გურიის ფეხბურთის ფედერაციის პრეზიდენტი კახა ებრალიძე თანამდებობას ტოვებს. ამის მიზეზად ებრალიძე მისი ოჯახის და მეგობრების მიმართ გახორციელებულ ზეწოლას ასახელებს:
_ ბევრი რამის გამო მივიღე ეს გადაწყვეტილება _ ჩემი ოჯახის პატარა ბიზნესზე დღემდე გრძელდება ზეწოლა. მეგონა, რომ ფედერაციის პრეზიდენტის არჩევნების შემდეგ ეს ყველაფერი დასრულდებოდა, თუმცა, არა. 28 ოქტომბერს გაუვიდა შემოსავლების სამსახურის უფროსის ბრძანებას ვადა, რომლის თანახმადაც ჩემი ოჯახის საკუთრებაში არსებულ ობიექტს ამოწმებდნენ. დასკვნა უნდა დაეწერათ, მაგრამ შემოწმება კიდევ ერთი თვით გააგრძელეს. უკვე მეოთხეჯერ ამოწმებენ ობიექტს, _ ამბობს „გურია ნიუსთან“ საუბრისას კახა ებრალიძე, რომელიც ამ ყველაფერს მის გადაწყვეტილებას _ სფფ-ს პრეზიდენტობის არჩევნებში რევაზ არველაძის მხარდაჭერას უკავშირებს.
ებრალიძის ინფორმაციით, ზეწოლა მიმდინარეობს მის მეგობრებზეც:
_ ხარიტონ ჩხატარაშვილი გურიის ფეხბურთის ფედერაციის მდივანია. არჩევნების დროს იგი საფეხბურთო კლუბ „მერცხალის“ მთავარი მწვრთნელი იყო და სთხოვდნენ, ჩემს წინააღმდეგ ემოქმედა. უფრო მეტიც, შესთავაზეს, რომ ფედერაციის პრეზიდენტის არჩევნების შემდეგ იგი გახდებოდა გრფფ-ს პრეზიდენტი, რაზეც ჩხატარაშვილმა უარი თქვა და დღეს ის სახლში ზის _ გაათავისუფლეს.
გარდა ამისა, ჩემი უახლოესი მეგობარი, ირაკლი ფაცურია, რომელიც საფეხბურთო კლუბ ლანჩხუთის „გურიას“ დირექტორი იყო 2013 წლის შემდეგ, გაათავისუფლეს. არადა, მაშინ, როცა ჩემი არჩევნები იყო, 13 ადამიანი გაგვიშვეს გუნდიდან და ირაკლი დატოვეს. თუმცა, ახლა, მხოლოდ მისი დირექტორობისდროინდელ საბუთებს ამოწმებს ლანჩხუთის აუდიტის სამსახური. სამჯერ არის აუდიტი ჩატარებული და დასკვნებია დადებული, თუმცა, ახლა ისევ რაღაცის ძებნა დაიწყეს. თან ამას ისეთი ხალხი აკეთებს, გაგეცინებათ _ შევარდნაძის დროინდელი თანამდებობის პირები და იმ დროს რა და როგორ ხდებოდა კორუფციის კუთხით, ყველამ კარგად ვიცით, _ ამბობს ებრალიძე.
გრფფ-ს პრეზიდენტი ამბობს, რომ ყველაფერში ზღვარი უნდა არსებობდეს და ამასთან ერთად, მის მიერ მიღებული გადაწყვეტილების ერთ-ერთ მოტივად მომავლის არარსებობასაც ასახელებს:
_ ყველაფერი გამოჩნდება _ რა გაკეთდა ჩემს დროს ამ ხუთი წლის განმავლობაში და რა გაკეთდება მომავალში, _ დასძინა ებრალიძემ.
მისივე თქმით, ეს გადაწყვეტილება საკუთარი სურვილით მიიღო და კონკრეტული პირებისგან იძულება არ ყოფილა:
_ მე წამოვედი და იმედია, ახლა მაინც დაანებებენ თავს ჩემს ოჯახს და მეგობრებს. სირცხვილია, როცა ირაკლი ფაცურიას ამოწმებ _ ადამიანს, რომელიც ლანჩხუთში განთქმულია პატიოსნებით. კიდევ ერთხელ გავიმეორებ _ სირცხვილია, როცა „გურიას“ ამოწმებენ ის ადამიანები, რომლებიც კლუბის ხელმძღვანელები არიან და შევარდნაძის დროს მაღალ თანამდებობებს იკავებდნენ, _ გვითხრა ებრალიძემ.
ებრალიძის ბრალდებებს კატეგორიულად უარყოფს ლანჩხუთის „გურიას“ პრეზიდენტი, ლანჩხუთის მუნიციპალიტეტის გამგებელი ზაზა ურუშაძე:
_ ლანჩხუთის გამგეობის აუდიტის სამსახურის უფროსი გია ნაჭყებიაა. იგი, როგორც აფხაზეთში, ასევე, სამაჩაბლოში ომობდა და პროფესიონალი კადრია. იგი კლუბის 6 წლის ნამუშევარს ამოწმებს და არა კონკრეტული პირის, რაც კლუბმა მოითხოვა.
