ამ წუთებში რუსთავი 2-ის საქმეზე არსებითი განხილვა იწყება საქალაქო სასამართლოში. მოპასუხე მხარე დღეს ახსნა განმარტებით წარსდგება.
პროცესის დაწყებამდე ქიბარ ხალვაშის ადვოკატებმა განაცხადეს, რომ შესაძლოა, რუსთავი 2-ისა და ტელეკომპანია საქართველოს წარმომადგენლებმა პროცესი სპეციალურად გააჭიანურონ და ახსნა-განმარტებას დიდი დრო მოანდომონ. როგორც ხალვაშის ინტერესების დამცველები ამბობენ, საქმის გაჭიანურება მოპასუხე მხარის ინტერესებში შედის, რასაც რუსთავი 2-ისა და ტელეკომპანია საქართველოს ინტერესების დამცველები კატეგორიულად გამორიცხავენ.
ადვოკატები აცხადებენ, რომ მათი მიზანი სხდომის გაწელვა არ არის. დღეს ისინი შეეცდებიან, რომ სასამართლოს წინაშე არგუმენტებით წარდგნენ.
მოპასუხე მხარე ახსნა განმარტებით წარდგება, რომელიც დაასაბუთებს, რატომ არის ეს სარჩელი უსაფუძვლო და რატომ არ უნდა დაკმაყოფილდეს. სხდომაზე ასვე გადაწყდება დაკმაყოფილდება თუ არა სამაუწყებლო კომპანიის დაცვის მხარის შუამდგომლობა ზიანის უზრუნველყოფის თაობაზე.
არ არის გამორიცხული, რომ ადვოკატები კიდევ ერთი შუამდგომლობით წარდგნენ და ნიკა გვარამიას პროცესზე დაშვება მოითხოვონ.
დღესვე შესაძლოა, მოსარჩელე მხარის ექსპერტი დაიკითხოს, რომელმაც დაადგინა რა ღირებულების იყო რუსთავი 2-ის აქციები 2006 წელს.
