საქართველოს ცხრა მხარეში ქვეყნის აღმასრულებელი ხელისუფლების წარმომადგენელი რწმუნებული-გუბერნატორია. მას თანამდებობაზე ნიშნავს და ათავისუფლებს პრემიერ-მინისტრი. გუბერნატორი საქართველოს მთავრობის დავალებით კოორდინაციას უწევს სხვადასხვა სახის ღონისძიებებს, მათ შორის რეგიონული პოლიტიკის განხორციელებას და ადგილობრივი თვითმმართველობის რეფორმის ცალკეულ კომპონენტებს. ის ასევე ახორციელებს სოციალურ-ეკონომიკური განვითარების პროგრამებს და მონაწილეობს რეგიონული განვითარების ღონისძიებებში.
"გურია ნიუსი" დაინტერესდა რა ქონებას ფლობენ რწმუნებულ-გუბერნატორები და რა არის მათი შემოსავლები.
მცხეთა-მთიანეთის სახელმწიფო რწმუნებული – გუბერნატორი ნუგზარ ყიფიანი
გუნერნატორ ნუგზარ ყიფიანის ოჯახის საკუთრებაშია ორი ბინა და ორი მიწის ნაკვეთი, რის შესახებაც მის ქონებრივ დეკლარაციაშია აღნიშნული.
კერძოდ, თბილისში მდებარე 140კვ.მ-ის ფართობის ბინა ნუგზარ ყიფიანს ეკუთვნის, მეორე, 100 კვ.მ-ის ფართობის ბინა დედაქალაქში კი, შვილის ანასტასია ყიფიანის საკუთრებაშია (ბინების მისამართები დეკლარაციაში მითითებული არ არის. ავტ.)
ურეკში მდებარე 350.00 კვ.მ-ის ფართობის მიწის ნაკვეთი ნუგზარ ყიფიანს ეკუთვნის; 600.00 კვ.მ -ის ფართობის მიწის ნაკვეთი თიანეთში კი, მის მეუღლეს, თამარ ზაქარიაძეს.
დეკლარაციის მიხედვით, საქართველოს ადმინისტრაციულ–ტერიტორიულ ერთეულებში (დუშეთის, თიანეთის, მცხეთისა და ყაზბეგის მუნიციპალიტეტები) სახელმწიფო რწმუნებულის–გუბერნატორის თანამდებობიდან ნუგზარ ყიფიანს 64435.00 ლარის შემოსავალი აქვს მიღებული. შვილს, ანასტასია ყიფიანს, "ფრაისოთერჰაუსკუპერის" მენეჯერის თანამდებობიდან 47500.00 ლარის შემოსავალი.
დეკლარაციის შევსებისას კი, საქართველოს ბანკის სახელფასო ანგარიშზე ნუგზარ ყიფიანს 5500.00 ლარი ჰქონდა; ამავე ბანკის მიმდინარე ანგარიშზე მის მეუღლეს 10.00 ლარი ერიცხებოდა. შვილს, ანასტასია ყიფიანს კი, "თი–ბი–სი" ბანკის სახელფასო ანგარიშზე 2000.00 ლარი ჰქონდა.
სამცხე-ჯავახეთის სახელმწიფო რწმუნებული – გუბერნატორი აკაკი მაჭუტაძე
გუბერნატორ აკაკი მაჭუტაძის ქონებრივი დეკლარაციის მიხედვით, თბილისში, ჯავახეთის ქუჩაზე მდებარე 75.00 კვ.მ-ის ფართობის ბინა და ვანის მუნიციპალიტეტის სოფელ ჭყვიშში მდებარე 2500.00 კვ.მ-ის ფართობის მიწის ნაკვეთი.
დეკლარაციაში აღნიშნულია, რომ აკაკი მაჭუტაძემ საქართველოს ადმინისტრაციულ–ტერიტორიულ ერთეულებში (ადიგენის, ასპინძის, ახალციხის, ახალქალაქის, ბორჯომისა და ნინოწმინდის მუნიციპალიტეტები) სახელმწიფო რწმუნებულის–გუბერნატორის თანამდებობიდან 61950.00 ლარის შემოსავალი მიიღო; დეკლარაციის შევსებისას კი, მის სახელფასო ანგარიშზე "ვი–თი–ბი ბანკში" 900.00 ლარი იყო.