სხვათა შორის, ირაკლი ფაცურიას მამა გამგეობაში ერთ-ერთი უმსხვილესი სამსახურის უფროსი და ჩემი მეგობარია. არ ვიცი, რაში სჭირდება კახას ასეთი საუბარი, _ გვითხრა ურუშაძემ.
ებრალიძის მხარდაჭერის გამო თანამდებობის დაკარგვას უარყოფს ხარიტონ ჩხატარაშვილი. მისი თქმით, მთავარი მწვრთნელის პოსტი ჯანმრთელობის მდგომარეობის გამო დატოვა. ჩხატარაშვილი ამბობს, რომ, მისთვის არავის შეუთავაზებია ებრალიძის საწინააღმდეგოდ წასვლა და ამის სანაცვლოდ გრფფ-ს პრეზიდენტის პოსტის ჩაბარება.
კომენტარს, ჯერჯერობით, არ აკეთებენ გურიის ფეხბურთის ფედერაციის წევრები. როგორც გვითხრეს, ახალი კანდიდატურის შესახებ მსჯელობას მას შემდეგ დაიწყებენ, რაც ებრალიძე თანამდებობიდან წასვლის შესახებ განცხადებას ოფიციალურად დაწერს.
ამ პროცედურის შემდეგ, ახალი პრეზიდენტის არჩევამდე, პრეზიდენტის მოვალეობას ბენო თავბერიძე შეასრულებს.
_ ეს ამბავი ახლახან გავიგე და დეტალებზე ვერაფერს გეტყვით. მე ამ ამბის გაგებამდე დამირეკეს ფედერაციიდან. 18-ში არის სფფ-ს აღმასკომი, სადაც ახალი წევრები უნდა აირჩიონ. მითხრეს, რომ მანამდე არავითარი ძალა არ აქვთ.
_ ბატონო ბენო, ფედერაციაში მანამდე გითხრეს, რომ არჩევნები გელოდათ, სანამ ებრალიძე ოფიციალურად განაცხადებდა ამის შესახებ?
_ მითხრეს, რომ ებრალიძე ჩაატარებდა სხდომას, რომელზეც უნდა წარგვედგინა გურიის რეგიონის კანდიდატი აღმასკომის წევრობისთვის. თქვენ ხართ პირველი, რომელიც ამ თემაზე მირეკავს. ამ დრომდე არც იქიდან და არც აქედან არაფერი უთქვამთ. ამ ეტაპზე ვერ გეტყვით, ვის შევარჩევთ აღმასკომის წევრობის კანდიდატად.
_ ჩვენ გვითხრეს, რომ ეს იქნება იური ჩხაიძე..
_ არ ყოფილა ამ თემაზე ჯერ საუბარი. იური ჩხაიძე ჩვენ ხმის უფლებით წარვადგინეთ კანდიდატად სფფ-ს პრეზიდენტის არჩევნების დროს, თუმცა, ოქმი გაგვიუქმეს. იმ ორომტრიალში, საბოლოდ, გურია ხმის მიცემის უფლების გარეშე დარჩა. ახლა კი ისეთი კანდიდატი უნდა წარვადგინოთ, მერე რომ ვინმემ არ დაგვცინოს.
_ ბატონო ბენო, ჩვენ გვაქვს დაზუსტებული ინფორმაცია, რომ მაშინ, როცა ებრალიძის წინააღმდეგ წახვედით და მხარს ლევან კობიაშვილს უჭერდით, შემოგთავაზეს, რომ ამ მხარდაჭერის სანაცვლოდ გახდებოდით გრფფ-ს პრეზიდენტი… ეს შემოთავაზება ისევ ძალაშია?
_ ჩემს პრეზიდენტობაზე არ ყოფილა საუბარი. მხოლოდ ის მკითხეს, ებრალიძე რომ წავიდეს, თუ გახდები პრეზიდენტიო. მაშინ მე და გრიშა თოდრიამ ვთქვით, რომ ებრალიძის გადაყენებაში მონაწილეობას არ მივიღებდით _ მე მისი წინააღმდეგი არასოდეს ვყოფილვარ. მხოლოდ იმას ვთხოვდი, რომ დელეგატი ერთად აგვერჩია და ვაკრიტიკებდი იმის გამო, რომ ერთპიროვნულად მიიღო გადაწყვეტილება. როდის ნახეთ, რომ მასზე ცუდი ვთქვი? _ ერთადერთხელ აღვნიშნე, რომ მამის ტოლ კაცს შეურაცხყოფა არ უნდა მიაყენოს, _ გვითხრა თავბერიძემ, რომელიც ამბობს, რომ გურიის რეგიონალური ფედერაციის პრეზიდენტობის სურვილი არ გააჩნია.
ჩვენ შევეცადეთ დეტალები ფეხბურთის ფედერაციის პრეზიდენტთან ლევან კობიაშვილთან გაგვერკვია, თუმცა, მან „გურია ნიუსის“ სატელეფონო ზარებს არ უპასუხა.
