“ვაშინგტონ პოსტის” სარედაქციო წერილს არჩილ გეგეშიძე პასუხობს _ “საქართველო უფრო თავისუფალი და დემოკრატიულია”

"ვაშინგტონ პოსტში" 27 ოქტომბერს გამოქვეყნებულ სარედაქციო წერილს "დემოკრატია ბეწვის ხიდზე“,  ამერიკის შეერთებულ შტატებში საქართველოს საგანგებო და სრულუფლებიანი ელჩი არჩილ გეგეშიძე გამოეხმაურა. ელჩი მიიჩნევს, რომ სტატია არასწორად ასახავს დემოკრატიის მდგომარეობას საქართველოში.

_  27 ოქტომბერს გამოქვეყნებული სარედაქციო წერილი "დემოკრატია ბეწვის ხიდზე“ არასწორად ასახავს დემოკრატიის მდგომარეობას საქართველოში.

2012 წელს ამჟამინდელი მთავრობის ხელისუფლებაში მოსვლის შემდეგ საქართველომ მიაღწია მნიშვნელოვან პროგრესს სასამართლოს დამოუკიდებლობის, მედიაპლურალიზმისა და ადამიანის უფლებათა დაცვის მხრივ.

ყველა მონაცემის თანახმად, საქართველო უფრო თავისუფალი და დემოკრატიულია, ვიდრე ოდესმე. ორგანიზაციის „ჟურნალისტები საზღვრებს გარეშე“ მსოფლიო პრესის 2015 წლის თავისუფლების ინდექსის თანახმად, 2012 წლის შემდეგ საქართველოს რეიტინგმა აიწია 35 საფეხურით და დღეს ჩვენი ქვეყანა 69-ე ადგილზეა 180 ქვეყანას შორის.

მსოფლიო ბანკის ბოლო ანგარიში მსოფლიო მმართველობის ინდიკატორების შესახებ ხაზს უსვამს ჩვენს პროგრესს. 2012 წლის შემდეგ საქართველოს პოზიციები გაუმჯობესდა 16 საფეხურით ანგარიშვალდებულების კატეგორიაში, 19 საფეხურით – კანონის უზენაესობის მხრივ, 22 საფეხურით – პოლიტიკური სტაბილურობისა და მმართველობის ეფექტიანობის კუთხით, ასევე 23 საფეხურით – კორუფციის კონტროლის მხრივ.

რუსთავი 2-ის მფლობელებს შორის დავა მიმდინარეობს სავალალო მემკვიდრეობის ფონზე. ამ საქმის ფესვებს წარსულში მივყავართ, როცა საკუთრების უსამართლოდ მითვისება და იძულება ყოველდღიურ მოვლენას წარმოადგენდა საქართველოში. ამ დავის გადაწყვეტის ერთადერთი გზა არის სამართლიანი და გამჭვირვალე სასამართლო პროცესი, რომელსაც მაქსიმალურ ყურადღებას მიაქცევენ დაინტერესებული საერთაშორისო არბიტრები.

სწორედ სასამართლოს გადასაწყვეტია, ვინ არის კანონიერი მფლობელი. მიუხედავად სასამართლოს გადაწყვეტილებისა, დემოკრატია და კონკურენტული მედიაგარემო მომავალშიც განაგრძობს განვითარების გზაზე სვლას, _ წერს არჩილ გეგეშიძე.