მისი მეუღლის, ეკატერინე დანელიას კი, საქართველოს განათლებისა და მეცნიერების სამინისტროს სპეციალისტის თანამდებობიდან 14400.00 ლარის შემოსავალი აქვს მიღებული.
შიდა ქართლის სახელმწიფო რწმუნებული – გუბერნატორი ზურაბ რუსიშვილი
გუბერნატორ ზურაბ რუსიშვილის ქონებრივი დეკლარაციის მიხედვით, მის საკუთრებაშია თბილისში, ზესტაფონის ქუჩაზე მდებარე 59.74 კვ.მ-ის ფართობის ბინა და 2003 წელს გამოშვებული მსუბუქი ავტომანქანა BMW X5.
რაც შეეხება მის შემოსავლებს, ზურაბ რუსიშვილმა ადმინისტრაციულ-ტერიტორიულ ერთეულებში (გორის, კასპის, ქარელისა და ხაშურის მუნიციპალიტეტებში) სახელმწიფო რწმუნებულის- გუბერნატორის თანამდებობიდან 64900.00 ლარის შემოსავალი მიიღო. დეკლარაციის შევსებისას კი, საქართველოს ბანკის საკრედიტო ანგარიშზე 35.00 ლარი, ხოლო "სტანდარტ ბანკის" სახელფასო ანგარიშზე კი, 28.00 ლარი.
ქონებრივი დეკლარაციის მიხედვით, ზურაბ რუსიშვილის სახელზე 6 საბანკო სესხია.
9400.00-დოლარიანი ავტოსესხის (ხელშეკრულების ვადები 08/05/2012, 08/05/2012 – 08/05/2019 , ს.ს. ბანკი ქართუ) პროცენტის დასაფარად მან 1980.00 დოლარი გადაიხადა;
4700.00-დოლარიანი სამომხმარებლო სესხისთვის (08/05/2012, 08/05/2012 – 08/05/2017 , ს.ს.ბანკი ქართუ) 1308.00 დოლარი აქვს გადახდილი.
საკრედიტო ბარათით (ამერიკან ექსპრესი) აღებული 4000.00-ლარიანი სესხის (01/05/2014, 01/05/2014 – 01/06/2016 , ს.ს.საქართველოს ბანკი ) გასასტუმრებლად 5700.00 ლარი გადაიხადა;
34400.00-დოლარიანი იპოთეკური სესხის (22/06/2011, 22/06/2011 – 02/07/2026 , ს.ს.საქართველოს ბანკი) 4560.00 დოლარის გასავალი ჰქონდა.
კახეთის სახელმწიფო რწმუნებული – გუბერნატორი ირაკლი შიოლაშვილი
გუბერნატორ ირაკლი შიოლაშვილს ოჯახის საკუთრებაშია ორი ბინა და მიწის ნაკვეთი, რის შესახებაც მის ქონებრივ დეკლარაციაშია აღნიშნული.
თბილისში, ვაზისუბანი მიკრო რაიონში მდებარე 120.00 კვ.მ-ის ფართობის ბინა ირაკლი შიოლაშვილის 100%-იან საკურებაშია. თბილისში, ვარკეთილი 3-ში მდებარე 17.00 კვ.მ-ის ფართობის ბინა კი, მის მეუღლეს, თამარ შაფათავას ეკუთვნის. დუშეთში, სოფელ ჩანადირებში მდებარე 1000.00 კვ.მ-ის ფართობის მიწის ნაკვეთი კი, ირაკლი შიოლაშვილის საკუთრებაშია.
შიოლაშვილი ასევე ფლობს 1996 წელს გამოშვებულ მსუბუქ ავტომანქანა mercedes benz-ს.
