ლანჩხუთისა და ჩოხატაურის შემდეგ, კონტროლის პალატიდან უწყებები ოზურგეთელმა მოქალაქეებმაც მიიღეს.
“პოლიტიკური სუბიექტების მოჩვენებითი, თვალთმაქცური გარიგების გზით, დაფინანსების ფაქტზე ადმინისტრაციული წარმოება მიმდინარეობს, რასთან დაკავშირებითაც დაბარებული ხართ ახსნა-განმარტების მისაცემად”, _ წერია უწყებაში, რომელიც დღეს ოზურგეთის მუნიციპალიტეტის სოფელ ნაგომარში მცხოვრებმა იური წიქარიძემ, სოფელ ვაკიჯვრის მკვიდრმა მარინა გოთუამ და ირინა მდინარაძემ მიიღო.
კონტროლის პალატა მათ ოზურგეთის მუნიციპალიტეტის ადმინისტრაციულ შენობაში დღის 1 საათზე იბარებს.
საინტერესოა, რომ ეს უწყება დევს კონვერტში, რომელსაც არ აწერია კონტროლის პალატის მისამართი, ხოლო თავად უწყება არ არის დაბეჭდილი კონტროლის პალატის ბლანკზე, არ არის მითითებული რეგისტრაციის ნომერი და რეგისტრაციაში გატარების თარიღი. უწყებას ხელს აწერს საქართველოს კონტროლის პალატის პოლიტიკური პარტიების ფინანსური მონიტორინგის სამსახურის უფროსის მოადგილე, ვინმე გიორგი ამირანაშვილი.
იური წიქარიძე და მარინა გოთუა “თავისუფალი დემოკრატების” წევრია, ხოლო ირინა მდინარაძე _ “რესპუბლიკელების”.
“ხელისუფლება ისტერიაში და ამას გუშინდელი და დღევანდელი ქმედებებიც მოწმობს. რაც ლანჩხუთისა და ჩოხატაურის მუნიციპალიტეტებში ორი დღეა, ხორციელდება კონტროლის პალატის მხრიდან და ხვალისთვის იგეგმება ოზურგეთში, ამის ნათელი დადასტურებაა. ამ ქმედებებს მე არაკანონიერად ვაფასებ. ხელისუფლება ცდილობს ადამიანების დაშინებას, ფინანსურად დაჯარიმებას და სხვა მეთოდებით დასჯას. მე არაერთხელ მითქვამს და გავიმეორებ, რომ ჩვენ ასეთი ქმედებებით ვერ შეგვაშინებენ, იმ ამოცანას, რასაც ქვია ქართული ოცნების ახდენა, ერთად ავისრულებთ,” _ გვითხრა სატელეფონო საუბარში “თავისუფალი დემოკრატების” გურიის რეგიონის ლიდერმა თემურ სალუქვაძემ.
“რესპუბლიკელ” მარინე სუნგულიას ეს ქმედებები გამიზნულად, დაშინების მცდელობად მიაჩნია: “დაშინებულმა ხალხმა უარი თქვას ოპოზიციურ პარტიებთან თანამშრომლობაზე”, _ გვითხრა მარინე სუნგულიამ.
ოზურგეთის მუნიციპალიტეტის საკრებულოს წევრის ლელა ნაცვალაძის თქმით კი, “საქართველოს უკვე კარგა ხანია მართავს ჯალათთა ხროვა, რომელიც ცდილობს მსგავსი ქმედებებით გაიხანგრძლივოს არსებული მდგომარეობა. არა ერთგზის მითქვამს და განვმეორდები _ სააკაშვილსა და მის პირსისხლიან რეჟიმს გაუასმაგდათ აგონია, პოლიტიკურ ასპარეზზე ბიძინა ივანიშვილის გამოჩენით, რადგანაც გრძნობენ, რომ მოახლოვდა მათი დასასრული”, _ მიიჩნევს ნაცვალაძე.
მისივე თქმით, გურია ოდითგანვე გამოირჩეოდა პოლიტიკური აქტივობით და დღესაც ასე გრძელდება: _ ამის დასტურია ის უამრავი ხელმოწერა, რომელიც ბიძინა ივანიშვილის მოქალაქეობის აღდგენასთან დაკავშირებით შეგროვდა, ამიტომაც ხელისუფლება იწყებს “სერიოზულ” ეკზეკუციას გურიაში! კონტროლის პალატის აღნიშნული ქმედება სცილდება კანონის ფარგლებს, ბოლოდროინდელი მათი საქმიანობა არის ერთის მხრივ, უფლებების გადამეტება და მეორეს მხრივ საქართველოს მოსახლეობის გარკვეული ნაწილის უფლებების შელახვა და “ჯერჯერობით” მხოლოდ მორალური ზიანის მიყენება, მაგრამ ნათელია, რომ ისინი ხელისუფლების შეკვეთას ასრულებენ. ამას მოწმობს ის, რომ კონტროლის პალატის სახელით ლანჩხუთსა და ჩოხატაურში “დაკითხვას” აწარმოებენ შსს უწყების გამომძიებლები, _ დასძენს ის.
“მორიგი ეკზეკუცია ოზურგეთში ხვალიდან არის მოსალოდნელი, როგორც ამბობენ, “გემრიელი ლუკმა ბოლოსთვის მოიტოვეს“. ჩვენ ამას ველოდებით, მაგრამ იმ ადამიანებს, ვინც ამგვარ უკანონო ქმედებებს ახორციელებს, მინდა ვუთხრა, რომ შიში, რომელსაც ამ ხნის განმავლობაში თესავდნენ მოსახლეობაში, უკვე გადალახულია. იმ “გოლგოთის” გზამ, რომელიც ამ ხელისუფლების პირობებში გამოვიარეთ, დიდი გამოცდილება შეგვძინა და ვეღარაფერი შეგვაშინებს! ლევან ბეჟაშვილსა და მისნაირ “სავარძლის მონებს” კი შევახსენებ, რომ წამმზომი ჩაირთო და მათთვის პოლიტიკური ნაგავსაყრელი კარგა ხანია გამზადებულია”, _ ამბობს ნაცვალაძე.
