გასულ კვირას ლანჩხუთში "ერთიანი ნაციონალური მოძრაობის" ოფისთან განვითარებული მოვლენებიდან გამომდინარე, რა დროსაც "ქართული ოცნების" აქტივისტებმა პარტიის ოფისში შესასვლელი რკინის კარი შეადუღეს, საკრებულოს წევრი ნაციონალები ბოიკოტს აცხადებენ.
ფრაქციის სხდომაზე საკრებულოს წევრმა და ამავდროულად ნაციონალთა ადგილობრივი ორგანიზაციის თავმჯდომარემ კახა ასკურავამ განაცხადა, რომ იგი პროტესტის ნიშნად არ დაესწრება 30 ოქტომბრისთვის ჩანიშნულ საკრებულოს სხდომას.
მისმა თანაპარტიელმა გია გოგუაძემ ისიც განაცხადა, რომ ის და ასკურავა ამომრჩევლების წინაშე ანგარიშით არ წარსდგებიან.
"ყველა მოწმეა, მათ შორის ჩვენი კონსულტანტიც, რომ მეც და კახაც ვემზადებოდით ამომრჩეველთან შესახვედრად და მათთვის ანგარიშის ჩასაბარებლად. განაცხადიც კი გვქონდა საკრებულოში წარდგენილი, თუ სად და როდის შევხვდებოდით მოსახლეობას, თუმცა გასულ კვირას განვითარებული მოვლენების გამო ჩვენ უარს ვამბობთ ამ შეხვედრაზე, რადგან ლანჩხუთში არის კატეგორია ხალხისა, რომლებიც ყველაფერზე არიან წამსვლელები, რომ საქმიანობაში ხელი შეგვიშალონ.
ჩვენი ამ გადაწყვეტილების შესახებ ელექტონულად წერილი გავუგზავნეთ საკრებულოს თავმჯდომარეს გოგი ხელაძეს. ჩვენი წერილის საპასუხოდ კი საკრებულოს თავმჯდომარე გვიგზავნის პასუხს, რომ საკრებულოს წევრი კოდექსის თანახმად ვალდებულია წელიწადში ერთხელ მაინც, არაუგვიანეს პირველი ნოემბრისა, გაწეული მუშაობის შესახებ ანგარიში წარუდგინოს საკუთარ ამომრჩეველს, იქნებ შეიცვალოთ პოზიცია და წარსდგეთ ამომრჩევლის წინაშე თქვენთვის სასურველ დროსა და ადგილასო. ამას მთხოვს მე, საკრებულოს თავმჯდომარე, რომელსაც ერთი კვირის განმავლობაში კოლეგიალურად ერთხელაც კი არ დაურეკავს რომელიმე ჩვენთაგანთან.
გამცეს პასუხი საკრებულოს თავმჯდომარემ, მოხდა თუ არა ამ შენობაში ადგილობრივი ხელისუფლების ორი შტოს შეხვედრა და მსჯელობა ჩვენი პარტიის ოფისთან განვითარებულ მოვლენებზე. ყველა იქ მოსული აღნიშნავდა, რომ შესვენებაზე იმყოფებოდა. ა(ა) იპ-ის ხელმძღვანელები დოინჯით უყურებდნენ, თუ როგორ არბევდნენ მათი თანამშრომლები ჩვენს ოფისს. ოჯახს გეფიცებით, იქ რომ მხოლოდ ერთი "ცანცუა" ყოფილიყო და დანარჩენი უცხო, სოფლებიდან ჩამოსული საზოგადოება, ჩემთვის უცხო ლანჩხუთელები დამენახა, რომლებიც შეძრწუნებულები არიან გია გოგუაძისა და კახა ასკურავას არასოწი მოქმედებით, გამოვიდოდი, ბოდიშსაც მოვუხდიდი მათ და ნაციონალურ მოძრაობასაც დავტოვებდი", -განაცხადა ფრაქციის სხდომაზე გოგუაძემ.
აღნიშნულთან დაკავშირებით ჩვენ კომენტარისთვის ბატონ გოგი ხელაძესაც დავუკავშირდით, რომელიც აცხადებს, რომ საკრებულოს თითოეულ წევრს პირდაპირ კოდექსი ავალდებულებს მოსახლეობისთვის ანგარიშის ჩაბარებას.
"ის საშიშროება, რაზეც ფრაქციის სხდომაზე ითქვა, ვფიქრობ არ არსებობს, როგორც პიროვნებას არავინ არავის არ ესხმის თავს. გოგუაძესაც და ასკურავასაც თავისუფლად შეუძლიათ შეხვდნენ საკუთარ ამომრჩეველს, არანაირი პრობლემა არ შეექმნებათ.
რაც შეეხება გია გოგუაძის განცხადებას, რომ კოლეგიალურად ერთი სატელეფონო ზარიც კი არ განმიხორციელებია, ვიტყვი, რომ ამ შემთხვევიდან მეორე დღეს უშუალოდ შევხვდი ჩემს კაბინეტში ბატონ გიას, ნამდვილად არ ჩამითვლია საჭიროდ კიდევ დამატებით შევხმიანებოდი", – გვითხრა გოგი ხელაძემ.