რაც შეეხება გუბერნატორის ოჯახის შემოსავლებს, ახმეტის, გურჯაანის, დედოფლისწყაროს, თელავის, ლაგოდეხის, საგარეჯოს, სიღნაღისა და ყვარლის მუნიციპალიტეტებში სახელმწიფო რწმუნებულ-გუბერნატორის თანამდებობიდა, ირაკლი შიოლაშვილმა 64900.00 ლარის შემოსავალი მიიღო, მისმა მეუღლემ, თამარ შაფათავამ, საქართველოს ფინანსთა სამინისტრო საბიუჯეტო დეპარტამენტის ტერიტორიული ერთეულების სამმართველოს სპეციალისტის თანამდებობიდან კი, 12066.00 ლარი.
დეკლარაციის შევსების მომენტში, შიოლაშვილისა და შაფათავას საბანკო ანგარიშებზე თანხები არ ირიცხებოდა, თუ,ცა მათ ნაღდი ფულის სახით, 17 3000 ლარი ჰქონდათ.
ქვემო ქართლის სახელმწიფო რწმუნებული – გუბერნატორი პაატა ხიზანაშვილი
გუბერნატორ პაატა ხიზანაშვილის 100%-იან საკუთრებაშია ორი ბინა და მიწის ნაკვეთი. ამის შესახებ მის ქონებრივ დეკლარაციაშია აღნიშნული.
კერძოდ, ხიზანაშვილი ფლობს თბილისში, ქავთარაძის ქუჩაზე 75.00 კვ.მ-ს ფართობისა და თბილისში, წყნეთის გზატკეცილიზე მდებარე 107.00 კვ.მ0ის ფართობის ბინებს. ასევე, თბილისში, სოფელ ლისში 2200.00 კვ.მ-ის ფართობის მიწის ნაკვეთს.
ხიზანაშვილის საკუთრებაშია Toiota rav-4, სატვირთო ავტომანქანა Ford250 და პაატა მსუბუქი ავტომანქანა Matford-ი.
რაც შეეხება მის ფინანსურ მდგომარეობას, დეკლარაციის შევსებისას, მის საკრედიტო ანგარიშზე "საქართველოს ბანკში" 9000.00 ლარი;
ამავე ბანკის მიმდინარე ანგარიშზე 2 ლარი; ბანკი "ქართუს" სახელფასო ანგარიშზე კი, 3511.00 ლარი იყო; რაც შეეხება მისი შვილის, ანა ხიზანაშვილის სახელფასო ანგარიშს, მასზე 415.00 ლარი ირიცხებოდა.
გარდა ამისა, პაატა ხიზანაშვილს ნაღდი ფულის სახით ჰქონდა 14000.00 ლარი.
რაც შეეხება ხიზანაშვილის ოჯახის შემოსავლებს, მან ერთი წლის განმავლობაში, სს ბანკი "ქართუს" რისკების დეპარტამენტის განყოფილების უფროსის თანამდებობიდან, რა დროსაც მას ბანკის აქტივების მართვა ევალებოდა, 56136.00 ლარი აქვს მიღებული; საქართველოს ადმინისტრაციულ–ტერიტორიულ ერთეულებში (ბოლნისის, გარდაბნის, დმანისის, თეთრიწყაროს, მარნეულისა და წალკის მუნიციპალიტეტები და ქალაქი რუსთავი) სახელმწიფო რწმუნებულის–გუბერნატორის თანამდებობიდან კი, 2565.00 ლარი;
შვილს, ანა ხიზანიშვილს საქართველოს მთავრობის ადმინისტრაციის სპეციალისტის თანამდებობიდან – 4946.00 ლარის შემოსავალი აქვს მიღებული.
დეკლარაციის მიხედვით, პაატა ხიზანაშვილის სახელზე ორი სესხია.
17 350.00-ლარიანი სამომხმარებლო სესხის (07/03/2014, 07/03/2014 – 20/03/2016) დასაფარად მან ერთი წლის განმავლობაში 4896.00 ლარი გადაიხადა; 173 000.00-ლარიანი იპოთეკური სესხის (10/12/2012, 10/12/2013 – 21/09/2026) დასაფარად კი, 22200.00 ლარის გასავალი ჰქონდა.
"გურია ნიუსი" რწმუნებულ-გუბერნატორების ქონებისა და შემოსავლების შესახებ ინფორმაციის მეორე ნაწილს მოგვიანებით შემოგთავაზებთ.
