“ეს არის ქართველი ხალხის დაშინების მცდელობა”

კონტროლის პალატის წარმომადგენლები გურიაში რამდენიმე ათეულ მოქალაქეს, მათ შორის “თავისუფალი დემოკრატების” და “რესპუბლიკური პარტიის” წევრებსა და აქტივისტებს სამი დღის განმავლობაში ჰკითხავენ.

14 მარტს, ოზურგეთის მუნიციპალიტეტის ადმინისტრაციულ შენობაში “გურია ნიუსის” კორესპონდენტებს ცენტრალური შესასვლელი დილით გადაკეტილი დახვდა _ შესასვლელში შინაგან საქმეთა სამინისტროს დაცვის სამსახურის თანამშრომლები იდგნენ, რომლებმაც “გურია ნიუსის” კორესპონდენტებს შენობაში შესვლის უფლება არ მისცეს.

“გურია ნიუსის” კითხვაზე, თუ რომელი ადმინისტრაციული აქტის საფუძველზე არ გვაძლევდნენ ადმინისტრაციულ შენობაში შესვლის უფლებას, ოზურგეთის მუნიციპალიტეტის გამგებლის მოვალეობის შემსრულებელმა ილია ვაშაყმაძემ, ოზურგეთის მუნიციპალიტეტის საკრებულოს თავმჯდომარემ ალეკო მამეშვილმა და გურიის გუბერნატორმა ვალერიან ჩიტაიშვილმა შეთანხმებული პასუხი გასცეს:

_ ჩვენ ასეთი წესი შევიმუშავეთ. მოქალაქეების მისაღებში შეგიძლიათ მიბრძანდეთ და დატოვოთ განცხადებები, ჩვენ არ დაგვიკეტავს მისაღები, ნებისმიერ მოქალაქეს შეუძლია მოქალაქეთა მისაღებით ისარგებლოს.

ადმინისტრაციულ შენობაში ჟურნალისტებთან ერთად არ შეუშვეს ოპოზიციური პარტიის ლიდერები და საკრებულოს ოპოზიციონერი დეპუტატებიც. ამ პროცესებს დაცვის პოლიცია აკონტროლებდა.

რესპუბლიკური პარტიის წევრი მარინე სუნგულია ამბობს, რომ არ ახსოვს ხელისუფლება დემოკრატიული ან საღი აზრით მიდგომოდეს მსგავს პროცესებს.

_ ვფიქრობ, რომ ყველა ნაბიჯზე ირღვევა ჩემი უფლებები. მაგალითად ამ წუთს აქ ვდგავართ და პოლიციელები, რომლებიც არიან მუნჯები, არ გვიშვებენ შენობაში. გაურკვეველ სიტუაციაში ვიმყოფებით. ადამიანებზე ხორციელდება ფსიქოლოგიური ზეწოლა, სურთ ათქმევინონ ის, რაც მათ სურს. ეს არის შეშინებულის პოზიცია _ ვირთხას რომ მოიმწყვდევენ კუთხეში, აგონიაში ჩავარდება და კედლებზე გადის. მე მგონი, ამ წუთს ისინი კედლებზე გადიან.

“თავისუფალი დემოკრატების” გურიის ლიდერი თემურ სალუქვაძე აცხადებს, რომ კონტროლის პალატის წარმომადგენლები უკანონოდ აწარმოებენ დაკითხვას: _ სამწუხაროდ, ეს ყველაფერი, გვაგონებს 30-იან წლებს. ჩვენ მხოლოდ გამჭვირვალე შენობებით წინ ვერ წავალთ. ეს არის დროებითი ამბავი _ სულ ცოტა ხანში თითოეული ჩვენთაგანი ოცნებას ავიხდენთ. მე არ მომცეს უფლება, როგორც საკრებულოს წევრს, შევსულიყავი ადმინისტრაციულ შენობაში და ჩემი სადეპუტატო უფლებამოსილება ჯეროვნად განმეხორციელებინა, უფლება, რომელიც კანონით მაქვს მინიჭებული.

ოზურგეთის მუნიციპალიტეტის საკრებულოს ოპოზიციონერი წევრი ლელა ნაცვალაძე ამბობს, რომ ერთადერთი, რისი გარკვევაც მოახერხა, ის არის, რომ გურიის ხელისუფლებას, ფაქტობრივად, არაფერს ეკითხებიან:

_ მოვითხოვე ოფიციალური შინაგანაწესი, მაგრამ არავინ გამაცნო. ვაფრთხილებ ყველას _ 2002 წელს, როცა ხელისუფლებას დასჭირდა და გადაუკეტა მუნიციპალიტეტის შენობა ამომრჩევლებს, ვისი ფულითაც იღებდნენ ხელფასებს, ყველამ კარგად ვიცით, როგორ დასრულდა მათი რამდენიმეწლიანი მმართველობა. ანალოგიური ელოდება დღეს მოქმედ ხელისუფლებასაც, _ ამტკიცებს ნაცვალაძე.