"რესპუბლიკელების" ბრიფინგი ფოთში
კონტროლის პალატის მიერ "ქართული ოცნების" ფოთელი აქტივისტებისგან ახსნა-განმარტებების ჩამორთმევასთან დაკავშირებით, "რესპუბლიკური პარტიის" ფოთის ორგანიზაციიის თავმჯდომარემ, გაიოზ ქინქლაძემ ჟურნალისტებისთვის პრეს-კონფერენცია გამართა.
ქინქლაძემ იმ შესაგებლის შინაარსზე ისაუბრა, რომელიც "რესპუბლიკელებმა", პარტიების ფინანსური მონიტორინგის სამსახურის ხელმძღვანელის, ნათია მოგელაძის სახელზე შეიტანეს და მას ახსნა-განმარტებას სთხოვენ.
"უწყებაში არ არის ნათქვამი, რომელი კანონდარღვევისთვის ვარ მიცემული ადმინისტრაციულ პასუხისგებაში და რისთვის გახდა საჭირო ჩემი გადაუდებლად გამოცხადება კონტროლის პალატაში. ამის მიუხედავად, მზად ვარ, გამოვცხადდე და მოგაწოდოთ ჩემს ხელთ არსებული ნებისმიერი ინფორმაცია, თუმცა, წინასწარ უნდა მაცნობოთ, თუ რა გადაცდომის ან ადმინისტრაციული სამართალდარღვევისთვის შეიძლება ვიყო პასუხისგებაში მიცემული და გადმომცეთ შესაბამისი ოქმი თანდართული მასალით. წინააღმდეგ შემთხვევაში, მე ვერ შევძლებ ვისარგებლო კანონით ჩემთვის მონიჭებული უფლებით," _ აცხადებს ქინქლაძე.
ქინქლაძის განცხადებით, მიუხედავად იმისა, რომ მისი ოჯახის ყველა წევრის სახელზე მივიდა უწყება, გარდა სიდედრისა, ისინი არჩევნებამდე მაქსიმალურ სიმშვიდეს შეინარჩუნებენ და საბედისწერო შეცდომებს, როგორც ეს ხელისუფლებას აქვს დაგეგმილი, არ დაუშვებენ.
პრეს-კონფერენციას ესწრებოდა, წარსულში "კონსერვატიული პარტიის" ფოთის ორგანიზაციის თავმჯდომარე, თამაზ სოსელია, რომელიც ამჯერად "ქართული ოცნების" აქტივისტია და კოალიციას სხვადასხვა საქმიანობაში ეხმარება, მათ შორის გაზეთ "ქართული ოცნების" გავრცელებაში. კონტროლის პალატის უწყება მას და მის მეუღლესაც მიუვიდა.
"მე ვარ ჩვეულებრივი მოკვდავი ადამიანი და არ მივეკუთვნები არც ერთ პარტიას. ამდენად, გაუგებარია, რატომ დაინტერესედნენ ჩემი და ჩემი ოჯახის წევრებით. ეს არის დაშინებისთვის განკუთვნილი ღონისძიება, რომელსაც ხელისუფლება ახორციელებს, თუმცა, ამით ვერ შემაშინებენ და თავისუფლებისთვის ბრძოლას გავაგრძელებ", _ განაცხადა თამაზ სოსელიამ, რომელიც კონტროლის პალატის წარმომადგენელთან, ახსნა-განმარტების მისაცემად მისვლას აპირებს.
