საკმაოდ დიდი ხანია, რაც ქალაქ ლანჩხუთის ლაშისღელის უბნის მოსახლეობასა და სოფელ შუხუთის მაცხოვრებლებს შორის დაპირისპირებაა.
საქმე ისაა, რომ ლაშისღელის უბნის კუთვნილი საძოვარი შუხუთელთა საყანე ფართობებს ესაზღვრება, ღობე კი, რომელიც ამ ფართობს ერთმანეთისგან ყოფს, დაზიანებულია. დროდადრო მოსახლეობა საკუთარი ძალებით ცდილობს ღობის შეკეთებას, თუმცა, როგორც ირკვევა, ეს არაა საკმარისი. ხშირია შემთხვევა, როცა საქონელი პირდაპირ საყანე ფართობებში გადადის და წლის მოსავალს ანადგურებს. პრობლემა განსაკუთრებულად აქტუალური შემოდგომით, მოსავლის აღების წინაა.
აღნიშნული პრობლემის გადაწყვეტის მიზნით შუხუთის მაჟორიტარმა დეპუტატმა აკაკი იმნაიშვილმა საქმის კურსში ჩააყენა მუნიციპალიტეტის ხელმძღვანელობა და მათგან მოსახლეობისთვის დახმარება ითხოვა. მისი თქმით, "ამ პრობლემის გადაწყვეტას მეტი ყურადღება უნდა დაეთმოს და ქალაქის წარმომადგენლობამ კი იზრუნოს მის მოგვარებაზე, რადგან ღობის გამართვა სწორედ აღნიშნული ადმინისტრაციულ ერთეულს ევალება".
"აქ იმყოფება ქალაქის მაჟორიტარიც და მინდა მას ვთხოვო, ამ პრობლემას დროულად მიაქციოს ყურადღება. ფაქტია, რომ აუცილებელია ნორმალური ღობე გაკეთდეს, ეს ქალაქს ევალება და მან უნდა იზრუნოს ამ საკითხის მოგვარებაზე, თორემ ადამიანებს შორის დაპირისპირება იმ დონეზე მიდის ხოლმე, რომ შეიძლება ტრაგიკულადაც დამთავრდეს", _ თქვა აკაკი იმნაიშვილმა.
თავის მხრივ ქალაქის მაჟორიტარი ევიკო ჩიჩუაც ეთანხმება იმნაიშვილს, რომ საკითხი მართლაც აქტუალური და პრობლემურია, რის გამოც ორ მხარეს შორის ხშირია დავა და კონფლიქტური სიტუაციები, თუმცა, მისი აზრით, რახან ქალაქში არ აქვს გათვალისწინებული სოფლის პროგრამა, ამიტომაც უმჯობესია, შუხუთმა ასახოს ის სამომავლოდ თავის სოფლის პროგრამაში და საკითხი ასე გადაიჭრას დადებითად, მოსახლეობის საკეთილდღეოდ.
როგორც გაირკვა, საძოვრისა და საყანე ფართობების გასამიჯნად ღობისთვის სულ 700 მეტრი მასალაა საჭირო, რაზეც მუნიციპალიტეტის გამგებელმა ზაზა ურუშაძემ განაცხადა, რომ სამომავლოდ დადებითად გადაწყდება, მიუხედავად იმისა, აისახება თუ არა ის სოფლის პროგრამაში.
