საქართველოს ბანკის საცავიდან გატანილი ფულის ნაწილი სამართალდამცავებმა დღეს ერთ-ერთი ბრალდებულის სახლის სარდაფიდან ამოიღეს. როგორც შინაგან საქმეთა სამინისტროში აცხადებენ, 24 ოქტომბერს მომხდარი ქურდობის საქმეზე ორი პირია დაკავებული, დანაშაულებრივი გჯუფის ერთ წევრს ილია გელაშვილს კი ამ დრომდე ეძებენ.
სად არის საცავიდან გატანილი თანხის ნაწილი, უცნობია. ერთ-ერთი ვერსიით ილია გელაშვილმა ფული საზღვარზე ლარსის გამშვები პუნქტით გაიტანა.
ქურდობის სავარაუდო სქემა ცნობილია "საქართველოს ბანკის" მენეჯმენტისთვისაც, თუმცა ამ თემაზე კომენტარს არ აკეთებენ.
ილია გელაშვილი, რომელსაც საართალდამცავები ეძებენ, გაერთიანებულ საიინკასაციო სამსახურში ერთ-ერთ წამყვან პოზიციაზე მუშაობდა. მედიით გავრცელებული ინფორმაციის მიხედვით, ყოველი სამუშაო დღის ბოლოს ინკასაციის მიერ ფილიალებიდან ამოღებული თანხის ტრანსპორტირება სწორედ მისი მეთვალყურეობის ქვეშ ხორციელდებოდა.
სად არის თანხის ნაწილი, რომელიც გამოძიებამ ჯერ ვერ იპოვა, უცნობია. გაზეთ "პრაიმ თაიმში" გამოქვეყნებული მასალის მიხედვით, გელაშვილმა ეს თანხა საზღვარზე გადაიტანა. გაზეთის ინფორმაციით, "საქართველოს ბანკიდან" თანხის გატანის შემდეგ, გელაშვილმა საინკასაციო მანქანა რადარებიდან გამორთო, ატომობილი აღმაშენებლის გამზირზე დატოვა და რუსულნომრიანი ავტომანქანით საზღვარი გადაკვეთა. გამოცემის ცნობით, მან მესაზღვრეებს საკმაოდ სოლიდური თანხაც გადაუხადა.
გადალახა თუ არა საზღვარი გელაშვილმა, ამ თემაზე შინაგან საქმეთა სამინისტროში კომენტარს არ აკეთებენ. გამოძიება წინასწარი შეთანხმებით ჯგუფის მიერ, დიდი ოდენობით ფულადი თანხის ქურდობის ფაქტზე მიმდინარეობს.
