ, რა ხდება და ამის შემდეგ მოხდებოდა ჟურნალისტების შენობაში შეშვება.
დაცვის თანამშრომლები კი, რომლებიც შესასვლელში დგანან, დუმილის უფლებით სარგებლობენ. შენობიდან გამოსულმა ჩოხატაურის პოლიციის უფროსმა კი ჟურნალისტებთან ასეთი კომენტარი გააკეთა: _ ვერაფერში დაგეხმარებით, არაფერი ვიცით, ადმინისტრაციას მიმართეთო. არ არსებობს პირი, ვინც გვიპასუხებს, რა მიზეზით და რომელი კანონის საფუძველზე გვეზღუდება ადმინისტრაციულ შენობაში შესვლა,” _ ამბობს ნატო გოგელია.
ადვოკატები ამ ყველაფერს აბსოლუტურ უკანონობას უწოდებენ. მათი თქმით, არ არსებობს კანონი, რომელიც ზღუდავს მოქალაქეების ადმინისტრაციულ შენობაში შესვლის აკრძალვას.
“საქართველოს ახალგაზრდა იურისტთა ასოციაციის” სამი ადვოკატი ჩოხატაურის მუნიციპალიტეტის გამგეობის შენობაში რამდენიმე წუთის წინ შეუშვეს.
